U Kanadzie sumniavajucca, što biełaruski kalij budzie amierykancam bolš vyhadny za ichni

Kala 80% kalijnych uhnajeńniaŭ, jakija ZŠA impartujuć, pastupaje z Kanady. Na amierykanski rynak nakiroŭvajecca amal pałova kanadskaha ekspartu kaliju, što prynosić krainie kala 4,2 miljarda dalaraŭ štohod. Ciapier hetyja ŭhnajeńni vyzvalenyja ad amierykanskich mytaŭ.

U Kanadzie pracujuć 10 kalijnych šachtaŭ, jakija naležać kampanijam Nutrien, The Mosaic Company, Compass Minerals i K+S Potash Canada. Usie jany raźmieščanyja ŭ pravincyi Saskačevan i razam zabiaśpiečvajuć amal tracinu suśvietnaj vytvorčaści kaliju.

Prezidentka Hornazdabyŭnoj asacyjacyi Saskačevana Pem Švan sumniavajecca, što biełaruski kalij zmoža całkam vycieśnić kanadski. Pa jaje słovach, kanadskija vytvorcy pracujuć va ŭmovach suśvietnych cen, jakija farmujucca rynkam i pieramovami, i biełaruskim pastaŭščykam daviadziecca dziejničać u tych ža ŭmovach.

Halinovaja arhanizacyja Fertilizer Canada, u svaju čarhu, źviarnuła ŭvahu na pieravahi hieahrafičnaj blizkaści kanadskich pastavak. Asabliva važnaj jana ličyć mahčymaść chutka zabiaśpiečvać amierykanskich fiermieraŭ uhnajeńniami ŭ krytyčnyja pieryjady pasiaŭnoj kampanii. Pavodle acenak arhanizacyi, intehravanaja paŭnočnaamierykanskaja sistema pastavak dapamahaje padtrymlivać pradukcyjnaść sielskaj haspadarki, dastupnaść uhnajeńniaŭ i charčovuju biaśpieku ŭ abiedźviuch krainach.

Kanadskija ekśpierty taksama adznačajuć łahistyčnyja prablemy. Ekanamist Eryn Uir zajaviŭ, što Kanada maje istotnuju pieravahu dziakujučy niepasrednym čyhunačnym pastaŭkam u sielskahaspadarčyja štaty ZŠA. Dla biełaruskaha kaliju spatrebiłasia b dastaŭlać pradukcyju karablami ŭ amierykanskija party, a zatym pierahružać jaje na ciahniki, što značna pavialičvaje vydatki. Akramia taho, ekśpiert sumniavajecca, što Biełaruś maje dastatkova svabodnych reziervovych abjomaŭ dla takich pastavak.

Razam z tym u Kanadzie razhladajuć inicyjatyvu Trampa jak realnuju pahrozu dla cenaŭtvareńnia. Prafiesar ekanomiki Univiersiteta Redžajny Džejsan Čajłds adznačyŭ, što kanadskija vytvorcy doŭhi čas atrymlivali vyhadu ad adsutnaści Biełarusi i Rasii na paŭnočnaamierykanskim rynku. Kali biełaruski kalij vierniecca na hety rynak u značnych abjomach, kanadskim kampanijam daviadziecca kankuryravać ź im, što moža paŭpłyvać na ich dachody i canu prodažu pradukcyi.

Da ŭviadzieńnia sankcyj u 2021 hodzie Biełaruś pastaŭlała ŭ ZŠA krychu bolš za 700 tysiač ton kalijnych uhnajeńniaŭ štohod. Amierykanskija sankcyi suprać biełaruskaha kaliju byli admienienyja tolki ŭ kancy 2025 hoda.

11 vieraśnia Alaksandr Łukašenka paviedamiŭ, što Biełaruś užo pačała pastaŭlać kalijnyja ŭhnajeńni ŭ ZŠA. Pry hetym jon adznačaŭ, što ŭ hetym hodzie Biełaruś nie moža adrazu nakiravać tudy vialikija abjomy, pakolki asnoŭnaja častka pradukcyi ŭžo zakantraktavanaja.

• 1
• 0
• 2
• 2
• 0
• 0
• 0
• 0