Disney rychtuje pierazapusk papularnaha multsieryjała pačatku 1990‑ch hadoŭ «Čorny płašč». Novaja viersija vyjdzie na stryminhavym servisie Disney+ prykładna praz 35 hadoŭ paśla premjery aryhinała. Aŭtary chočuć zachavać znajomych hierojaŭ i atmaśfieru kłasičnaha multsieryjała, ale raskazać całkam novuju historyju.
Pavodle siužetu, Drejk Mełard šmat hadoŭ pravioŭ u paralelnym śviecie, dzie nichto nie viedaje pra jaho minułaje, podźvihi i baraćbu sa złačyncami. Viarnuŭšysia ŭ zvykły śviet, jon vymušany faktyčna nanoŭ pryzvyčaicca da ŭłasnaj lehiendy. Jamu dapamahaje maładaja i svavolnaja Daki, jakaja dobra viedaje historyju jahonych pryhodaŭ i stanovicca jaho naparnicaj.
Hierojam znoŭ daviadziecca sutyknucca ź viadomymi prychilnikam aryhinalnaha sieryjała zładziejami, siarod jakich Miehavolt, Niehadziuk i inšyja.
Drejka Mełarda ŭ novaj viersii budzie ahučvać Mark Chemił, viadomy pa roli Luka Skajuokiera ŭ «Zornych vojnach». Set Rohien stanie hołasam Zihzaha MakKraka i adnačasova vykanaŭčym pradziusaram prajekta. Husia Mełarda ahučyć Lizi Kapłan, a Daki — Lilimar. U ahučcy taksama ŭdzielničajuć Den Styviens, Ketryn Ńjutan i inšyja akciory.
Da pracy nad prajektam dałučyŭsia Ted Stoŭns, stvaralnik aryhinalnaha «Čornaha płašča». Jon budzie kansultantam novaj viersii, što pavinna dapamahčy zachavać suviaź z kłasičnym multsieryjałam.
Vytvorčaściu zajmajecca Disney Television Animation pry ŭdziele Point Grey Pictures, kampanii, źviazanaj z Setam Rohienam i Evanam Hołdbierham. Novy multsieryjał nie budzie niepasrednym praciaham aryhinalnych sieryj abo pierazapuščanych u 2017 hodzie «Kačynych historyj» — heta budzie asobnaja historyja.
Aryhinalny «Čorny płašč» vychodziŭ u 1991—1992 hadach i naličvaŭ 91 epizod. Paźniej hieroj znoŭ źjaviŭsia ŭ pierazapusku «Kačynych historyj». Ciapier Drejku Mełardu rychtujuć novyja pryhody ŭ sučasnym farmacie dla aŭdytoryi Disney+.
Ciapier čytajuć
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Minčanka Anhielina, jakaja prasiła ŭ Łukašenki kvateru za trojniu, atrymała žyllo
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»1111
Kamientary
Tolko śvistni on pojavitsia
Čiornyj płaŝ
Nu kak ot vinta
Čiornyj płaŝ.