U Biełarusi źmianili ŭmovy pracy pryvatnych sacyjalnych pansijanataŭ. Ułady płanujuć pryciahvać ich da akazańnia sacyjalnych pasłuh u miežach dziaržaŭnaha zakazu. Adpaviednyja ŭmovy vyznačanyja ŭ pastanovie ŭrada, jakaja pavinna sadziejničać raźvićciu rynku sacyjalnych pasłuh i zrabić ich bolš dastupnymi.
Dziaržava vyznačyła katehoryi hramadzian, jakim moža nadavacca stacyjanarnaje sacyjalnaje absłuhoŭvańnie. U ich liku adzinokija pažyłyja ludzi, a taksama adzinokija invalidy I i II hrup — pry ich zhodzie.
Dla kamiercyjnych arhanizacyj, jakija buduć vykonvać dziaržaŭny zakaz, vyznačajecca abmiežavańnie koštu sacyjalnych pasłuh. Dziaržava nie budzie nabyvać ich daražej za taryf, zaćvierdžany abłvykankamami abo Minskim harvykankamam.
Pryvatnyja pansijanaty, jakija ŭdzielničajuć u dziaržaŭnym zakazie, mohuć atrymać peŭnyja lhoty ad miascovych uładaŭ. Im mohuć źmienšyć arendnuju płatu za nieruchomaść, jakaja vykarystoŭvajecca dla akazańnia sacyjalnych pasłuh. Taksama jany mohuć atrymać pieravažnaje prava nabyvać biez praviadzieńnia tarhoŭ nieruchomaść, jakaja znachodzicca ŭ kamunalnaj ułasnaści i nie vykarystoŭvajecca abo vykarystoŭvajecca nieefiektyŭna.
Dla kamiercyjnych arhanizacyj, jakija akazvajuć stacyjanarnyja sacyjalnyja pasłuhi, praduhledžvajecca i finansavaja padtrymka. Jany zmohuć karystacca admysłovym kredytnym praduktam dla realizacyi sacyjalna značnych prajektaŭ, kali buduć vykananyja ŭstanoŭlenyja patrabavańni.
Akramia taho, orhany pa pracy, zaniataści i sacyjalnaj abaronie buduć dapamahać pryvatnym arhanizacyjam nakiroŭvać ich supracoŭnikaŭ na navučańnie navykam dohladu za ludźmi, a taksama patrabavańniam da źmiestu i jakaści sacyjalnych pasłuh.
Asobna ŭ pastanovie ŭrehulavali pytańnie miedycynskaj dapamohi ludziam, jakija znachodziacca ŭ pryvatnych pansijanatach. Jany zmohuć atrymlivać miedycynskuju dapamohu ŭ dziaržaŭnych paliklinikach i balnicach, a apłata takoha absłuhoŭvańnia budzie ažyćciaŭlacca za košt biudžetu.
Kamientary