Brytanija daterminova vypuskaje tysiačy źniavolenych. Polšča hetamu nie radaja
Z 1 kastryčnika Vialikabrytanija pačynaje daterminova vypuskać tysiačy asudžanych, kab razhruzić pierapoŭnienyja turmy. Častku zamiežnikaŭ paśla hetaha departujuć na radzimu. Palaki składajuć najbujniejšuju hrupu siarod zamiežnych źniavolenych u Anhlii i Uelsie, ale, jak piša Rzeczpospolita, u Varšavie pakul nie viedajuć, ni kolki čałaviek vierniecca, ni za jakija złačynstvy jany adbyvali pakarańnie.
Brytanskija turmy sutyknulisia z vostrym niedachopam miescaŭ. Pavodle źviestak za červień hetaha hoda, za kratami znachodzilisia kala 86 tysiač čałaviek. Kab razhruzić pienitencyjarnuju sistemu, ułady vyrašyli paetapna daterminova vyzvalić častku asudžanych.
Pieršyja 700 čałaviek vyjduć na volu ŭžo 1 kastryčnika. Zatym budzie jašče niekalki etapaŭ vyzvaleńnia. Usiaho da červienia nastupnaha hoda turmy daterminova pakinuć kala 4500 asudžanych.
Takuju mahčymaść praduhledžvaje pryniaty ŭ Vialikabrytanii Zakon ab pryznačeńni pakarańniaŭ 2026 hoda (Sentencing Act 2026). U niekatorych vypadkach źniavolenyja zmohuć vyjści na volu paśla adbyćcia ŭsiaho traciny pryznačanaha terminu.
Prahrama raspaŭsiudžvajecca ŭ tym liku na asudžanych za kradziažy, uzłomy, rabavańni, handal narkotykami, źbićcio i machlarstva. Pieršapačatkova śpis mierkavałasia zrabić šyrejšym, ale paśla krytyki z prahramy vyklučyli asudžanych za šerah ciažkich złačynstvaŭ, u tym liku zabojstvy i zhvałtavańni.
Siarod tych, kaho vyzvalać daterminova, buduć i zamiežniki. Kali jany nie majuć brytanskaha hramadzianstva, paśla vychadu z turmy ich mohuć departavać u krainy pachodžańnia.
Čamu heta stała prablemaj dla Polščy
Rašeńnie asabliva aktualnaje dla Polščy. Pavodle brytanskaha Ministerstva justycyi, na kaniec sakavika palaki składali 7% z prykładna 6500 zamiežnikaŭ u turmach Anhlii i Uelsa. Heta najbujniejšaja hrupa. Na druhim miescy rumyny.
Pry hetym Varšava nie viedaje, kolki palakaŭ trapić pad prahramu, chto mienavita vierniecca i za jakija złačynstvy hetyja ludzi byli asudžanyja. Polskaje MUS paviedamiła, što śpisu ad brytanskaha boku pakul nie atrymała. Niama takoj infarmacyi i ŭ Ministerstva justycyi.
Paśla departacyi hetyja ludzi viernucca na radzimu jak svabodnyja hramadzianie. Pry hetym častka asudžanych, jakija zastanucca ŭ Vialikabrytanii, paśla daterminovaha vyzvaleńnia budzie adbyvać reštu pakarańnia pad nahladam.
U polskim MUS tłumačać, što Pamiežnaja słužba zmoža pryniać miery ŭ dačynieńni da kankretnaha čałavieka tolki pry najaŭnaści adpaviednaha zapisu ŭ jaje rejestry.
Polskija ekśpierty i apazicyjnyja palityki, jakich apytała Rzeczpospolita, krytykujuć urad za toje, što toj nie prajaviŭ inicyjatyvu i nie zapytaŭ u Łondana nieabchodnyja źviestki. Jany ličać, što polskim słužbam varta zahadzia viedać, chto vierniecca, za što byŭ asudžany i jakuju častku pakarańnia paśpieŭ adbyć. Asablivaj uvahi patrabavać recydyvisty i inšyja składanyja vypadki. Tym bolš, što ŭ krainie nazirajecca rost kolkaści paŭtornych złačynstvaŭ. Ci stanuć vyklučeńniem tyja, chto daterminova vyjdzie z brytanskich turmaŭ i vierniecca ŭ krainu, pakul nieviadoma.
Kamientary
Nie tolki vam ukraincaŭ dadomu departavać za kancerty Karža.