U byłym pałacy Radziviłaŭ u Dziatłavie pačałasia rekanstrukcyja. I adrazu tudy niechta ŭbiŭsia
Nieviadomyja pranikli ŭ budynak byłoha pałaca Radziviłaŭ u Dziatłavie, dzie niadaŭna pačałasia rekanstrukcyja. Pra ŭzłom uładalnica pałaca Taćciana paviedamiła paśla taho, jak u siaredzinie minułaha tydnia pryjechała na abjekt i zaŭvažyła paškodžańni, piša rasijskaje ahienctva Sputnik.
Ślady ŭzłomu zastalisia adrazu na dźviuch dźviarach. Na centralnych dźviarach, jakija vychodziać u dvor susiedniaj balnicy, byli pahnutyja zaviesy zamka i padrapanyja dźviery. Zadnija dźviery, jakija vychodziać da sažałki, złamyśniki zdoleli vybić prykładna napałovu. Utvaryłasia adtulina takoha pamieru, što praź jaje biez prablem moh praleźci darosły čałaviek.
Uładalnica miarkuje, što spačatku nieviadomyja sprabavali adčynić centralnyja dźviery, ale nie zdoleli, paśla čaho pierajšli da zadniaha ŭvachodu.
Dakładna ŭstanavić čas uzłomu pakul nie ŭdałosia. Pavodle Taćciany, najbolš vierahodna, što heta adbyłosia ŭ vychadnyja. U budnija dni niepadalok ad pałaca pracuje kantrolna-prapuskny punkt dla ŭjezdu na terytoryju balnicy, dzie znachodziacca achoŭniki. U vychadnyja tam nikoha niama, a šłahbaum zastajecca adkrytym. Nie vyklučaje jana taksama, što złamyśniki mahli dziejničać nočču.
Kab vyśvietlić abstaviny, uładalnica vyklikała milicyju. Siłaviki vykazali mierkavańnie, što ŭ budynak mahli zaleźci padletki. Pra heta, u pryvatnaści, mahli śviedčyć niekalki pustych butelek z-pad hazavanych napojaŭ, znojdzienych unutry.
Adnak z pałaca sapraŭdy źnikli niekatoryja rečy — małatok i abcuhi. Taćciana adznačyła, što heta niedarahija instrumienty, ale jana zaniepakojenaja tym, što mahło b adbycca, kali b da hetaha času na abjekt užo paśpieli pryvieźci bolš darahoje abstalavańnie, instrumienty i budaŭničyja materyjały. U takim vypadku paśla ŭzłomu jany mahli b taksama źniknuć.
Niezadoŭha da hetaha ŭ pałacy znajšli niekalki frahmientaŭ pryhožaha bareljefa, ale jany zastalisia na miescy. Akramia taho, padčas razboru adnoj sa ścien rabočy vyjaviŭ kala čatyroch kiłahramaŭ stamatałahičnaj i čystaj rtuci, jakaja zachoŭvałasia ŭ hiermietyčnych jomistaściach. Rtuć paśla zabrali supracoŭniki MNS.
Taćciana nie vyklučaje, što złamyśniki mahli šukać mienavita rtuć. Jana taksama sumniavajecca, što praniknieńnie ŭ pałac było prosta padletkavaj zabavaj.
«Ja nie dumaju, što heta zrabili padletki dziela niejkaj cikaŭnaści. Mnie nie zdajecca, što sučasnaja moładź nastolki durnaja, kab tak nachabna załazić u pryvatnuju ŭłasnaść. Chutčej za ŭsio, u pałac niechta pranik dziela nažyvy», — skazała ŭładalnica.
Taćciana płanuje napisać zajavu ŭ milicyju i damahacca, kab vinavatych znajšli. Jana ličyć, što pakidać hety vypadak biez nastupstvaŭ nielha, bo ŭ advarotnym vypadku nichto nie harantuje, što niechta znoŭ nie pasprabuje praniknuć u budynak i nie naniasie jamu jašče bolšuju škodu.
Sam pałac rasijanka Taćciana nabyła na aŭkcyjonie za simvaličnuju sumu — 90 biełaruskich rubloŭ, što adpaviadała dvum bazavym vieličyniam. Budynak naležaŭ naščadkam viadomaha rodu Radziviłaŭ.
Pavodle ŭładalnicy, nabyć hety pałac było jaje maraj jašče ź dziacinstva. Ciapier jana zajmajecca jaho adnaŭleńniem. U pierśpiektyvie, akramia demanstracyjnych załaŭ dla naviedvalnikaŭ, u budynku płanujuć stvaryć kafe i apart-hatel.
Dobra zachavanyja padvały taksama płanujuć vykarystać. Tam mohuć źjavicca vinnyja sklepy, dehustacyjnyja zały abo kuchnia, dzie padčas ekskursij naviedvalnikam buduć pakazvać, jak u daŭnija časy hatavali ježu.
Kamientary
Poka u Taťjany jesť ,viernieje byli,tolko mołotok i płoskohubcy.
Čieriez tri hoda opiať budut prodavať.