Ministr VPS ZŠA Troj Miejnk zajaviŭ, što hetaja zbroja nieabchodnaja dla abarony amierykanskich sił ad «evalucyjanujučych pahroz».
ZŠA ŭpieršyniu pryznali, što raźmiaścili na kalaziamnoj arbicie nastupalnuju zbroju. Vystupajučy ŭ paniadziełak na Kanfierencyi pa pavietranaj, kaśmičnaj i kibiervajnie, ministr VPS ZŠA Troj Miejnk zajaviŭ, što hetaja zbroja nieabchodnaja dla abarony amierykanskich sił ad «evalucyjanujučych pahroz». Jon nie ŭdakładniŭ mahčymaści hetaj zbroi i nie paviedamiŭ, kali mienavita jana była vyviedziena na arbitu, piša Bi-bi-si.
Da hetaha času amierykanskija aficyjnyja asoby tolki zajaŭlali pra namiery ŭzmacnić vajennyja mahčymaści ŭ kosmasie, spasyłajučysia na rasijskija i kitajskija prahramy, nakiravanyja na ataku i parušeńnie pracy amierykanskich spadarožnikaŭ u vypadku vajennaha kanfliktu.
Administracyja Trampa zhadvała, što zapłanavanaja sistema «Załaty kupał» dla pierachopu rakiet i inšych metaŭ, jakija pahražajuć terytoryi ZŠA, budzie ŭklučać i kaśmičny kampanient, u tym liku rakiety-pierachopniki.
U 1967 hodzie SSSR i ZŠA padpisali damovu, jakaja zabaraniaje raźmiaščeńnie ŭ kosmasie zbroi masavaha źniščeńnia — Damovu ab pryncypach dziejnaści dziaržaŭ pa daśledavańni i vykarystańni kaśmičnaj prastory, uklučajučy Miesiac i inšyja niabiesnyja cieły. Jana adkrytaja dla padpisańnia inšymi krainami.
Adnak damova nie raspaŭsiudžvajecca na zvyčajnyja vidy ŭzbrajeńniaŭ, i ŭ apošnija hady Rasija, Kitaj i ZŠA raźvivali roznyja srodki, jakija dazvalajuć atakavać spadarožniki praciŭnika. Takija spadarožniki nieabchodnyja dla suviazi, raźviedki i navihacyi.
U 2019 hodzie ŭ ZŠA ŭpieršyniu za 70 hadoŭ byŭ stvorany novy vid uzbrojenych sił — Kaśmičnyja siły. U minułym hodzie prezident Donald Tramp vydaŭ ukaz ab tym, što Kaśmičnyja siły majuć nie tolki abarončyja, ale i nastupalnyja zadačy.
Pres-sakratar Kaśmičnych sił patłumačyŭ, što dla hetych metaŭ u ich jość «kinietyčnyja i niekinietyčnyja srodki».
U pačatku lutaha stała viadoma, što dva rasijskija spadarožniki z pačatku poŭnamaštabnaha rasijskaha ŭvarvańnia va Ukrainu, z vysokaj vierahodnaściu, pierachoplivali sihnały jak minimum z 12 jeŭrapiejskich aparataŭ. Pierachoplenyja sihnały mahli być dastupnyja rasijskaj raźviedcy, a hipatetyčna isnavała i niebiaśpieka zachopu kiravańnia spadarožnikami.
Kamientary