Kiraŭnica «Volnaha choru» Halina Kazimiroŭskaja paviedamiła, što pieramahła rak
Viasnoj hetaha hoda kiraŭnica «Volnaha choru» Halina Kazimiroŭskaja padzialiłasia sumnaj navinoj — u jaje ankałahičnaja chvaroba. Biełarusy adhuknulisia i imhnienna sabrali joj nieabchodnuju sumu hrošaj, kab padtrymać padčas lačeńnia. Siońnia žančyna paviedamiła ŭ sacsietkach, što ŭsio było nie darma — rakavych kletak daktary ŭ jaje bolš nie znachodziać.
«Apošnija 9 miesiacaŭ, zdajecca, byli samymi ciažkimi ŭ maim žyćci. Nie, ja spadziajusia, što jany byli samymi ciažkimi i horš užo nie budzie…
Ale ž u hety samy čas u mianie adčuvańnie, što biełarusy ŭziali mianie na ručki i pranieśli skroź hetuju buru — i praciahvajuć nieści… Ja atrymała stolki ciapła, dabra i lubovi, što byccam by smaku chopić na ŭsio žyćcio! I heta praciahvajecca! I heta syplecca na mianie z usiaho śvietu, časam hieahrafija prosta ŭražvaje», — piša Halina Kazimiroŭskaja.
«I tamu ja chaču praśpiavać, prakryčać, prynieści na ŭvieś śviet dobruju navinu!!! Dva tydni tamu mnie zrabili apieracyju i ŭ tym liku zabrali z roznych kutkoŭ majho cieła tkanki na analiz. I akurat siońnia pryjšli vyniki, i ja pačuła toje, što tak doŭha čakała — hetaj chalery bolš niama! Raku niama! Pieramahła!!!» — radujecca jana.
Praŭda, napieradzie jašče dźvie apieracyi, kab rak nie viarnuŭsia, roznyja daśledavańni, imunaterapija, reabilitacyja, ale śviatło ŭ tuneli ŭžo bačnaje.
«Mnie zdajecca, ja zaraz bolš žyvaja, čym hod tamu, niahledziačy na nastupstvy chimii, hałoŭnaje ź jakich słabaść i biaśsille, jakija ŭsio jašče nie dajuć mnie narmalna žyć. Za hety čas chtości staŭ vielmi blizkim, chtości syšoŭ u bok, štości stała vielmi važnym, na što raniej navat nie źviartała ŭvahi, a štości prosta adpuściła…», — dzielicca žančyna.
Naprykancy jana piša:
«Ja biaskonca ŭdziačnaja ŭsim dobrym ludziam, jakija mnie dapamahajuć słovam, spravaj, malitvaj, uśmieškaj, plačom, dumkami, hrašyma! Ja b nikoli nie spraviłasia sama.
Ja trochi navučyłasia być słaboj i nie saromiecca hetaha, atrymlivać dapamohu, addavać svaje prablemy, tak dziŭna, kali chtości vyrašaje tvaje prablemy, padzialaje tvaju adkaznaść. Tak pryjemna i prosta prymać luboŭ… […]
Ja nie mahu pieraličyć usich, kaho chaču abniać i kamu ja tak udziačnaja, i nie viedaju, jak adździačyć za ŭsio heta dabro… budu žyć».
Halinie Kazimiroŭskaj užo sabrali bolš za 10 tysiač jeŭra na zmahańnie z ankałohijaj
«Byvajuć prosta bolevyja zapoi. Kali ty z bolu nie vyłaziš…». Halina Kazimiroŭskaja — pra baraćbu z ankałohijaj, chimijaterapiju i toje, čamu nie ŭmieje prasić dapamohi
Kiraŭnica «Volnaha choru» Halina Kazimiroŭskaja sutyknułasia ź ciažkaj chvarobaj. Za sutki joj amal sabrali vialikuju sumu, nie chapaje zusim krychu
Ciapier čytajuć
Babaryka, Zołatava i jašče niekalki dziasiatkaŭ byłych palitviaźniaŭ zaklikali jeŭrapiejskich lidaraŭ aktyŭniej damaŭlacca nakont vyzvaleńniaŭ33
Kamientary