Vyjšaŭ «Liła i Ścič» — na dziva kranalny film, jaki vybiŭsia ŭ top pa zborach u prakacie
Ciapier u biełaruskich kinateatrach pakazvajuć «Liła i Ściča». Dla studyi Disney hety film staŭ vialikim pośpiecham. Raskazvajem, jakoj atrymałasia stužka.
Disney umieła karystajecca čałaviečaj nastalhijaj. «Karol Leŭ», «Rusałačka», «Aładzin» — usie hetyja multfilmy 90-ch za apošnija niekalki hadoŭ byli pieraźniatyja z žyvymi akciorami ci ŭ styli realizmu. Kaniečnie, heta karystajecca pośpiecham: dzieci, jakija raśli ŭ 90-ja, ciapier pryvodziać užo svaich dziaciej u kino, kab pabačyć novyja viersii lubimych historyj. Ciapier studyja dabrałasia da «Liła i Ściča» — chita Disney ad 2002 hoda.
Jak i pieršaja stužka, ciapierašni film — heta historyja dziaŭčynki Liła, jakaja rodam z Havajaŭ. Liła ŭsiaho šeść hadoŭ, ale jana žyvie ŭ stanie pastajannaj traŭmy: jaje baćki pamierli, a starejšaja siastra Nani vidavočna nie daje rady vychavańniu małoj. U vyniku, zdajecca, usie nastroilisia suprać dziaŭčat: i sacyjalnyja słužby, i nastaŭniki Liła, i jaje ravieśnicy.
Liła prahnie, kab u jaje žyćci źjaviŭsia sapraŭdny siabar, i jaje žadańnie spraŭdžvajecca samym niezvyčajnym čynam. Dziaŭčynka znajomicca ź dziŭnaj błakitnaj istotaj, jakaja addalena nahadvaje ci to sabaku, ci to kaału. Heta vynik inšapłanietnaha hienietyčnaha ekśpierymientu pad nazvaj 626, stvoranaha dziela chaosu i razbureńniaŭ.
Istota źbiahaje na Ziamlu i pryčaplajecca da Liła, kab atrymać abaronu ad pieraślednikaŭ sa svajoj rodnaj płaniety, bo tyja nie majuć prava škodzić čałaviečym istotam. Liła daje ekśpierymientu 626 imia — Ścič. Jana pieravychoŭvaje Ściča ŭ dobraha i addanaha siabra, a toj ščyra pryviazvajecca da dziaŭčynki.
Pieršapačatkova płanavałasia vypuścić novy film nie ŭ kinateatrach, a na stryminhu Disney+. Ale paźniej Disney vyrašyŭ puścić stužku ŭ šyroki prakat, i nie praličyŭsia. U «Liła i Ściča» cudoŭnyja zbory — za dva tydni ŭ suśvietnym prakacie stužka zarabiła ŭžo 610 miljonaŭ dalaraŭ, i na siońnia heta treci pa zborach film 2025 hoda.
Kaniečnie, iści tudy varta nie tolki praz zbory. «Liła i Ścič» padydzie tym, chto fanacieŭ ad aryhinalnaha multfilma. Ale i tym, chto raniej nie čuŭ pra historyju, budzie cikava pahladzieć hetuju stužku razam ź dziećmi, tym bolš historyja Liła i jaje siabra bolš hłybokaja, čym moža padacca.
Pierš za ŭsio, «Liła i Ścič» — heta pryznańnie ŭ lubovi da Havajaŭ. Padziei adbyvajucca na vostravie Kaŭai, samym starym i zialonym z asnoŭnych Havajskich astravoŭ. Na im žyvie ŭsiaho 72 tysiačy čałaviek, i heta miesca ź niebyvałaj pryrodaj: tut jość hory, džunhli i vadaspady. A jašče tut vielmi pavažajuć havajskija tradycyi — śpievy, movu, havajski taniec chuła.
Ciapierašniuju stužku, adnak, vyrašyli źniać na bolš turystyčnym havajskim vostravie Aachu, ale miascovaj pryrody ŭ filmie ŭsio roŭna šmat. Jak i ŭ multfilmie, Liła vielmi lubić havajski taniec chuła, a ŭ stužcy hučyć havajskaja mova.
Dy i rola Liła dastałasia sapraŭdnaj havajskaj dziaŭčyncy — jaje hraje abajalnaja 7-hadovaja Maja Kieałocha. Što da jaje siabra Ściča: ekśpierymient 626, namalavany z dapamohaj kampjutarnaj hrafiki, atrymaŭsia vizualna jakasnym i dobra vyhladaje razam z žyvymi akciorami. Ciopłuju i kranalnuju atmaśfieru filma dapaŭniajuć płaścinki z zapisami Preśli, ad jakoha fanacieje maleńkaja Liła.
Samaje važnaje słova dla filma taksama hučyć pa-havajsku. Heta ohana, to-bok siamja. U stužcy kažuć pra toje, što siamja — heta kali nikoha nie pakidajuć i nie zabyvajuć. Historyja Liła i Ściča jakraz pra toje, jak stvarajucca siemji nie pa kryvi, a pa duchu: siastra zamianiaje mamu, a inšapłaniecianin znachodzić svaju «achanu» ŭ čałaviečaj siamji na Havajach.
«Liła i Ścič» — heta jašče i historyja pra alternatyvu hvałtu. Ścič stvorany jak zbroja, a Liła hatovaja razzłavacca na ŭvieś śviet, jaki jaje nie razumieje, ale razam jany vyratoŭvajuć adno adnaho i pieravodziać na bok śviatła. Tym časam Nani, starejšaja siastra Liła, zmahajecca za jaje z sacyjalnymi słužbami, ale joj ciažka, i dziaržaŭnaja sistema nie dapamahaje zachavać siamju. Vyratoŭvaje tolki taja samaja «achana», siamja pa duchu.
«Liła i Ścič» — mabyć, najlepšy film dla siamiejnaha prahladu, jaki ciapier jość u biełaruskich kinateatrach. Tam nie budzie dysnejeŭskich prynces i pałacaŭ, zatoje jość dušeŭnaja historyja, nie tak užo i adarvanaja ad sučasnych realij — nu, kali nie ličyć błakitnaha inšapłaniecianina z vostrymi zubami.
«Naša Niva» — bastyjon biełaruščyny
PADTRYMAĆCiapier čytajuć
Top sučasnych elitnych žyllovych kompleksaŭ Minska. Kvadrat tam kaštuje da 11 000 dalaraŭ1
Kamientary