Pasoł Ukrainy pa pytańniach Biełarusi: Pazicyja Cichanoŭskaj dakładna nie pacyfisckaja

— Spadar pasoł, vy ŭ intervju kazali, što vas pryznačyli na pasadu z-za vašaj ekśpiertyzy pa Biełarusi. A jak vy naohuł adreahavali na hetaje pryznačeńnie?

— Nasamreč z samaha pačatku było cikava. Spačatku ž nie ahučvali, pra jakuju mienavita pasadu kankretna idzie havorka. Chutčej kazali, što jość kirunak, pa jakim patrebny śpiecyjalist. Nasamreč ja nie viedaŭ, ci budu pracavać u štacie, ci mianie zaprosiać u jakaści kansultanta abo daradcy na hramadskich pačatkach. Potym stała zrazumieła, što nieabchodny ŭdzieł mienavita ŭ naładžvańni kamunikacyi ź biełaruskimi demsiłami.

— Jak prajšoŭ praces vašaha pryznačeńnia?

— Było sumoŭje z namieśnikam ministra zamiežnych spraŭ Jaŭhienam Pierabijnasam, dalej z samim kiraŭnikom MZS. Potym razam z Andrejem Sibiham było sumoŭje ŭ Ofisie prezidenta na Bankavaj. Tam my ŭtroch praviali sustreču, usio abmierkavali. I, narešcie, paśla ŭsiaho ŭžo prezident ź ministram prymali rašeńnie ab pryznačeńni.

Pavialičyć

— Siarod vašych zadač jak pasła pa asablivych daručeńniach — praca ź biełaruskaj apazicyjaj, dapamoha cyvilnym biełarusam i biełaruskim vajskoŭcam, jakija vajujuć za Ukrainu. Pačniom z kanca: kolki biełarusaŭ siońnia vajuje na našym baku frontu?

— Hetaja infarmacyja nie padlahaje razhałošvańniu. Kali chočacie daviedacca — rabicie zapyt u Minabarony. 

— A što kali paviarnuć pytańnie inšym bokam i spytać vas, kolki biełarusaŭ vajuje za Rasiju?

— Voś hetaje pytańnie nam viadomaje nie ŭ apošniuju čarhu dziakujučy vizitu Śviatłany Cichanoŭskaj. U miežach hetaha vizitu była sustreča z kiraŭnictvam Kaardynacyjnaha štaba pa pytańniach abychodžańnia z vajennapałonnymi. Pakolki struktura ciesna źviazanaja z HUR, to ź ich boku byli ahučanyja ličby. Kali ja nie pamylajusia, heta kala 2800 čałaviek. 400 abo bolš ź ich užo pakinuli hetuju ziamlu, pierajšoŭšy ŭ inšy śviet dziakujučy ŭkrainskim voinam.

— Jany ŭsie raskidanyja pa roznych padraździaleńniach, ci jość u ich nacyjanalnyja farmavańni, naprykład jak bataljon imia Kastusia Kalinoŭskaha ŭ nas?

— U ich niama nacyjanalnaha padraździaleńnia. Vy musicie razumieć, kali pamiž Rasijaj i Biełaruśsiu isnuje taki režym, jak «Sajuznaja dziaržava». U miežach hetaha nivodzin narod nie moža być vyłučany. Heta naohuł vielmi charakterna dla rasijan. Jany nivodnaha naroda asobna ad siabie nie bačać. Tut uźnikaje vialikaje pytańnie, a što heta takoje — ruski narod? Naohuł niejkaje mifičnaje paniaćcie.

Tam ža jość ceły šerah zavajavanych narodaŭ, jakija žyvuć na terytoryi ŭtvareńnia, što zaraz nazyvajecca Rasijskaj Fiederacyjaj. Bolšaść ź ich naohuł nie maje statusu. Prydušanyja, kałanizavanyja.

Liču, što łahičnym raźvićciom budzie frahmientacyja hetych terytoryj — zvyčajnaja łohika raspadu impieryj. Bo RF źjaŭlajecca fiederacyjaj tolki na papiery, kali nasamreč heta impierskaje ŭtvareńnie.

Pavialičyć

— Jašče adnoj vašaj zadačaj źjaŭlajecca dapamoha cyvilnym biełarusam. U intervju našym biełaruskim kaleham vy zhadvali pra razbłakavańnie rachunkaŭ biełarusaŭ. Što, maŭlaŭ, tut jość składanaści z-za ŭniasieńnia biełarusaŭ, naroŭni z rasijanami, u čorny śpis ludziej, jakija padtrymlivajuć ahresiju. Jak my hetaje pytańnie vyrašajem? Ujavicie: ja biełarus, jaki pryjšoŭ da vas pa dapamohu, i kažu: «Spadar Jarasłaŭ, dapamažycie mnie z rachunkam».

— Rachunki razbłakujuć i adkryvajuć, kali ŭ vas, naprykład, jość vajskovy bilet. Vam tady adkryjuć rachunak. Abo kali jość paśviedčańnie na pastajannaje ci časovaje žycharstva. Dokaz taho, što vy znachodziciesia na terytoryi Ukrainy lehalna. Treba prajści niekatoryja pracedury, pravierki.

Heta zroblena dla praduchileńnia traplańnia srodkaŭ ukraincaŭ u ruki ahresara ci suahresara. Ja dumaju, što z časam hetaje pytańnie budzie niejak vyrašana. Tyja biełarusy, jakija zakonna znachodziacca va Ukrainie i vydatkoŭvajuć hrošy na terytoryi našaj dziaržavy, nie pavinny adčuvać prablem z karystańniem ułasnymi srodkami.

— Moža być, tady varta inicyjavać niejki zakonaprajekt u hetym kantekście? Kab cyvilnym biełarusam nie davodziłasia pastajanna chadzić z dakumientami… Bo časam baču ŭ sacsietkach, jak cyvilnyja hramadzianie Biełarusi kažuć, što žyvuć va Ukrainie i ŭsio kłasna. Voś tolki adna biada: nie dajuć rachunak u banku adkryć…

— Heta nie zadača MZS, ale my budziem havaryć z nardepami. Jany hetaje pytańnie taksama vyvučajuć. Zaležyć taksama ad pazicyi Nacbanka. Šmat uzroŭniaŭ maje hetaje pytańnie. U tym liku i ŭzrovień urada.

— Vy taksama kazali pra płany stvaryć mižviedamasnuju kaardynacyjnuju hrupu biełarusaŭ va Ukrainie. Chto ŭ jaje ŭvojdzie pa abodva baki i kali hetuju hrupu płanujuć stvaryć?

— Mahčyma, budzie stvorana vialikaja kaardynacyjnaja hrupa z udziełam ukrainskaha boku i biełaruskich demsił. Ja nie prychilnik stvareńnia farmalnych orhanaŭ, jakija isnujuć dziela samoha isnavańnia.

Kali kazać pa fakcie, paśla vizitu Śviatłany Cichanoŭskaj u nas užo ŭstalavalisia narmalnyja kamunikacyi z APK, Ofisam Cichanoŭskaj, Paŭłam Łatuškam i jaho NAU, Biełpołam, jakija nakiroŭvajuć svaje zapyty na kamunikacyi pa tych ci inšych pytańniach, a taksama prapanovy pa sankcyjach, prablemnych pytańniach biełarusaŭ.

Jano ŭsio ściakajecca da mianie, a potym my abmiarkoŭvajem heta z adpaviednymi orhanami. Niešta z hetaha tyčycca śfiery biaśpieki, mihracyjnaj słužby. Heta taki ŭkrainska-biełaruski farmat.

Jašče jość mižviedamasny, čysta ŭkrainski farmat. Jość nieabchodnaść abmierkavać kankretna, jak možna vyrašyć pytańnie praterminavanych dakumientaŭ abo paśviedčańniaŭ na pastajannaje žycharstva hramadzian zamiežnych dziaržaŭ, jakija pražyvajuć tut i cikaviacca Ukrainaj. U ich lik uvachodziać i biełaruskija dobraachvotniki, i etničnyja biełarusy, jakija doŭhi čas žyvuć na našaj terytoryi.

Pavialičyć

— Palitołah Jaŭhien Mahda skazaŭ u adnym z efiraŭ, što Cichanoŭskaja pa vynikach vizitu ŭ Kijeŭ mahła b spryjać rekrutynhu biełarusaŭ va ŭkrainskuju armiju, naprykład. To-bok zrabić niešta bolš adčuvalnaje, čym dekłaracyi i zajavy va ŭkrainskaj stalicy. Ci jana ŭžo heta robić? Što vy skažacie naohuł na słovy spadara Jaŭhiena?

— Z boku asabista Śviatłany Cichanoŭskaj i jaje kamandy niama nijakaha supraćdziejańnia pryciahnieńniu biełarusaŭ u naša vojska. Farmavać vajskovyja padraździaleńni — heta nie ich, a naša zadača. Było b dobra, kali b padtrymka Ukrainy z boku Śviatłany transfarmavałasia ŭ sadziejničańnie rekrutynhu ŭ naša vojska.

Nakolki mnie viadoma, Śviatłana z asabistych srodkaŭ danacić na USU. U Varšavie jana prymała ŭdzieł u treninhu pa taktyčnaj miedycynie. Ich kamandaj była sabrana i pieradadziena va Ukrainu nie adna partyja dapamohi. Viadoma, heta dapamoha nie ŭzroŭniu Himars ci Bayraktar. Ale peŭnuju dapamohu pieradajuć.

Uspaminajuć, što ŭ minułym i pazaminułym hodzie na forumie Astrožskich struktury biełaruskich demsił pieradavali dobraachvotnikam aŭtatranspart.

Mahčyma, vizit Cichanoŭskaj natchnić niejkuju častku biełaruskaj demakratyčnaj supolnaści padtrymlivać materyjalna biełaruskich dobraachvotnikaŭ na froncie va Ukrainie. Ja budu hetamu rady.

— To-bok u asiarodździ biełaruskaj palityčnaj apazicyi siońnia adsutničaje hety pacyfizm, ułaścivy pieravažnaj bolšaści tak zvanych rasijskich libierałaŭ?

— Ciapierašniaja pazicyja Cichanoŭskaj dakładna nie pacyfisckaja. U 2020—2022 hadach jana była krychu adchilenaja ŭ adnosinach da vajny va Ukrainie, ale paśla šyrokamaštabnaha ŭvarvańnia my bačym, što Śviatłana Cichanoŭskaja prajšła šlach ad humanitarnaha ŭdziełu i prajaŭ salidarnaści da pryznańnia, što hetaja vajna źjaŭlajecca faktaram rehijanalnaj biaśpieki.

U jaje jość uśviedamleńnie, što adnym sa šlachoŭ vyzvaleńnia Biełarusi źjaŭlajecca ŭzbrojeny šlach. Padčas vizitu ŭ muziej Druhoj suśvietnaj vajny Cichanoŭskaja adznačyła ŭznaharodami šerah ukrainskich i biełaruskich dziejačaŭ, u tym liku dobraachvotnikaŭ.

Uznaharodziła miedalami pradstaŭnikoŭ BVA (Biełaruskaj Vyzvalenčaj Armii). My bačyli členaŭ hetaha farmavańnia pobač ź joj. Hetaja arhanizacyja sychodzić karaniami jašče ŭ časy BNR. I razam jany ŭ budučyni mohuć być mocnymi sajuźnikami Ukrainy.

— Raskažycie, jak rychtavaŭsia hety vizit. Bo my čuli słovy Łukašenki pra hatoŭnaść sustrecca z prezidentam Zialenskim, i voś nieŭzabavie ŭ našu stalicu prybyvaje Cichanoŭskaja. Pralicie trochi śviatła na praces padrychtoŭki jaje pryjezdu.

— Usio adbyłosia nie imhnienna. Prezident Ukrainy sustreŭsia sa Śviatłanaj jašče 25 studzienia ŭ Vilni. Tam jon jaje ŭ Kijeŭ i zaprasiŭ.

Zatym pačałasia praca pa padrychtoŭcy vizitu. Treba było zrazumieć ukrainskim uładam, jakija pytańni buduć abmiarkoŭvacca, z kim jany buduć sustrakacca, u jakim farmacie.

Adnoj z umoŭ dla taho, kab adbyŭsia vizit, było pryznačeńnie kahości ŭpaŭnavažanaha pa pracy ź biełaruskimi demsiłami. Znoŭ ža, kab nie było vizitu dziela vizitu. Umoŭna, Śviatłana Cichanoŭskaja mahła pryjechać u sakaviku. Taki varyjant byŭ. Ale pra što b jana tady havaryła? Sustreča nasiła b u hetym vypadku bolš simvaličny charaktar. U MZS nie było ŭpaŭnavažanaj asoby pa kamunikacyjach u toj čas.

Vielmi ŭdała supała, što vizit, jaki rychtavaŭsia, prypaŭ jakraz na tyja vykazvańni z boku biełaruskaha dziejnaha režymu. Naturalna, vizit Cichanoŭskaj nie aznačaje, što my pryznajem jaje prezidentam Biełarusi. Dla nas jana kiraŭnik Abjadnanaha pierachodnaha kabinieta i lidar biełaruskich demakratyčnych sił.

Jana nie manapalist: jość i inšyja hrupy — u ich taksama jość svaje pohlady. Zaraz u ich tam užo 4‑y sklikańnie Kaardynacyjnaha savieta pačynaje pracavać.

Dla nas važna, kab jany nie byli antyŭkrainskimi. A Cichanoŭskaja ŭznačalvaje najbolš strukturavanaje farmavańnie biełaruskich demsił i maje pryznańnie ŭ zachodnim śviecie.

— Oho, jany jašče i hetu Radu pa sklikańniach padzialili? Paŭnavartasny farmat dziaržavy…

— Tak, tam jość protaparłamient, prataŭrad. Z kamandaj Cichanoŭskaj jakraz z-za hetaha i pažadana kamunikavać. U vypadku źjaŭleńnia akna mahčymaściej dla tranzitu ŭłady stanovicca zrazumieła, z kim pracavać i kaho padtrymlivać. Jakija-niebudź ujaŭnyja, amorfnyja siły — heta zusim inšaje. Dziaržava tak nie pracuje. Patrebny protadziaržaŭnyja instytuty.

— Viedajecie, vy kažacie pra najaŭnaść alternatyŭnych centraŭ ciažaru siarod biełaruskaj apazicyi. Nie chočacca, kab jany pavodzili siabie jak typovyja rasijskija libierały, jakija majuć kožny svaju pryncypovuju pazicyju i nie mohuć u vyniku nijak pryjści da zhody. Kab nie było tak, što adny vystupajuć za vajenny scenar zrynańnia Łukašenki, inšyja kažuć: nie, treba dypłamatyju vyłučać na piaredni płan. Treba ž, kab pamiž imi byŭ niejki kansensus…

— Dla demakratyčnych asiarodkaŭ mieć roznaje mierkavańnie — narmalnaja źjava.

Nasamreč, ja nie vielmi paraŭnoŭvaŭ by biełaruskija demakratyčnyja siły z rasijskimi. Demakratyčnyja siły Biełarusi pamiatajuć 2020 hod i skradzienyja vyniki vybaraŭ, u jakich udzielničała Cichanoŭskaja. U rasijan takoj postaci niama. Niama čałavieka, jaki prajšoŭ vybary i mieŭ padtrymku vialikaj kolkaści ludziej.

Kali b u svoj čas nie byŭ zabity kadyraŭcami Niamcoŭ, to niejkaja nadzieja dla rasijskich demakrataŭ była b. Abo chacia b toj ža Navalny. A pakolki ni adnaho, ni druhoha ŭžo niama ŭ śviecie žyvych, to rasijskija libierały ciapier razroźnienyja.

— Davajcie padzielim pa punktach, u čym budzie zaklučacca vaša praca mienavita ź biełaruskaj palityčnaj apazicyjaj?

— Tut nie varta pieraaceńvać maju rolu, bo ja ž dziaržaŭny słužboviec u dypłamatyčnym viedamstvie. Biełaruskija demakratyčnyja siły byli i buduć. I, narešcie, zamieniać saboj aŭtarytarny režym u sučasnaj Biełarusi.

Maja rola — zabiaśpiečvać intaresy Ukrainy ŭ hetym pracesie, spryjać kaardynacyi namahańniaŭ ź mižnarodnymi partniorami.

Dla nas važna, kab z paŭnočnaha boku była suvierennaja, svabodnaja, niezaležnaja Biełaruś, jakaja nie stvaraje nam prablem.

— Ci jość zaraz na biełaruskaj terytoryi rasijskija vajskoŭcy? Kolki ich tam i čym jany zajmajucca?

— Jość. Kali ja nie pamylajusia, tam funkcyjanujuć dźvie vialikija bazy SPA. Jość baza «Arešnika», jakuju zaraz budujuć. Bolš za 2 tysiačy rasijskich vajennasłužačych pastajanna znachodziacca na terytoryi Biełarusi. Rehularna prachodziać ratacyju.

U miežach «Sajuznaj dziaržavy» pamiž Maskvoj i Minskam jość damoŭlenaść ab sumiesnaj supraćpavietranaj abaronie. Jakraz joju i zajmajucca rasijanie. Ažyćciaŭlajuć manitorynh biełaruskaj pavietranaj prastory.

— Kiraŭnik CPD Andrej Kavalenka kaža, što ŭsie zajavy Alaksandra Łukašenki pra kropkavuju mabilizacyju i padrychtoŭku da vajny nie niasuć pahrozy. Jak jakasna i kolkasna źmianiłasia biełaruskaja armija ŭ hety momant? Ci jość tam u ich niejkaja realnaja dynamika?

— Tam pastajanna prachodziać vajennyja vučeńni i acenka bojehatoŭnaści. Padčas hetych vučeńniaŭ uličvajuć rasijski dośvied u vajnie z nami.

My ŭsie pamiatajem čas, kali da ich internavali vahnieraŭcaŭ, kab apošnija nie panieśli pakarańnie za bunt Pryhožyna. U Biełarusi jany pacichu intehravalisia ŭ siłavyja struktury Respubliki Biełaruś. U ahulnaj składanaści ich tam naličvajecca bolš za sotniu. Jany atrymali biełaruskaje hramadzianstva, novyja imiony. Słužać pieravažna va ŭnutranych vojskach.

Vojska biełaruskaja dyktatura transfarmuje. Pierapadzialili svaje vajskovyja akruhi. Stvaryli novuju Paŭdniovuju akruhu, jakoj raniej nie było. Zrazumieła, što jany hieahrafična nacelenyja na nas.

Raspracavana cełaja sistema novych centraŭ śpiecpryznačeńnia ŭ miežach unutranych vojskaŭ. Centraŭ, zaklikanych zmahacca z dyviersijnymi hrupami i partyzanskimi ruchami. A taksama nakiravanych na padaŭleńnie patencyjnaha ŭnutranaha hramadskaha supracivu režymu.

Zajava pra kropkavuju mabilizacyju sapraŭdy nie niasie nam pahrozy. Heta zajava pa vynikach ich pravierak, pakolki jany vyjavili niedachopy ŭ šerahu vajskovych čaściej.

— Niedabor asabovaha składu?

— Tak, ja tak razumieju, biahučaja kolkaść nie zusim adpaviadała tym zadačam, jakija stavić Minsk pierad saboj u miežach vajennaj palityki. U ich štohod prachodzić pryzyŭ aficeraŭ zapasu. Struktura vajskovych čaściej jašče maje savieckuju spadčynu, ale ŭžo ŭličvaje i sučasnyja tendencyi. Ich bryhady chutka mohuć vyraści ŭ maštabach dyvizij.

U minułym hodzie Biełaruś atrymała z Rasii novyja samaloty. A pierad hetym — «Pałaniezy», jakija vyrablajucca sumiesna z Kitajem. Taksama aktyŭna juzajuć bieśpiłotniki.

— Jakija bieśpiłotniki? U rasijan biaruć ci jość niejkija ŭłasnyja raspracoŭki?

— Jość u ich i svaje raspracoŭki. Vypraboŭvajuć rasijskija i zakuplajuć kitajskija.

— Dyk kolki biełaruski suahresar moža dazvolić sabie pryzvać u armiju ludziej siońnia? Nakolki naohuł moža być kolkasnaj armija Łukašenki?

— Zaraz u ich kolkaść vajskoŭcaŭ składaje 65—70 tysiač. Pry hetym jany mohuć adnosna chutka naraścić da 300—350 tysiač.

— Ci viadoma vam što-niebudź pra departacyju ŭkrainskich dziaciej z akupavanych terytoryj praz terytoryju Biełarusi? Kolki našych dziaciej tam jość? Ci ŭdałosia kaho-niebudź ź ich viarnuć?

— Pytańnie abmiarkoŭvałasia na sustrečy Cichanoŭskaj i Andreja Sibihi. Taksama heta abmiarkoŭvałasia z Uładzimiram Zielenskim. My zacikaŭleny ŭ atrymańni infarmacyi pra ŭkrainskich dziaciej, jakaja moža być u biełaruskich demakratyčnych sił. Abiacali nam dać hetuju infarmacyju. Budzie kanfierencyja pa hetym pytańni ŭ Kanadzie.

Pamiž nami i biełaruskimi demsiłami jość damoŭlenaść, što apošnija buduć vystupać na našym baku, kali havorka pojdzie pra vykradańnie našych dziaciej.

— Režym Łukašenki aktyŭna zarablaje na kradzienym ukrainskim zbožžy. Što my možam zrabić jak dziaržava, kab spynić heta ci chacia b pamienšyć abjomy złačynnych zarobkaŭ biełaruskaha dyktatara?

— Palityčnaha ŭpłyvu my akazać nie možam nijakaha. Režym Łukašenki absalutna niesamastojny, vy viedajecie. Na mižnarodnaj arenie hetaja dziaržava naminalna asobnaja, a pa fakcie jana kantralujecca Rasijskaj Fiederacyjaj. Tamu lepšy recept tut — źniščać i dalej rasijskuju łahistyku. Tolki takim čynam možna spynić tavarapłyń z časova akupavanych terytoryj u Biełaruś i nazad.

— Śviatłana Cichanoŭskaja ŭ intervju skazała, što ŭ biełaruskich partyzan jość dobryja krynicy infarmacyi, jakoj jany mahli b pry nieabchodnaści padzialicca z nami. Našy adpaviednyja słužby supracoŭničajuć u hetym płanie ź biełaruskim supracivam?

— Kantakty byli, pačynajučy z 2022 hoda. Ja byŭ na pres-kanfierencyi biełaruskich kibierpartyzan va Ukrainie. Užo tady, u 2022—2023 hadach, havaryli pra isnyja kantakty.

— U tym ža intervju Cichanoŭskaja vykarystała termin «brackija narody», kažučy pra suviazi biełarusaŭ z ukraincami. Adzin bracki narod nam užo prablem narabiŭ. Na vašu dumku, ci varta nam hladzieć na biełarusaŭ praz hetuju «brackuju» optyku Cichanoŭskaj?

— Kali my analizujem z palityka-ideałahičnaha punktu hledžańnia, to hety termin užo trochi dyskredytavany. Z boku biełarusaŭ časam dachodzić da śpiekulacyj, što Ukraina svajoj aktyŭnaściu zamachvajecca na rolu starejšaha brata. Dla nas heta vyhladaje śmiešna. Nam lepš być dobrymi susiedziami, čym bratami.

— Jak da Śviatłany Cichanoŭskaj staviacca ŭ biełaruskim vajskova-dobraachvotnickim asiarodździ?

— Častka kalinoŭcaŭ jaje padtrymlivaje. My viedajem, što Vadzim Kabančuk, jaki niadaŭna vystupaŭ namieśnikam kamandzira pałka, u žniŭni 2024 hoda zaniaŭ pasadu ŭ Pierachodnym kabiniecie. Jość šerah vieteranaŭ, jakija pajšli ŭ Kaardynacyjny saviet.

Jašče častka kalinoŭcaŭ niehatyŭna stavicca da postaci Cichanoŭskaj, ale hatovaja da kanstruktyŭnaha dyjałohu. Biełaruski Dobraachvotnicki Korpus jaje absalutna nie ŭsprymaje.

U toj ža čas dobraachvotniki pierš za ŭsio źjaŭlajucca vajennasłužačymi. Vykazvańni pra palityčnyja pohlady niehatyŭna ŭpłyvajuć na ich vajennuju spravu. Kali byli vybary ŭ Kaardynacyjny saviet 2 hady tamu, to naša vajskovaje kiraŭnictva nie ŭzhadniła ŭdzieł biełarusaŭ u palityčnych pracesach. I heta łahična. Dobraachvotnik na čas kantrakta pavinien vykonvać zahady kamandavańnia.

— Jak by vy acanili nastroi ŭ biełaruskim hramadstvie nakont vajny? 

— Pieravažnaja bolšaść biełarusaŭ pa-raniejšamu zastajucca na pazicyjach pacyfizmu. Łukašenka heta zapisvaje sabie ŭ zdabytki. Kaža, što heta tolki dziakujučy jamu Biełaruś naŭprost nie ŭstupiła ŭ vajnu.

Mianie niepakoić, što z hadami staŭleńnie da nas i našaj dziaržavy transfarmujecca. Źmieny adbyvajucca pad upłyvam prapahandy.

— Usio ž taki vada kamień točyć?

— Tak. Heta nastupstvy pracy jak rasijskaj, tak i biełaruskaj režymnaj prapahandy. Zaraz my ź biełarusami nijak nie kamunikujem. U adroźnieńnie ad časoŭ, kali biełarusy jeździli praz našu terytoryju na mora.

— Biełaruś źjaŭlajecca suahresaram u hetaj vajnie. Ci budzie jana płacić reparacyi naroŭni z Rasijaj paśla našaj pieramohi?

— Niaprostaje pytańnie. Peŭnuju kampiensacyju varta praduhledzieć. Vielmi mnohaje zaležyć ad taho, ź jakoj Biełaruśsiu my budziem mieć spravu paśla vajny.

Chacia my jašče i nie viedajem, jak vajna skončycca. U nas zaraz infarmacyjnaje napružańnie ź Biełaruśsiu. A što kali adbudziecca realnaje supraćstajańnie, i my voźmiem satysfakcyju za košt źniščanych abjektaŭ VPK?

— VPK my źniščajem i na terytoryi Rasii, ale heta nie skasoŭvaje taho, što jana budzie płacić nam reparacyi. Prosta, razumiejecie, ja zadaŭ hetaje pytańnie, tamu što tyja ž rasijanie ad reparacyj usialak adchryščvajucca. Uklučajuć adrazu zadniuju, kažučy: «E, nie. Heta ŭsio Pucin, my tut ni pry čym. Jakija mohuć być havorki pra reparacyi?» Padazraju, što biełarusy dumajuć padobna. Tamu ŭźnikaje pytańnie: spadary, chto nam zapłacić?

— Na siońnia ŭ nas paŭnavartasnaja kanviencyjnaja vajna idzie tolki z Rasijaj. Biełaruś źjaŭlajecca suahresaram, ale nie krainaj-ahresaram.

Šmat što budzie zaležyć ad jaje statusu ŭ kancy vajny. I, viadoma, mižnarodnaj abstanoŭki.

• 1
• 0
• 0
• 1
• 0
• 0
• 0
• 1