Pieršaje sudna ź biełaruskim kalijem prybudzie ŭ ZŠA ŭ kastryčniku

U kastryčniku ŭ port Novaha Arleana pavinna prybyć pieršaja za čatyry hady partyja biełaruskich kalijnych uhnajeńniaŭ. Havorka idzie pra 30 tysiač ton chłarydu kaliju, abo MOP — najbolš raspaŭsiudžanaha vidu kalijnych uhnajeńniaŭ, piša Reform.news sa spasyłkaj na halinovaje ahienctva Argus Media.

Pastaŭka stanie pieršym fizičnym paćviardžeńniem adnaŭleńnia kamiercyjnaha handlu biełaruskim kalijem z ZŠA paśla admieny amierykanskich abmiežavańniaŭ. Alaksandr Łukašenka 11 vieraśnia zajaviŭ, što Biełaruś užo pačała pradavać kalijnyja ŭhnajeńni amierykanskim klijentam.

«Chočacie ŭ nas kalijnyja ŭhnajeńni (kali chočacie zakuplać) — kali łaska. My nie možam adrazu. Voś u nas vyzvaliłasia. My ž zakantraktavali ich na hety hod, na nastupny hod razhledzim. Zaraz źjaviłasia mahčymaść sudny zahruzić (zaŭtra dakładna skončym zahruzku) — zabirajcie. Ale pazyčku viarnicie. 43‑-44 młn dalaraŭ našych u «Sicibanku» zatrymalisia — kampanija, jakaja z nami supracoŭničała, zapłaciła hrošy. U bahataj Amierycy. Vy nam, kali łaska, viarnicie hetyja hrošy», — raskazaŭ jon, vystupajučy pierad žurnalistami na Abuz-Lasnoŭskim palihonie.

Da ŭviadzieńnia sankcyj kampanija Gavilon była adnym z asnoŭnych amierykanskich atrymalnikaŭ pradukcyi «Biełaruśkalija» ŭ Łuizijanie. U 2022 hodzie Gavilon Fertilizer źmianiła nazvu na MacroSource.

ZŠA ŭviali sankcyi suprać «Biełaruśkalija» ŭ žniŭni 2021 hoda.

Paźniej pad abmiežavańni trapili taksama Biełaruskaja kalijnaja kampanija i inšyja źviazanyja z halinoj struktury. Paśla zakančeńnia pierachodnaha pieryjadu amierykanskim kampanijam było zabaroniena pravodzić ź imi apieracyi.

U śniežni 2025 hoda Vašynhton abviaściŭ pra namier źniać abmiežavańni ź biełaruskaha kalijnaha siektara paśla vyzvaleńnia 123 źniavolenych.

U sakaviku 2026 hoda ŭpraŭleńnie kantrolu za zamiežnymi aktyvami Ministerstva finansaŭ ZŠA — OFAC — vyklučyła z sankcyjnaha śpisu «Biełaruśkalij», Biełaruskuju kalijnuju kampaniju i šerah inšych pradpryjemstvaŭ. Adnačasova byli asłablenyja abmiežavańni ŭ dačynieńni da niekalkich biełaruskich finansavych arhanizacyj.

Amierykanskija ŭłady pry hetym asobna tłumačyli, što admiena sankcyj nie aznačaje aŭtamatyčnaha razbłakavańnia majomaści i hrošaj, zamarožanych padčas dziejańnia abmiežavańniaŭ. Dla ich viartańnia mohuć spatrebicca asobnyja rašeńni OFAC.

21 vieraśnia prezident ZŠA Donald Tramp paviedamiŭ, što Vašynhton pracuje nad «maštabnaj ździełkaj» zakupki kaliju ŭ Biełarusi. Pavodle jaho słoŭ, biełaruskaja pradukcyja pavinna kaštavać «istotna tańniej», čym uhnajeńni, jakija ZŠA kuplajuć u Kanady.

Kanada zabiaśpiečvaje pieravažnuju častku amierykanskaha impartu kaliju. Usiaho za hod ZŠA impartujuć kala 5,5 — 8,7 miljona tonaŭ kalijnych uhnajeńniaŭ (u zaležnaści ad formy pieraliku). Tamu partyja abjomam 30 tysiač ton budzie mieć pierš za ŭsio simvaličnaje značeńnie: jana paćviardžaje viartańnie biełaruskaha vytvorcy na amierykanski rynak, ale sama pa sabie nie zdolnaja istotna źmianić bałans pastavak.

3 listapada ŭ ZŠA adbuducca častkovyja vybary ŭ Kanhres.

• 4
• 1
• 5
• 5
• 0
• 0
• 4
• 0