Na pažarny post u Chojnickim rajonie prypoŭz tarantuł FOTAFAKT
Niečakanaja sustreča adbyłasia na pažarnym avaryjna-vyratavalnym pastu ŭ ahraharadku Kiraŭ Chojnickaha rajona. Tam supracoŭniki MNS zaŭvažyli paŭdniovaruskaha tarantuła — adnaho z najbujniejšych pavukoŭ, jakija sustrakajucca ŭ našaj krainie, piša miascovaja rajonka «Prypiackaja praŭda».
Źjaŭleńnie pavuka na pažarnym poście mahło być źviazana z pošukam schovišča ad niepahadzi albo z najaŭnaściu pablizu nasiakomych, jakija mahli pryciahnuć jaho.
Pažarniki nie stali pryčyniać pavuku škody. Spačatku jany sfatahrafavali niezvyčajnaha hościa, a zatym aściarožna adłavili jaho i vypuścili ŭ pryrodnaje asiarodździe, dalej ad žyłych damoŭ.
Paŭdniovaruski tarantuł (Lycosa singori) moža mieć cieła da 3—4 santymietraŭ u daŭžyniu, a razam z nahami jaho pamier dasiahaje 7—8 santymietraŭ. Zvyčajna jon maje buravata-šeruju afarboŭku ź ciomnymi plamami i pałosami, dziakujučy čamu dobra maskirujecca ŭ pryrodzie.
Niahledziačy na bujny pamier i hrozny vyhlad, hety pavuk nie ŭjaŭlaje śmiarotnaj niebiaśpieki dla čałavieka. Praŭda, jahony ŭkus balučy i moža vyklikać aciok, pačyrvanieńnie i smyleńnie, padobnyja da reakcyi paśla ŭkusu asy abo pčoły. Adnak ža jahonaja atruta nie maje niejrataksičnaha dziejańnia, zdolnaha vyklikać ciažkija sistemnyja nastupstvy. Tym nie mienš, reakcyja na ŭkus moža być indyvidualnaj, tamu pry źjaŭleńni niepryjemnych simptomaŭ rekamiendujecca źviarnucca da doktara.
Tarantuły viaduć pieravažna načny i schavany ład žyćcia. Jany vykopvajuć u ziamli hłybokija nory, časam z amal viertykalnym uvachodam, i vyściłajuć ich pavucińniem. Asnoŭnaja ich ježa — nasiakomyja, ale jany taksama mohuć palavać na drobnych hryzunoŭ i jaščarak. U ciopłuju paru hoda, asabliva ŭviečary i ŭnačy, tarantułaŭ možna sustreć na adkrytych terytoryjach, u palach i na łuhach, a časam i kala čałaviečaha žylla.
Nastaŭnica chimii i bijałohii Chojnickaj siaredniaj škoły № 2 imia Ivana Šaŭreja Taćciana Šylina adznačyła, što paŭdniovaruski tarantuł źjaŭlajecca całkam naturalnym nasielnikam Paleśsia. Jon vykonvaje važnuju rolu ŭ miascovaj ekasistemie, rehulujučy kolkaść škodnych nasiakomych. Pavuk aktyŭny ŭ ciopły pieryjad hoda, pieravažna ŭ pryciemkach i ŭnačy. Jahonyja nory mohuć dasiahać paŭmietra ŭ hłybiniu, što dapamahaje pieražyć niespryjalnyja ŭmovy.
Pavodle słoŭ nastaŭnicy, niahledziačy na svoj davoli surovy vyhlad, tarantuł nie ahresiŭny i napadaje na čałavieka tolki tady, kali adčuvaje niepasrednuju pahrozu i abaraniajecca.
U Śvietłahorskim rajonie złavili tarantuła
Što budzie, kali vas raptam ukusić zdaravienny pavuk, jaki biehaŭ pa vulicach Mahilova?
Čaroŭny śviet biełaruskich pavukoŭ: takimi vy ich jašče nie bačyli FOTY
Pavuki-tarantuły atakavali viosku ŭ Homielskaj vobłaści VIDEA
U Biełarusi raspaŭsiudžvajucca tarantuły? FOTY
Kamientary
Cikava, a što ź inšymi, ci jość u nas trutnyja pavuki, zdolnyja nieści pahrozu žyćciu čałavieka ?
Hieapalityčnyja bojka za tarantuła =) :
- čeština: Slíďák tatarský
- polski: Tarantula ukraińska
- russkij: Južnorusskij tarantuł
Ja budu salidarny z palakami i tarantuła budu nazyvać UKRAINSKIM albo TATARSKIM. A [Red. Vydalena] niachaj idzie za svaim vajennym karablom.
[Zredahavana]