«Танечка была вельмі пяшчотнай і ласкавай». У Мінску развіталіся з жорстка забітай жанчынай
У панядзелак, 14 верасня, у храме Свята-Елісавецінскага манастыра прайшло развітанне з Таццянай Марцішчанкай, піша «Анлайнер».
Некалькі дзён таму 43‑гадовую мінчанку, якая напярэдадні перастала выхадзіць на сувязь, знайшлі забітай. Жанчына была на пятым месяцы цяжарнасці. У яе забойстве падазраюць 38‑гадовага хакейнага суддзю Аляксея Гаўрылёнка, які быў з Таццянай у блізкіх адносінах.
На ўваходзе ў царкву журналістаў сустрэла худзенькая інтэлігентная дзяўчына. Гэта Злата, дачка Таццяны. Яна жыве ў Расіі, але калі даведалася пра знікненне мамы, вылецела ў Мінск у той жа дзень.
«Мая мама была цудоўнай жанчынай, мне зараз вельмі цяжка», — распавядае Злата.
Да яе пастаянна падыходзіць хтосьці з прысутных, абдымае, кажа словы падтрымкі. Яна ўсім дзякуе, імкнецца трымацца, але гэта даецца ёй зусім няпроста.
«Страта, ад якой я не змагу апамятацца ніколі», — напісала раней дзяўчына ў сваіх сацсетках.
Ушанаваць памяць загінулай сабраліся дзясяткі людзей — блізкія, сваякі, сябры, знаёмыя і проста тыя, хто даведаўся пра трагедыю і не застаўся абыякавым.
Ад закрытай труны, якой амаль не бачна праз букеты, не адыходзіць жанчына ў карычневай хустцы. Гэта мама Таццяны.
«Танечка была вельмі пяшчотнай і ласкавай… Заўсёды мяне матуляй называла… Цяпер нам галоўнае Злату вывучыць і на ногі паставіць… Як ён мог гэта зрабіць…»
Да храма ўсё нясуць і нясуць кветкі. Нягледзячы на будны дзень, плынь людзей не спыняецца.
«Гэта тут развітваюцца з Таццянай?» — за тры гадзіны гэта пытанне прагучала не адзін раз.
Хтосьці разам з кветкамі прынёс мяккую цацку. «Дзіцятка ж таксама загінула», — адзначае супрацоўніца мясцовай крамы.
Сярод тых, хто прыйшоў, шмат маладых хлопцаў і дзяўчат — верагодна, сябры Златы прыйшлі падтрымаць дзяўчыну.
Падчас адпявання многія плачуць: тое, што адбылося з Таццянай, ні ў каго не ўкладаецца ў галаве. Па словах родных, у Таццяны з Аляксеем не было сур'ёзных канфліктаў. Пра тое, што жанчына чакае ад яго дзіця, мужчына ведаў і рэгулярна разам з ёй бываў на абследаваннях. Нішто не прадвесціла бяды, кажуць блізкія.
Перад тым як ехаць на могілкі, Злата яшчэ раз паварочваецца да прысутных і дзякуе за падтрымку:
«Дзякуй, што прыйшлі развітацца з маёй матуляй».
Таццяна Марцішчанка перастала выхадзіць на сувязь 8 верасня. Праз два дні яе дачка паведаміла пра знікненне маці ў міліцыю. А днём 11 верасня стала вядома, што жанчыну знайшлі забітай. Падазраванага затрымалі на працягу сутак. Ім аказаўся 38‑гадовы хакейны суддзя Аляксей Гаўрылёнак.
Паводле даных МУС, мужчына ведаў, што жанчына чакае ад яго дзіця, але пры гэтым афіцыйна быў у адносінах з іншай жанчынай. Таксама ён прызнаўся, што падчас сваркі з Таццянай ён некалькі разоў ударыў яе нажом, паклаў цела ў дарожную сумку, вывез у лес у Мінскім раёне і закапаў. Па дарозе пазбавіўся ад доказаў. Па факце забойства заведзена крымінальная справа.
Аляксей Гаўрылёнак — сын былога брамніка зборнай Беларусі па хакеі Аляксандра Гаўрылёнка. Ён з дзяцінства займаўся хакеем, выступаў за юнацкія зборныя краіны, у сезоне 2006/2007 граў на моладзевым чэмпіянаце свету, а з 2008 па 2015 год быў абаронцам ХК «Брэст». У 2015‑м завяршыў кар'еру гульца і перайшоў у судзейства.
Ягоны бацька пацвердзіў затрыманне сына:
«Я пакуль ведаю не больш за вас… Спадзяюся на нейкі цуд, магчыма, памылка».
«Спадзяюся на цуд, магчыма, памылка». Бацька хакейнага суддзі пра сына, якога падазраюць у забойстве цяжарнай жанчыны
Што вядома пра хакейнага суддзю, затрыманага па падазрэнні ў забойстве цяжарнай мінчанкі
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка
«Высокі такі хлопец, хакеіст». Падрабязнасці забойства цяжарнай мінчанкі
«Мы ведалі, што ён спартсмен». Суседка забітай цяжарнай жанчыны расказала падрабязнасці пра яе
Каментары