Siabar načalnika achovy Pucina byŭ udzielnikam i sponsaram viasiella syna Trampa

Viasielle adbyłosia ŭ mai i praciahvałasia try dni. Na im prysutničali kala 50 čałaviek, u tym liku ziać Trampa Džared Kušnier i jašče adzin syn amierykanskaha lidara Eryk Tramp. Pavodle rasśledavańnia, Kramloŭ apłaciŭ arendu adnaho z pryvatnych astravoŭ, fiejervierk i inšyja bujnyja vydatki, jakija razam skłali sotni tysiač dalaraŭ. Jaho kamanda taksama ŭdzielničała ŭ arhanizacyi śviata.

Płaciažy, jak śćviardžajecca, prachodzili praz dubajskuju kampaniju IB Challenger, źviazanuju z IBA. Były vysokapastaŭleny supracoŭnik FBR Frenk Mantoja zajaviŭ, što takija finansavyja adnosiny mohuć stvarać zaležnaść pamiž bakami: kali adzin čałaviek apłačvaje viasielle druhoha, toj u peŭny momant moža adčuć siabie abaviazanym.

Prysutnaść Kramlova i inšych rasijan na viasielli ździviła častku haściej, u tym liku tym, jak jany siabie pavodzili. Pavodle słoŭ surazmoŭcaŭ rasśledvalnikaŭ, rasijskaja hrupa trymałasia asobna i razmaŭlała pamiž saboj pa-rusku.

Pradstaŭnik Donalda Trampa-małodšaha nazvaŭ Kramlova jaho asabistym siabram i nie staŭ admaŭlać, što toj apłačvaŭ častku viasielnych vydatkaŭ. Pavodle jaho słoŭ, jany paznajomilisia praz ahulnaha znajomaha i zblizilisia na hlebie ahulnaj cikavaści da boksa i adpačynku. Pradstaŭniki Kramlova taksama paćvierdzili ich siabroŭstva i zajavili, što jany paznajomilisia niekalki hadoŭ tamu. Pry hetym śćviardžajecca, što palityčnyja pytańni pamiž saboj jany nikoli nie abmiarkoŭvali.

U vieraśni 2025 hoda Tramp-małodšy i Kramloŭ razam udzielničali ŭ baksiorskaj kanfierencyi IBA ŭ Stambule. Tam syn prezidenta ZŠA krytykavaŭ udzieł transhiendarnych žančyn u žanočym sporcie. IBA paśla zajaviła, što ich supracoŭnictva budzie mieć praciah i pryviadzie da novych inicyjatyŭ.

Pavodle ProPublica, Kramloŭ pry hetym aścierahaŭsia trapić pad amierykanskija sankcyi abo stać abjektam rasśledavańnia ŭ ZŠA.

Kramloŭ maje ciesnyja suviazi z rasijskimi ŭładami. Jon byŭ źviazany z prakramloŭskim bajkierskim kłubam «Načnyja vaŭki». Pavodle rasśledavańnia «Prajekta», praz hety kłub jon zbliziŭsia z Alaksiejem Rubiežnym, jaki paźniej uznačaliŭ Słužbu biaśpieki prezidenta Rasii. U 2017 hodzie Rubiežny dapamoh Kramlovu ŭznačalić Fiederacyju boksa Rasii.

U 2020 hodzie Kramloŭ staŭ prezidentam IBA. Asacyjacyja atrymlivała finansavańnie ad «Hazprama». U 2023 hodzie Mižnarodny alimpijski kamitet pazbaviŭ IBA prava arhanizoŭvać alimpijskija spabornictvy, zajaviŭšy, što arhanizacyja nie zmahła prazrysta rastłumačyć krynicy finansavańnia i svaju zaležnaść ad dziaržaŭnaj kampanii.

Kramloŭ taksama kantraluje značnyja aktyvy ŭ Rasii. U 2024 hodzie jon staŭ uładalnikam najbujniejšaha rasijskaha aŭtadylera «Rolf», jaki pierad hetym byŭ nacyjanalizavany rasijskimi ŭładami.

Akramia taho, Kramlova źviazvajuć z bujnymi bukmiekierskimi kampanijami «Liha stavak», «Pary» i «Fonbiet». Jon taksama kantraluje Adziny rehulatar azartnych hulniaŭ, praź jaki ŭ Rasii ŭličvajucca bukmiekierskija staŭki.

• 0
• 0
• 3
• 6
• 0
• 0
• 2
• 0