«Buchta ŭdovaŭ» — najlepšy kamiedyjny sieryjał i 14 uznaharodaŭ.
U Łos-Andželesie ŭviečary 14 vieraśnia adbyłasia 78‑ia cyrymonija ŭručeńnia televizijnaj premii «Emi» — hałoŭnaj u śfiery telebačańnia. Hałoŭnyja ŭznaharody atrymali miedycynskaja drama HBO Max «Balnica Pit» i kamiedyjny chorar Apple TV «Buchta ŭdovaŭ».
«Balnica Pit», jakaja lidziravała pa kolkaści naminacyj — ich było 25, — druhi hod zapar pryznana najlepšym dramatyčnym sieryjałam. Sioleta vyjšaŭ druhi siezon, pieršy siezon vyjšaŭ na ekrany hod tamu.
Noa Uajli druhi raz zapar atrymaŭ «Emi» jak najlepšy akcior u dramatyčnym sieryjale za rolu doktara Majkła Rabinoviča («Robi»).
Najlepšaj dramatyčnaj aktrysaj stała Rej Sichorn za hałoŭnuju rolu ŭ sieryjale Vinsa Hilihana «Adna z nas».
Hałoŭnym tryumfataram siarod kamiedyj staŭ sieryjał «Buchta ŭdovaŭ» — historyja nievialikaj astraŭnoj supolnaści ŭ Novaj Anhlii (uschodniaje ŭźbiarežža ZŠA), jakaja sutyknułasia z šmatviakovym praklonam.
Z ulikam premij Creative Arts Emmy, uručanych tydniem raniej, sieryjał atrymaŭ 14 statuetak, ustalavaŭšy novy rekord dla kamiedyjnaha prajekta za adzin siezon.
Akramia hałoŭnaj uznaharody za najlepšy kamiedyjny sieryjał, «Buchcie» prynieśli «Emi» Mećju Ryz za hałoŭnuju mužčynskuju rolu, Kiejt O'Flin i Styvienu Rutu — za roli druhoha płana.
Uznaharody taksama atrymali stvaralnica sieryjała Keci Dypałd i režysior Chira Muraj.
Pry hetym najlepšaj aktrysaj u kamiedyjnym sieryjale piaty raz zapar stała Džyn Smart za rolu Debary Vens u «Chitraściach».
Adnym z hałoŭnych hierojaŭ viečara staŭ valijski akcior Mećju Ryz, piša Bi-bi-si.
Akramia pieramohi za «Buchtu ŭdovaŭ», jon atrymaŭ uznaharodu jak najlepšy akcior mini-sieryjała abo telefilma za «Źvier unutry mianie».
Ryz staŭ pieršym u historyi «Emi» akcioram, jaki zavajavaŭ dźvie ŭznaharody za hałoŭnyja roli ŭ roznych katehoryjach na adnoj cyrymonii.
Raniej, u 2018 hodzie, jon byŭ pryznany najlepšym dramatyčnym akcioram za sieryjał «Amierykancy». Takim čynam, ciapier u jaho kalekcyi jość akciorskija pieramohi «Emi» va ŭsich troch asnoŭnych žanravych katehoryjach.
Špijonski sieryjał «Pavolnyja koni» (Slow Horses) byŭ pradstaŭleny ŭ niekalkich naminacyjach i atrymaŭ uznaharodu za najlepšuju režysuru dramatyčnaha sieryjała (epizod «Scars», režysior Soł Mecścin). Na hetym tydni vyjdzie šosty siezon chita z Hery Ołdmanam, Džekam Łaŭdenam i Kryścin Skot Tomas.
Ciapier čytajuć
U Čechii palaki źbili palaka, pryniaŭšy jaho za ŭkrainca z-za šapki ŭ kolerach Vierchniaj Silezii. Chłopiec jechaŭ u viełaprabieh dziela chvoraj na rak ciažarnaj partniorki2525
Kamientary