Najstarejšaja ŭkrainka pamierła ŭ 109 hadoŭ. Jana pieražyła Haładamor i ratavała bajcoŭ UPA
Na 110‑m hodzie žyćcia pamierła najstarejšaja žycharka Ukrainy Alena Rybałka. Usio žyćcio Alena Rybałka pryśviaciła miedycynie i była suviaznoj Ukrainskaj paŭstanckaj armii (UPA), piša «Ukrainskaja praŭda».
Alena Rybałka naradziłasia 2 červienia 1917 hoda. Žančyna rodam ź Vińnickaj vobłaści — tam jana atrymała miedycynskuju adukacyju. Jaje muž Ananij Niaŭzhoda taksama pracavaŭ miedykam. Para vychavała dvaich dziaciej.
Alena Rybałka na ŭłasnyja vočy bačyła žorstkaść savieckaha režymu i pieražyła Haładamor 1932—1933 hadoŭ.
«U 1933 hodzie ŭradžaj byŭ całkam narmalny. Ale paŭsiul chadzili z takimi mietaličnymi pikami: šukali, ci niama dzie schavanaha zbožža. Usich vyvozili na padvodach u ahulnuju jamu na mohiłkach. Ich usich skidvali tudy i štodnia zasypali. Heta praciahvałasia doŭhi čas, pakul nie zastałasia, moža, niejkaja treciaja častka, dy i toje nie. Ja ŭ toj čas jakraz vučyłasia ŭ miedvučyliščy, nam davali pa 200 h chleba. I my pavinny byli stajać u čarzie ŭsiu noč. Stajali — u kožnaha na ruce byŭ napisany numar», — dzialiłasia Alena ŭspaminami pra Haładamor.
Paśla Druhoj suśvietnaj vajny Alena pavodle raźmierkavańnia pierajechała ŭ Lvoŭ i pracavała balnicy.
Žančyna tajemna pieradavała miedykamienty ŭ padpolle i lačyła paranienych paŭstancaŭ.
Akramia taho, kab abaranić represavanych ukraincaŭ ad paŭtornaj vysyłki, žančyna vypisvała im fiktyŭnyja daviedki pra chvaroby.
Svajaki Aleny abstalavali kryiŭku (schovanku) — tam u paślavajenny čas chavaŭsia jaje brat Michaił Rybałka, nadrajonny kiraŭnik AUN.
Baćka Aleny, Kiryła Rybałka, byŭ voinam armii Ukrainskaj Narodnaj Respubliki i adnym z zasnavalnikaŭ Ukrainskaj aŭtakiefalnaj pravasłaŭnaj carkvy. Za heta ŭ 1937 hodzie jaho rasstralali.
A maci — apošniaja pradstaŭnica rodu hrafaŭ Patockich — pamierła padčas Druhoj suśvietnaj vajny.
Biełaruskija repietytary ŭ panicy: praz prablemy «Jandeksa» jany mohuć stracić materyjały, jakija napracoŭvali hadami27
Kamientary