«Па-першае, не Коля, а Мікалай». Ботаў вывелі на абарону Колі-лейтэнанта
Ботаў ізноў мабілізавалі на падтрымку малодшага сына Лукашэнкі. Гэтым разам нагодай стала заява пра яго вайсковую службу.
«Будучы прэзідэнт» — боты аддаўна рыхтавалі культ Колі Лукашэнкі. «Дзякуй вам за сына Мікалая», пісалі боты на адрас Ірыны Абельскай.
Нядаўна Аляксандр Лукашэнка паведаміў, што яго малодшы сын праходзіць тэрміновую вайсковую службу ў званні лейтэнанта — «у самым складаным падраздзяленні».
Пад ролікам у тыктоку з гэтай навіной і заўвагай пра тое, што служба не перашкаджае Лукашэнку-малодшаму разам з бацькам ездзіць за межы краіны, таксама адправілі сотні ботаў падтрымаць Мікалая.
«Мікалай — наш гонар», «Мікалай — малайчына, гонар бацькоў», — запэўніваюць боты.
«Няхай служыць, як усе, усё правільна», «Малайчына, служба патрэбная мужчыну», — заўважаюць іншыя.
Ёсць і спробы абараніць Мікалая ад пытанняў пра тое, як менавіта ён служыць:
«Служыць хлопец, вам што да гэтага? Самі служылі?», «Па-першае, не Коля, а Мікалай, па-другое, многія ўвогуле нідзе і ніколі не служылі, а хлопец мудры не па гадах і заслугоўвае павагі».
Частка каментатараў пераключаецца з самога Мікалая на крытыкаў. Іх абвінавачваюць у зайздрасці і залішняй цікавасці да чужога жыцця:
«Колькі жоўці ў людзей, усё ім не так, адна зайздрасць», «Прачытала каментары і стала брыдка. Адкуль у людзях столькі жоўці?», «Людзі, што вы ўсё хлусіце, што вам не сядзіцца? Жывіце спакойна і дайце жыць людзям».
«Зайздросціце моўчкі», — раяць боты.
Пытанні пра месца службы таксама прапануюць лічыць недарэчнымі:
«А што вам да таго, дзе служыць гэты цудоўны хлопец?»
У іншых каментарах робіцца стаўка патрыятычны матыў:
«Людзі, якая вам розніца, дзе ён служыць? Уся сям’я жыве ў Беларусі. Яны патрыёты. Што вы ўсё вышукваеце, вынюхваеце? І ўсё вам не так»,
«Якая розніца, дзе ён будзе служыць. Важна, што ён не ў Лондане ці Маямі».
Хапае і проста пажаданняў Мікалаю «здароўя і шмат медалёў з ордэнамі».
У той жа час сярод ботаў сустракаюцца і каментары людзей, якія хацелі б атрымаць пацвярджэнне таго, што Мікалай сапраўды служыць.
«Адгукніцеся, калі ласка, служывыя. Хто бачыў Коленьку на службе… Ну калі ласка, можна ананімна».
Цяпер чытаюць
Што вядома пра віцебчука, якога вінавацяць у спробе падрыву самалёта ў Германіі16
Каментары