«Niachaj za zachoŭvańnie praduktaŭ płaciać kramy». Biełarusy raskazali, na čym i jak aščadžajuć
Ad jakich vydatkaŭ možna lohka admovicca, na čym realna aščadzić, a za što hrošy vykładvajucca biez ahavorak, i nie važna, pra jakuju sumu idzie havorka? Vydańnie Myfin spytała pra heta ŭ svaich čytačoŭ, jakija padzialilisia svaim vopytam raźmierkavańnia finansaŭ.
«Niachaj za zachoŭvańnie praduktaŭ płaciać kramy»
Uładzimir, 58 hadoŭ, supracoŭnik pryvatnaha pradpryjemstva
«Uzrovień dachodaŭ u mianie nievysoki, tamu žyvu pa srodkach. Majučy aŭtamabil, u miežach horada starajusia pieramiaščacca na hramadskim transparcie. Nie rablu zapasaŭ ježy, kuplaju ŭsio tolki samaje śviežaje.
U mianie navat chaładzilnika niama, kab ježu składavać. Vyrašyŭ dla siabie, što niachaj za zachoŭvańnie praduktaŭ płaciać kramy. Plus takoha padychodu ŭ tym, što ja, jak minimum, ekanomlu na elektraenierhii. Uzimku, darečy, mianie vyručaje «saviecki chaładzilnik» — niša pad aknom, jakaja jość u bolšaści chruščovak.
U racyjonie ja pastajanna vykarystoŭvaju miasa ptuški i rybu, zaŭsiody biaru vielmi šmat harodniny. Na śniadanak u mianie tradycyjnaja jaješnia na cybulnaj «padušcy», na abied i viačeru mahu pryhatavać harnir ź miasam i sałatam. Cukar praktyčna nie ŭžyvaju, mahu dazvolić sabie trochi dobraha ałkaholu.
Hatuju sam — navučyŭsia i vielmi hetym zadavoleny. Darečy, pry vybary praduktaŭ vykarystoŭvaju formułu, jakoj sa mnoj kaliści padzialiŭsia adzin vielmi dobry čałaviek. Jana havoryć, što spačatku treba vyznačyć u vybranaj nišy samy tanny i samy darahi tavar, a potym kuplać toj, jaki budzie kaštavać trochi daražej, čym samy tanny.
Na adzieńnie zaraz ja praktyčna nie vydatkoŭvaju, u mianie ŭsio jość. Chiba što abutak čas ad času davodzicca kuplać. Voś niadaŭna nabyŭ skuranyja tufli ŭ «Miehatopie» na akcyi ŭsiaho za 69 rubloŭ, mianie heta cana całkam zadavalniaje.
Adzinaje, za što hatovy płacić biez ahavorak i poŭny košt, dyk heta za jakasnuju turystyčnuju ekipiroŭku. Plus ja zachaplajusia viełaturyzmam i nie aščadžaju na zapčastkach dla rovara, adno siadło da jakoha kaštuje 100 jeŭra.
Pakolki ja nie amatar bałbatać pa telefonie, to ŭ apieratara Life, naprykład, karystajusia bazavym taryfam, jaki mnie abychodzicca 8 rubloŭ na miesiac. Asnoŭny numar u mianie ŭvohule pryviazany da MTS z taryfam «Blizki» pa 68 kapiejek na miesiac. Pa hetym numary ja nie telefanuju, a tolki prymaju ŭvachodnyja.
Što tyčycca chatniaha internetu, to ja vykarystoŭvaju byfly i kožny hod pry pierazaklučeńni damovy atrymlivaju na hod źnižku ŭ pamiery 25% — dumaju, što hetym łajfchakam karystajucca mnohija.
Jašče adzin sposab ekanomii — vykarystańnie bankaŭskich kartak z manibekam. U mianie ich niekalki, i kožnaja pryznačanaja dla tych ci inšych pakupak. Sumarna za miesiac takim čynam ja viartaju sabie blizu 10‑15 rubloŭ.
Uvohule z uzrostam ja staŭ dastatkova sknarlivym. Možna navat skazać, što sknaraj. Ja i ŭ maładości nie ličyŭ siabie marnatraŭcam, ale tady było značna bolš spakus i padmannych metaŭ. Ciapier pryjšło razumieńnie taho, što isnujuć sapraŭdnyja kaštoŭnaści — zdaroŭje i dušeŭnaja raŭnavaha.
Tamu ideja demanstratyŭnaha spažyvańnia tavaraŭ i pasłuh z vystaŭleńniem svaich nabytkaŭ napakaz mnie ahidnaja. A jašče ja pierastaŭ marnavać hrošy na toje, kab zavajavać prychilnaść supraćlehłaha połu».
«Praktyčna nie kuplajem sadavinu i harodninu, a zamiest mora adpačyvajem na leciščy»
Valancina, 63 hady, piensijanierka
«Nie skažu, što my z mužam kaliści mocna aščadžali, zaŭsiody žyli ŭ adnosnym dastatku. Ale z hadami ŭsio ž vypracavalisia zvyčki, jakija dazvalajuć bolš racyjanalna rasparadžacca hrašyma. Naprykład, my praktyčna nie kuplajem sadavinu i harodninu, bo ŭsio nieabchodnaje vyroščvajem na leciščy. Naturalna, uzimku ŭ chod iduć chatnija narychtoŭki, a nie kuplenyja soki i saleńni. Navat chren chatni i adžyku ja hatuju sama.
Z časoŭ maładości ŭ nas zachavałasia zvyčka vybirać u kramach tannyja, ale dastatkova jakasnyja pradukty: navošta pierapłačvać za tyja ž chleb i małako?
Darečy, ciapier, kali ŭ mianie dastatkova šmat volnaha času, chleb ja piaku sama i navat navučyłasia rabić syry ŭ chatnich umovach. Viadoma, na ŭsim hetym ekanomija kapieječnaja vychodzić, ale jana ŭsio roŭna jość.
Chutčej užo pa zvyčcy, a nie dziela ekanomii, ja aščadžaju kožnuju anučku i puskaju ŭ spravu luboje ryźzio. Naprykład, sa starych rečaŭ šyju pledy i pakryvały ŭ technicy pečvork, a znošanyja džynsy vykarystoŭvaju dla vyrabu abjomnych avosiek, ich ciapier šopierami nazyvajuć.
U čym ja sabie nie admaŭlaju, tak heta ŭ kaśmietycy dla dohladu — navat u maim uzroście chočacca vyhladać pryvabna. Tamu na kremach, balzamach i piency dla myćcia ja nie aščadžaju.
A voś ad padarožžaŭ my z mužam admovilisia davoli lohka. Z ulikam taho, što na dvaich u nas piensija vychodzić 1600 rubloŭ na miesiac, raz na hod źjeździć na mora my možam sabie dazvolić. Ale ŭ nas užo troje ŭnukaŭ, a ŭ syna kuplenaja kvatera ŭ kredyt. Tak što starajemsia dzieciam dapamahać pa miery mahčymaściaŭ, a zamiest mora adpačyvajem na leciščy».
«Aščadžaju praktyčna na ŭsim, kab vyhladać dobra»
Kryścina, maładaja śpiecyjalistka, 24 hady
«U studenckija hady ja asabliva nie zadumvałasia nad tym, kudy i na što traču hrošy. Žyła z baćkami, jakija kuplali pradukty, a taksama davali mnie niekatoryja sumy na abutak, adzieńnie, kaśmietyku, zabavy. Kali byli jakija-niebudź padpracoŭki (ja pa prafiesii nastaŭnica anhlijskaj movy), to atrymanyja hrošy traciła na siabie.
Zaraz ja ŭžo druhi hod na adpracoŭcy, žyvu ŭ nievialikim rajcentry na zdymnaj kvatery razam ź jašče adnoj dziaŭčynaj. Pałova koštu arendy mnie kampiensujecca, u vyniku na žyllo razam z kamunałkaj vydatkoŭvaju ad siły 80‑120 rubloŭ na miesiac. Adnak zarobak pakul nievialiki — vychodzić pryblizna 1300‑1400 rubloŭ na ruki.
Na čym ja zaraz aščadžaju? Dy praktyčna na ŭsim, kab vyhladać dobra i stylna. Tamu što adna brendavaja reč nakštałt kaściuma ad Mango moža kaštavać pałovu majho zarobku. Pa abnoŭki zvyčajna jezdžu ŭ Minsk, časam niešta kuplaju ŭ siabie ŭ rodnym Homieli.
Narmalny manikiur u majstra raz na tydzień — heta 30‑40 rubloŭ, dy i da kaśmietołaha chacia b raz na miesiac starajusia chadzić. A heta jašče minimum 80 rubloŭ. Plus kaśmietyka, jakasnaja parfuma (ja addaju pieravahu brendu Valentino) abychodziacca niatanna.
Baćki, darečy, mnie dahetul materyjalna dapamahajuć. Ale ahułam ja žyvu pa pryncypie nazapašvańnia srodkaŭ, jakija potym traciacca na jakija-niebudź surjoznyja kupli.
Mabyć, ježa — heta samaja niaznačnaja častka maich raschodaŭ. Dla siabie ja hatuju pad nastroj, addaju pieravahu vykarystańniu niedarahich paŭfabrykataŭ. Harodninu i sadavinu zvyčajna pieradajuć baćki razam z chatniaj kansiervacyjaj, krupami, miasam. Nu i ŭ školnaj stałovaj kuplaju pastajanna abiedy — vychodzić sytna i adnosna niadoraha.
Ja ŭvohule nie marnuju hrošy na hramadski transpart, bo ad kvatery da miesca pracy mahu dajści za 10 chvilin pieššu. Heta ŭ siarednim dazvalaje aščadžać 50‑60 rubloŭ na miesiac. A voś ad filižanki kavy ŭ kaviarni nie mahu pakul admovicca, heta adna ź niešmatlikich radaściaŭ u žyćci. Mahčyma, z časam ja kuplu sabie dobruju kavamašynu, ale pakul paru razoŭ na tydzień dazvalaju sabie takuju raskošu za 5‑7 rubloŭ».
«Nie hatovy płacić za ježu ŭ kaviarniach i restaranach»
Jaŭhien, 53 hady, mieniedžar
«Niadaŭna ja vyrašyŭ pastavić na sabie ekśpierymient — sprabuju pražyć miesiac na minimalny zarobak, jaki paśla vypłaty padatkaŭ składaje 739 rubloŭ, a ŭsio, što źvierchu — adkładać. Što mahu skazać? U žniŭni ekśpierymient skončyŭsia kracham, a za dva tydni vieraśnia ja spakojna ŭkłaŭsia ŭ 300 rubloŭ i pry hetym ni ŭ čym sabie nie admaŭlaŭ.
Adrazu pačnu z taho, za što ja hatovy pierapłačvać hrošy. Za ježu. Jem ja niašmat, ale lublu, kab usio było smačna. Tamu niahledziačy na toje, što sam pa adukacyi kuchar, addaju pieravahu kupli hatovych straŭ, zahadzia viedajučy, što ja za ich addam bolš.
Pry hetym ja aščadžaju čas na ich pryhatavańni — samy, na moj pohlad, kaštoŭny čałaviečy resurs. Adnak ja nie hatovy płacić za ježu ŭ kaviarniach i restaranach — nie baču sensu pierapłačvać za atmaśfieru i zabavy, kali možna prosta pajeści doma.
Na čym ja adnosna niadaŭna staŭ aščadžać? Na aŭtamabili. Jeździć asabliva im zaraz niama kudy, tamu vydatki na paliva źviedzienyja da minimumu. Jašče praktyčna nie kuplaju sabie novyja rečy, bo z adzieńnia i abutku ŭsio jość. U hetym hodzie, naprykład, kupiŭ sabie tolki adnu majku na rynku za 20 rubloŭ».
«Pavialisia na biaspłatnuju ekskursiju i pakinuli tam $500». Biełaruska raskazała pra adpačynak u Vjetnamie
Zaviaźli ŭ mahnitnych piaskach i ździvilisia cenam u kaviarniach. Biełarus raskazaŭ, jak źjeździŭ ź siamjoj na mašynie ŭ Hruziju
«Ubačyła ŭ Polščy Conte — šakavała cana». Biełarusy raskazali, što viazuć z Polščy, a što — nazad
«Zaŭsiody chočacca bolš». Jak traciać hrošy biełarusy z zarobkam 5—6 tysiač rubloŭ
«U dzień na ježu tracim 30—40 BYN». Jak žyvie ŭ Biełarusi siamja z dachodam 3 000 BYN
Kamientary
Maksim Dizajnier, ty?