«Jak pryručyć cmoka»: kultavy mult pieratvaryli ŭ kino 

U pačatku nulavych brytanka Kresida Koŭeł prydumała historyju pra chłopčyka Ikinha (aryhinalnaje imia Hiccup). Jon žyvie ŭ śviecie, padobnym da časoŭ skandynaŭskich vikinhaŭ, rychtujecca iści ŭ piraty i maryć pra toje, kab navučycca pieramahać cmokaŭ, što teraryzujuć jaho plemia.

U 2010-m studyja DreamWorks Animation pradstaviła mult-paŭnamietražku pa historyi Ikinha, paźniej było jašče dva vialikija multfilmy. I voś na dniach «Jak pryručyć cmoka» viarnuŭsia ŭ kino, ale ŭ novym farmacie.

Hetaje viartańnie pa-svojmu pradkazalnaje. Jašče ŭ nulavyja niemahčyma było ŭjavić sabie, što na ekranie źjaviacca realistyčnyja cmoki, pačvary ci inšyja mulciašnyja istoty, i tamu studyi nakštałt DreamWorks ci Disney raskazvali kazačnyja historyi zbolšaha praz animacyju.

Ale ciapier isnuje CGI, to-bok składanaja kampjutarnaja hrafika, jakaja pieratvaraje piksieli ŭ amal žyvuju istotu. Disney hetym užo daŭno karystajecca, i za apošnija hady z dapamohaj CGI vypuściŭ bahata rymiejkaŭ svaich kultavych animacyj: zhadajem «Aładzina», «Rusałačku» ci tych ža «Liła i Ściča», što jašče jość u prakacie. 

Ciapier i DreamWorks ustupaje ŭ hetuju hulniu.

Ich Ikinh — heta niazhrabny padletak, syn pravadyra plemieni, jaki maryć vyraści ŭ zabojcu cmokaŭ. Jon prydumlaje ŭłasnuju pryładu, jakaja musić źbivać latučaha cmoka, i navat traplaje ŭ samaha niezvyčajnaha ź ich, tak zvanuju Načnuju furyju. Na nastupny dzień Ikinh znachodzić padbitaha, ale jašče žyvoha cmoka ŭ lesie, nie moža rašycca jaho zabić i ŭ vyniku adpuskaje. 

Pavialičyć

Z taho času pačynajecca ich siabroŭstva. Jano, kaniečnie, nie spadabajecca starejšynam plemieni, jakija šmat hadoŭ žyvuć u stanie vajny z cmokami. A jašče ŭ filmie jość ramantyčnaja dynamika — za jaje adkazvajuć Ikinh i jaho advažnaja siabroŭka Astryd, jakaja našmat lepš daje rady składanym treniroŭkam.

Stužku zdymali ŭ malaŭničych miescach, vielmi darečnych dla takoj historyi. Heta Isłandyja ź jaje pryhožaj pryrodaj, takoj suvoraj, što zvyčajnyja škodniki nakštałt much u hetym śviecie nie pryžylisia — ich miescy zaniali cmoki. Jašče adna važnaja placoŭka — Novaja Ziełandyja, kraina, dzie jašče z časoŭ «Uładara piarścionkaŭ» ažyŭlajuć kinakazki. 

Što da akcioraŭ, vy možacie pabačyć znajomyja tvary. Pierš za ŭsio, heta brytaniec Džerard Batler, zorka stužak «300 spartancaŭ» i «Pryvid opiery». U multfilmach sieryi «Jak pryručyć cmoka» Batler ahučvaŭ baćku Ikinha, Stoika Mahutnaha. 

Rolu Astryd daručyli Nika Parkier. U apošnija hady dziaŭčynie šancuje na dobruju pracu, i heta nie tolki bujnaja rola u «Jak pryručyć cmoka»: Nika źniałasia ŭ pieršym siezonie kultavaha sieryjała «Apošnija z nas» i ŭ błakbastary «Brydžyt Džons: U zachapleńni ad chłapčuka».

«Jak pryručyć cmoka» — heta pierš za ŭsio historyja pra staleńnie. Ikinh šukaje svoj šlach i vučycca iści suprać voli baćki, jaki ŭžo zapłanavaŭ dla jaho budučyniu. U filmie navat jość svoj abrad inicyjacyi, kali padletak musić zabić svajho pieršaha cmoka. Na abrad źbirajecca ŭsio plemia, i heta jašče adzin elemient staleńnia — navučycca nie hladzieć na toje, što pra ciabie kažuć inšyja, navat kali ich šmat, a ty staiš adziny pierad svaim cmokam.

Pavialičyć

Jašče, kaniečnie, hety film — pryščepka ad ksienafobii dy strachu čužych. Baraćba vikinhaŭ sa strakatymi reptylijami i napady cmokaŭ u adkaz — nibyta mietafara padziełu na svaich i čužych, kali abodva baki znachodziacca ŭ kanflikcie prosta praz toje, što nie viedajuć adzin adnaho. Hety padzieł bačny i ŭ adnosinach u samim plemieni, dzie «svoj» — heta tolki toj, chto trymajecca vajaŭničych ideałaŭ. Ale Ikinh pieraadolvaje hety razryŭ, i šmat u čym heta atrymlivajecca dziakujučy siabroŭstvu — jašče adna pavučalnaja detal u stužcy.

Darosłym, adnak, film pra Ikinha i jaho siabra-cmoka moža padacca trochi zaciahnutym. Ekšn tut jość, ale nie samy vynachodlivy, chacia i pryhožy, bo niemahčyma sapsavać paloty nad skandynaŭskimi hornymi astravami.

Ź inšaha boku, kali chočacca ciopłaha, prostaha i sardečnaha kino, «Jak pryručyć cmoka» — vydatny vybar. Cudoŭnaja znachodka dla siamiejnaha pachodu ŭ kino.

• 4
• 0
• 0
• 0
• 0
• 0
• 0
• 1