Tramp nie paviedamlaŭ Litvie pra namier zaklučyć z Łukašenkam pahadnieńnie pa ŭhnajeńniach

Pavodle słoŭ parłamientaryja, u Litvy niama pryčyn admianiać sankcyi suprać Biełarusi. Jon padkreśliŭ, što heta ahulnaja pazicyja nie tolki Litvy, ale i Jeŭrasajuza, a dziejnyja sankcyi raźličanyja da kanca lutaha.

Motuzas adznačyŭ, što Litva nie moža ŭpłyvać na rašeńni ZŠA abo na mahčymuju damoŭlenaść ab zakupcy biełaruskich uhnajeńniaŭ. Pavodle jaho, tolki čas pakaža, ci zdoleje Vašynhton zaklučyć takoje pahadnieńnie.

Litoŭski palityk zajaviŭ, što jahonaja kraina praciahvaje ličyć Biełaruś niedemakratyčnaj dziaržavaj, a Alaksandra Łukašenku — niedemakratyčna abranym kiraŭnikom. Jon pryznaŭ, što vyzvaleńnie palityčnych źniavolenych adbyvajecca, ale, na jaho dumku, u Biełarusi ŭ cełym ničoha nie źmianiajecca. Apazicyja pa-raniejšamu nie maje mahčymaści paŭnavartasna dziejničać u krainie: mnohija jaje pradstaŭniki vyjechali za miažu, a aktyŭnych udzielnikaŭ hramadskaha žyćcia i karystalnikaŭ sacyjalnych sietak praciahvajuć sadžać u turmy.

Motuzas taksama nahadaŭ, što Minsk padtrymlivaje rasijskuju vajnu suprać Ukrainy, a Litva i inšyja susiednija krainy rehularna sutykajucca z roznymi hibrydnymi atakami z boku Biełarusi.

Staršynia parłamienckaha kamiteta ličyć, što pakul rana padrabiazna kamientavać mahčymuju amierykanska-biełaruskuju damoŭlenaść. Jon źviarnuŭ uvahu, što zajavy administracyi ZŠA ŭ apošni čas niaredka tyčacca dalokaj pierśpiektyvy, tamu jašče niezrazumieła, jakim čynam i praź jakija maršruty mahli b pieravozicca biełaruskija ŭhnajeńni.

21 vieraśnia prezident ZŠA Donald Tramp paviedamiŭ, što Vašynhton pracuje nad bujnym pahadnieńniem ab zakupcy ŭhnajeńniaŭ u Biełarusi. Pavodle jaho słoŭ, heta dazvoliła b amierykanskim kampanijam kuplać uhnajeńni tańniej, čym ciapier u Kanadzie.

ZŠA impartujuć bolšuju častku ŭhnajeńniaŭ, jakija spažyvajucca ŭ krainie, pryčym značnaja dola pastavak prypadaje na Kanadu. Paśla rasijskaha ŭvarvańnia va Ukrainu suśvietnyja ceny na ŭhnajeńni istotna vyraśli.

U kancy minułaha hoda ZŠA admianili sankcyi suprać biełaruskich uhnajeńniaŭ, uviedzienyja ŭ pačatku dziesiacihodździa. Adnak mahčymaści impartavać hetuju pradukcyju zastavalisia abmiežavanymi praz zabarony na tranzit tavaraŭ ź Biełarusi.

Ministr zamiežnych spraŭ Litvy Kiastucis Budrys na minułym tydni pryznaŭ, što pazicyi Litvy i ZŠA nakont źmiakčeńnia sankcyj suprać Biełarusi adroźnivajucca. Pry hetym jon nie zhadvaŭ pra biełaruskija ŭhnajeńni.

• 2
• 0
• 1
• 0
• 0
• 0
• 0
• 0