Padjezd №2 u domie №105 na praśpiekcie Rakasoŭskaha ŭ Sierabrancy pryznali najlepšym u Leninskim rajonie, a na haradskim konkursie ŽKH jon zaniaŭ druhoje miesca. Minsk-naviny pakazali, jak jon vyhladaje.
Heta dzieviacipaviarchovy dom 1972 hoda pabudovy. U im 483 kvatery. U 2024 hodzie, paśla kapitalnaha ramontu doma, u padjeździe praviali płanavaje abnaŭleńnie. Ramontam padjezda zajmalisia sami žychary — zakazvali pasłuhi i najmali padradčykaŭ.
Ź niezvyčajnaha dla takich damoŭ — tut pakłali plitku. Joju vykłali padłohu ad uvachodu da lifta, prystupki na pieršym paviersie, mižpaviarchovyja placoŭki, a taksama asobnyja ŭčastki ścien — u tambury i kala lifta.
— Plitku nabyvali sami pa akcyjach, — raskazała žycharka i hałoŭnaja inicyjatarka ramontu Neli Babkova. — Taksama ŭ niekatorych žycharoŭ zastavałasia plitka paśla inšych rabot. Staralisia zrabić tak, kab pavierchni, pafarbavanyja farbaj i ablicavanyja plitkaj, harmanična spałučalisia. Astatnija materyjały — tynkoŭku, farbu, hruntoŭku — zakuplali rabočyja, a potym padavali čeki.
Niekatoryja raboty žychary vykonvali samastojna. Naprykład, sami vykładvali plitkaj ścieny. Akramia taho, u padjeździe zamianili paštovyja skryni i paviesili lusterka ŭ lifcie.
Pavodle kaštarysu, raźličanaha ŽEU, ramont padjezda kaštavaŭ by prykładna 15 tysiač rubloŭ. I heta biez uliku vydatkaŭ na nabyćcio i ŭkładku plitki, a taksama inšyja dadatkovyja raboty, zatoje ź istotnymi nakładnymi raschodami.
Žychary, jakija ŭzialisia za ramont samastojna, ukłalisia ŭ 14 300 rubloŭ. Pryčym sumu padzialili nie praparcyjanalna płoščy žyłych pamiaškańniaŭ, jak heta praktykujuć žyllovyja słužby, a paroŭnu pamiž 52 kvaterami — pa 275 rubloŭ z kožnaj.
Kamientary