«Taniečka była vielmi piaščotnaj i łaskavaj». U Minsku raźvitalisia z žorstka zabitaj žančynaj
U paniadziełak, 14 vieraśnia, u chramie Śviata-Jelisaviecinskaha manastyra prajšło raźvitańnie z Taćcianaj Marciščankaj, piša «Anłajnier».
Niekalki dzion tamu 43‑hadovuju minčanku, jakaja napiaredadni pierastała vychadzić na suviaź, znajšli zabitaj. Žančyna była na piatym miesiacy ciažarnaści. U jaje zabojstvie padazrajuć 38‑hadovaha chakiejnaha sudździu Alaksieja Haŭrylonka, jaki byŭ z Taćcianaj u blizkich adnosinach.
Na ŭvachodzie ŭ carkvu žurnalistaŭ sustreła chudzieńkaja intelihientnaja dziaŭčyna. Heta Złata, dačka Taćciany. Jana žyvie ŭ Rasii, ale kali daviedałasia pra źniknieńnie mamy, vylecieła ŭ Minsk u toj ža dzień.
«Maja mama była cudoŭnaj žančynaj, mnie zaraz vielmi ciažka», — raspaviadaje Złata.
Da jaje pastajanna padychodzić chtości z prysutnych, abdymaje, kaža słovy padtrymki. Jana ŭsim dziakuje, imkniecca trymacca, ale heta dajecca joj zusim niaprosta.
«Strata, ad jakoj ja nie zmahu apamiatacca nikoli», — napisała raniej dziaŭčyna ŭ svaich sacsietkach.
Ušanavać pamiać zahinułaj sabralisia dziasiatki ludziej — blizkija, svajaki, siabry, znajomyja i prosta tyja, chto daviedaŭsia pra trahiedyju i nie zastaŭsia abyjakavym.
Ad zakrytaj truny, jakoj amal nie bačna praz bukiety, nie adychodzić žančyna ŭ karyčnievaj chustcy. Heta mama Taćciany.
«Taniečka była vielmi piaščotnaj i łaskavaj… Zaŭsiody mianie matulaj nazyvała… Ciapier nam hałoŭnaje Złatu vyvučyć i na nohi pastavić… Jak jon moh heta zrabić…»
Da chrama ŭsio niasuć i niasuć kvietki. Niahledziačy na budny dzień, płyń ludziej nie spyniajecca.
«Heta tut raźvitvajucca z Taćcianaj?» — za try hadziny heta pytańnie prahučała nie adzin raz.
Chtości razam z kvietkami prynios miakkuju cacku. «Dziciatka ž taksama zahinuła», — adznačaje supracoŭnica miascovaj kramy.
Siarod tych, chto pryjšoŭ, šmat maładych chłopcaŭ i dziaŭčat — vierahodna, siabry Złaty pryjšli padtrymać dziaŭčynu.
Padčas adpiavańnia mnohija płačuć: toje, što adbyłosia z Taćcianaj, ni ŭ kaho nie ŭkładajecca ŭ hałavie. Pa słovach rodnych, u Taćciany z Alaksiejem nie było surjoznych kanfliktaŭ. Pra toje, što žančyna čakaje ad jaho dzicia, mužčyna viedaŭ i rehularna razam ź joj byvaŭ na abśledavańniach. Ništo nie pradvieściła biady, kažuć blizkija.
Pierad tym jak jechać na mohiłki, Złata jašče raz pavaročvajecca da prysutnych i dziakuje za padtrymku:
«Dziakuj, što pryjšli raźvitacca z majoj matulaj».
Taćciana Marciščanka pierastała vychadzić na suviaź 8 vieraśnia. Praz dva dni jaje dačka paviedamiła pra źniknieńnie maci ŭ milicyju. A dniom 11 vieraśnia stała viadoma, što žančynu znajšli zabitaj. Padazravanaha zatrymali na praciahu sutak. Im akazaŭsia 38‑hadovy chakiejny sudździa Alaksiej Haŭrylonak.
Pavodle danych MUS, mužčyna viedaŭ, što žančyna čakaje ad jaho dzicia, ale pry hetym aficyjna byŭ u adnosinach ź inšaj žančynaj. Taksama jon pryznaŭsia, što padčas svarki z Taćcianaj jon niekalki razoŭ udaryŭ jaje nažom, pakłaŭ cieła ŭ darožnuju sumku, vyviez u les u Minskim rajonie i zakapaŭ. Pa darozie pazbaviŭsia ad dokazaŭ. Pa fakcie zabojstva zaviedziena kryminalnaja sprava.
Alaksiej Haŭrylonak — syn byłoha bramnika zbornaj Biełarusi pa chakiei Alaksandra Haŭrylonka. Jon ź dziacinstva zajmaŭsia chakiejem, vystupaŭ za junackija zbornyja krainy, u siezonie 2006/2007 hraŭ na moładzievym čempijanacie śvietu, a z 2008 pa 2015 hod byŭ abaroncam CHK «Brest». U 2015‑m zaviaršyŭ karjeru hulca i pierajšoŭ u sudziejstva.
Jahony baćka paćvierdziŭ zatrymańnie syna:
«Ja pakul viedaju nie bolš za vas… Spadziajusia na niejki cud, mahčyma, pamyłka».
«Spadziajusia na cud, mahčyma, pamyłka». Baćka chakiejnaha sudździ pra syna, jakoha padazrajuć u zabojstvie ciažarnaj žančyny
Što viadoma pra chakiejnaha sudździu, zatrymanaha pa padazreńni ŭ zabojstvie ciažarnaj minčanki
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka
«Vysoki taki chłopiec, chakieist». Padrabiaznaści zabojstva ciažarnaj minčanki
«My viedali, što jon spartsmien». Susiedka zabitaj ciažarnaj žančyny raskazała padrabiaznaści pra jaje
Kamientary