Нямецкая пракуратура выставіла абвінавачанне меркаванай расійскай шпіёнцы. Ёй пагражае 10 гадоў турмы.
Расследаванне справы Ілоны В., падазраванай у шпіянажы на карысць Расіі, падышло да канца, піша нямецкае выданне «Більд». Федэральная пракуратура Германіі выставіла PR-спецыялістцы нямецка-украінскага паходжання абвінавачанне ў «агентурнай дзейнасці ў інтарэсах разведкі» Расіі. Суд пройдзе ў Берліне.
Гэты выпадак выклікаў шырокі рэзананс па ўсёй Германіі. На Ілону В. надзелі кайданкі ў студзені ў Берліне. Следчыя абвінавачваюць яе ў тым, што яна збірала інфармацыю для расійскага ГРУ і наладжвала кантакты ў палітычных колах і колах, звязаных з бяспекай.
Ілона В. падбіралася не толькі да асяродкаў расійскай эміграцыі, але і да цэнтраў улады Германіі. На германа-ўкраінскім форуме ў снежні 2025 года ёй удалося апынуцца ўсяго за некалькі метраў ад канцлера Фрыдрыха Мерца і прэзідэнта Украіны Уладзіміра Зяленскага. Пакуль яны сядзелі ў першым радзе, Ілона В. заняла месца проста за імі і здымала.
У той момант нямецкая контрразведка, мусіць, ужо даўно трымала яе ў полі зроку.
Паводле даных следства, Ілона В. не пазней за кастрычнік 2023 года ўжо працавала на супрацоўніка расійскай спецслужбы пры пасольстве ў Берліне. Яна інфармавала яго пра мерапрыемствы высокага ўзроўню і ў некаторых выпадках забяспечвала яму доступ да важных сустрэч, каб той мог сам завязаць кантакты ў палітычных колах. Акрамя таго, яна звярталася да супрацоўнікаў міністэрства абароны і здабывала інфармацыю пра нямецкую прамысловасць.
Паводле інфармацыі «Більд», у Ілоны В. быў пропуск у Бундэстаг, і яна наведвала мерапрыемствы міністэрстваў, пасольстваў і палітычных арганізацый. На фатаграфіях яе, у прыватнасці, можна ўбачыць на даху Міністэрства замежных спраў.
Ілоне В. удавалася гэта ў тым ліку таму, што яна была старшынёй Федэральнага аб'яднання бінацыянальных таварыстваў (BBG). Афіцыйна аб'яднанне выступае за міжнародны абмен і ўзаемаразуменне паміж народамі.
Калі суд пацвердзіць абвінавачанні, падазраванай агентцы пагражае да дзесяці гадоў пазбаўлення волі.
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары