Дацкі брэнд абутку ECCO у Беларусі фактычна спыніў працу. Але пэўнасці няма
Сайт дацкага вытворцы абутку ECCO у Беларусі часова недаступны. На старонцы-заглушцы пры гэтым паведамляецца, што брэнд працягвае працаваць у краіне. Пра гэта кампанія таксама паведаміла кліентам праз SMS-рассылку, паведамляе Office Life.
На беларускім сайце ECCO гаворыцца, што ў працы крамы ў гандлёвым цэнтры «Замак» і сайта ecco-shoes.by адбываюцца змены, таму інтэрнэт-крама часова спыніла працу з 30 верасня 2026 года.
Акрамя інтэрнэт-крамы, з 29 верасня перастала працаваць бонусная праграма ECCO. Пры гэтым падарункавыя карты брэнда па-ранейшаму можна выкарыстоўваць у краме ў ГЦ «Замак».
Рознічнымі продажамі ECCO у Беларусі займаецца ІПТАА «ЭККО-БЕЛРОС», зарэгістраванае ў лютым 2013 года. Асноўны від дзейнасці кампаніі — рознічны гандаль абуткам у спецыялізаваных крамах.
У 2014 годзе ў Беларусі працавалі дзевяць крам ECCO: шэсць у Мінску і па адной у Магілёве, Гомелі і Віцебску. У пачатку 2026 года ў кампаніі заставалася пяць сталічных крам, пасля чаго яны паступова пачалі закрывацца. У пачатку восені спыніла працу крама ў мінскім ГЗЦ Dana Mall. Цяпер у Беларусі засталася толькі адна крама ECCO — у гандлёвым цэнтры «Замак».
Яшчэ летам ECCO абвясціў распродаж усяго асартыменту абутку. Карыстальнікі сацыяльных сетак тады паведамлялі са спасылкай на прадаўцоў, што новых паставак не чакаецца.
У жніўні Office Life звяртаўся ў кампанію па каментар. Там адказалі, што ў адпаведнасці з карпаратыўнай палітыкай не каментуюць пытанні, звязаныя з унутранымі бізнэс-працэсамі.
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку32
Каментары