U Anhlii pa pamyłcy vyzvalili hvałtaŭnika 14‑hadovaj dziaŭčynki

Palicyja Łondana šukaje prasiciela prytułku Chaduša Kiebatu, jaki byŭ asudžany za seksualizavany hvałt u dačynieńni da 14‑hadovaj dziaŭčynki i darosłaj žančyny, a ranicaj u piatnicu, 24 kastryčnika, pamyłkova adpuščany sa śledčaha izalatara horada Čełmsfard. Adpaviednaja zajava apublikavana na sajcie słužby, piša vydańnie Deutsche Welle.

Łondanskaja palicyja ŭziała vyšuk na siabie, pakolki paśla vyzvaleńnia Kiebatu, pavodle źviestak pravaachoŭnikaŭ, na ciahniku nakiravaŭsia ŭ stalicu. Palicyjanty adznačajuć, što zaraz pošuk złačynca — pryjarytet u ich pracy.

Toje, što Kiebatu vyrvaŭsia na volu, vyklikała šyroki rezanans u krainie, incydent prakamientavaŭ premjer-ministr Vialikabrytanii Kir Starmier.

«Pamyłkovaje vyzvaleńnie z turmy Čełmsfard całkam nieprymalnaje. Ja aburany tym, što heta adbyłosia, viadziecca rasśledavańnie. Palicyja ŭ terminovym paradku zajmajecca jaho vyšukam, i moj urad padtrymlivaje heta. Hety čałaviek pavinien być złoŭleny i departavany za svaje złačynstvy», — napisaŭ jon na svajoj staroncy ŭ sacsietcy X.

Jakija złačynstvy ździejśniŭ Kiebatu

Kiebatu — etničny efiopiec, jon prybyŭ u Vialikabrytaniju na łodcy. Sam jon ukazvaŭ, što naradziŭsia ŭ śniežni 1986 hoda (heta značyć zaraz jamu 38 hadoŭ), ale ŭ dakumientach suda paznačana, što jamu 41 hod.

Kiebatu padaŭ prašeńnie na atrymańnie prytułku i z momantu prybyćcia ŭ krainu, jak i mnohija inšyja prośbity, jakim nie chapiła miesca ŭ śpieccentrach, byŭ raźmieščany ŭ hateli. Mužčynu vydzielili numar u trochzorkavym hateli The Bell u horadzie Epinh.

8 lipienia Kiebatu zatrymali pa padazreńni ŭ ździejśnienym u toj ža dzień hvałcie nad padletkam, heta stała padstavaj dla masavych mitynhaŭ u The Bell. Pratestoŭcy patrabavali admovicca ad praktyki raźmiaščeńnia prośbitaŭ prytułku ŭ hatelach i ich departacyi. Razhon mitynhu supravadžaŭsia sutyčkami z palicyjaj, častku pratestoŭcaŭ zatrymali.

A 23 vieraśnia sud Čełmsfarda pryhavaryŭ Kiebatu da 12 miesiacaŭ pazbaŭleńnia voli za ŭčynieńnie seksualizavanaha hvałtu ŭ dačynieńni da 14‑hadovaj dziaŭčynki i darosłaj žančyny. Pieršuju jon sustreŭ, kali taja siadzieła na łaŭcy, jon sprabavaŭ pacałavać i rabiŭ joj mnostva kamientaroŭ z seksualnym padtekstam.

Na nastupny dzień Kiebatu znoŭ ubačyŭ hetuju dziaŭčynku, znoŭ pasprabavaŭ jaje pacałavać, a zatym ździejśniŭ seksualizavany hvałt. Ci było heta zhvałtavańniem, nie ŭdakładniajecca. Akramia taho, raniej seksualizavany hvałt jon ździejśniŭ u dačynieńni da žančyny, jakaja prapanavała jamu dapamohu ŭ składańni reziume dla pošuku pracy.

Pamyłka palicyi

Sud, jaki vynies Kiebatu prysud, zaličyŭ u termin pakarańnia čas, jaki jon pravioŭ u SIZA. Jašče jon pastanaviŭ, što prasiciel prytułku «ćviorda žadaje» być departavanym.

«Vy taksama budziecie vypuščany z turmy pa prahramie daterminovaha vyzvaleńnia. Samuju rańniuju datu vašaha vyzvaleńnia raźličać, paśla čaho paviedamiać vam», — zajaviŭ sudździa pry abviaščeńni pryhavoru.

24 kastryčnika, praź miesiac paśla pastanovy suda, Kiebatu vypuścili z-pad varty i pieradali palicyjantam dla transpartavańnia ŭ departacyjny centr. Ale ŭ darozie mužčyna pa nieviadomych pryčynach źnik.

Z sakavika 2024 pa sakavik 2025 hoda ŭ Vialikabrytanii pamyłkova adpuścili z-pad varty 262 asudžanyja, paviedamlaje Sky News sa spasyłkaj na ŭradavyja danyja. Kolkaść takich incydentaŭ vyrasła na 128 pracentaŭ u paraŭnańni z pakazčykami papiaredniaha hoda (115). Udakładniajecca, što 233 złačyncaŭ pamyłkova vypuścili z turmaŭ, jašče 29 čałaviek — z zały suda.

• 0
• 0
• 1
• 11
• 0
• 0
• 3
• 0