У раёне мінскіх вуліц Гая і Арлоўскай пачалі зносіць прыватны сектар
У раёне вуліц Гая і Арлоўскай у Мінску пачалі зносіць прыватную забудову, якая трапіла ў зону рэканструкцыі пад новы жылы комплекс. Будаўнікі ўжо разбіраюць першыя дамы, а былыя ўладальнікі часткі сядзіб перасяліліся, атрымаўшы грашовыя выплаты або кватэры ў новых дамах, піша Domovita.by.
Першыя работы пачаліся на скрыжаванні вуліцы Гая і 7‑га Арлоўскага завулка. Тут ужо знеслі некалькі дамоў і расчысцілі пляцоўку. У першую чаргу пад знос вызначылі 17 прыватных сядзіб, размешчаных на 7-м, 4‑м і 5‑м Арлоўскіх завулках. У пакінутых дамах камунальныя службы ўжо перакрылі газ.
Пераважна гэта старыя дамы без гарадскіх выгод — з мясцовай каналізацыяй і без цэнтральнага водаправода. Іх уладальнікі пагадзіліся на перасяленне, выбраўшы грашовую кампенсацыю або кватэры ў новабудоўлях. Па словах мясцовага жыхара Аляксандра, некаторыя суседзі пераехалі ў дамы на вуліцы Маршала Лосіка.
Аднак частка ўладальнікаў пакідаць свае дамы не збіраецца. Гаворка ідзе перадусім пра ўпарадкаваныя катэджы, у якіх ёсць усе неабходныя камунікацыі. Іх гаспадары не пагадзіліся з прапанаванымі горадам умовамі і хочуць застацца на сваіх участках. Па словах мясцовага жыхара, знос гэтых дамоў пакуль не плануецца, бо ўладальнікі не прынялі прапанаваныя варыянты кампенсацыі або перасялення.
Тэрыторыя ў межах вуліц Шчадрына, Гая і Арлоўскай павінна быць істотна перабудавана ў адпаведнасці з зацверджаным дэталёвым планам. На месцы прыватнага сектара плануюць узвесці шматпавярховыя жылыя дамы павышанай паверхавасці на стылабатах. Першыя два ўзроўні будынкаў будуць адведзеныя пад камерцыйныя памяшканні — там плануюць размясціць крамы, аптэкі, кавярні і іншыя сэрвісы.
У больш шырокім маштабе пад знос у гэтым раёне вызначылі больш за 400 прыватных сядзіб. На вызваленай тэрыторыі плануецца пабудаваць больш за 4000 новых кватэр агульнай плошчай больш за 270 тысяч квадратных метраў. Акрамя жылых дамоў, праект прадугледжвае будаўніцтва дзіцячых садоў, школы, паркінга і гандлёва-адміністрацыйнага комплексу.
Зменяцца правілы вывазу каналізацыйных адкідаў з прыватных дамоў
Самы дарагі прададзены ў жніўні катэдж сталіцы схаваўся насупраць «Мінск-Свету»
У Мінску хутка знікне яшчэ адзін закутак прыватнага сектара. Тут пабудуюць жыллёвы комплекс
У Мінску цяпер будуюцца шэсць новых гандлёвых цэнтраў. Што за яны?
Што вядома пра віцебчука, якога вінавацяць у спробе падрыву самалёта ў Германіі11
Каментары