Утэ Ніклас стала першай жанчынай у гісторыі нямецкага флоту, якая атрымала камандаванне фрэгатам. Яна прыняла камандаванне караблём «Райнланд-Пфальц» у капітана Бенедыкта Айхорна.
Цяпер Ніклас належыць прывесці фрэгат і яго экіпаж са 126 вайскоўцаў у поўную баявую гатоўнасць пасля рамонту на верфі, піша Bild.
Новая капітанка распавяла выданню Der Spiegel, што наперадзе яе чакае «захапляльны, але складаны этап». Паводле яе слоў, яна з нецярпеннем чакае вяртання карабля ў мора.
Для Ніклас гэта не першы досвед службы на «Райнланд-Пфальц»: раней яна была першым афіцэрам карабля.
Апошнім часам яна працавала афіцэрам аператыўнага штаба ў камандаванні замежных аперацый Бундэсвера ў Швілавзее пад Берлінам.
Жанчыны атрымалі доступ да ўсіх ваенных спецыяльнасцяў у Германіі толькі ў 2001 годзе. Цяпер у Бундэсверы служаць больш за 25 тысяч жанчын — крыху больш за 13% вайскоўцаў.
Каментары