Твару брэсцкага ДФР так і не далі палкоўніка. І адправілі ідэолагам у кацельню
Валерый Велясніцкі больш за 15 гадоў быў голасам фінансавай міліцыі Берасцейшчыны.
У 2010‑х падпалкоўнік Валерый Велясніцкі кіраваў Пінскім міжраённым аддзелам упраўлення Дэпартамента фінансавых расследаванняў Дзяржкантролю па Брэсцкай вобласці і адказваў за Пінск, Пінскі, Лунінецкі, Іванаўскі і Столінскія раёны.
Пры ім, да юбілею аддзела, па благаславенні архіепіскапа Пінскага і Лунінецкага Стэфана, зрабілі харугвы са святым апосталам Паўлам — «нябесным заступнікам органаў фінансавых расследаванняў».
Улетку 2020 года Велясніцкага перавялі ў абласное ўпраўленне ДФР, дзе ён фактычна стаў тварам упраўлення, каментуючы ўсе гучныя справы вобласці.
У 2020 ДФР стаў інструментам ажыццяўлення палітычных рэпрэсій, калі пад выглядам прыцягнення да адказнасці за фінансавыя парушэнні рэпрэсіўныя органы каралі грамадзян за праяўленне грамадзянскай пазіцыі. Асабістая роля Велясніцкага ў рэпрэсіях, а таксама доля сфабрыкаваных справаў пакуль што невядомая.
Апошні вядомы каментар Велясніцкага як супрацоўніка Дэпартамента фінансавых расследаванняў выйшаў у 2025 годзе.
А ўжо ў 2026, як стала вядома «Нашай Ніве», Велясніцкі ўсплыў як ідэолаг Брэсцкай кацельнай гаспадаркі. На прадпрыемстве працуе каля 450 чалавек.
Цяпер ягоная праца — «адзіныя дні інфармавання», семінары «ідэалагічнай вертыкалі» Ленінскага раёна і рэалізацыя дырэктывы №12 «Аб рэалізацыі асноў ідэалогіі беларускай дзяржавы». Гэтым, уласна, і запоўнены тэлеграм-канал Брэсцкай кацельнай гаспадаркі.
Што цікава, за доўгую кар'еру ў органах Велясніцкаму так і не далі палкоўніка. Згодна з Палажэннем аб праходжанні службы ў органах фінансавых расследаванняў, падпалкоўнікі (і ніжэй) могуць служыць да 48 гадоў. Гэты ўзрост у Велясніцкага наступіў 5 красавіка 2026 года. Далей — толькі з асабістай згоды кіраўніцтва або пры прысваенні звання палкоўніка.
Цяпер чытаюць
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1010
Каментары