Rasijanie, nabližanyja da Kramla, sotniami atrymlivajuć sierbskija pašparty, jakija dajuć biaźviz u Jeŭrasajuz

Rasśledavańnie pakazała, što mnohija z tych, chto atrymaŭ hramadzianstva Sierbii za zasłuhi, źviazanyja z abaronnym kompleksam Rasii, kramloŭskimi aliharchami, dziaržkarparacyjami i navat śpiecsłužbami. Nivodzin ź ich nie znachodzicca ŭ sankcyjnych śpisach, što dazvalaje svabodna padarožničać pa śviecie ź sierbskim pašpartam.

Naprykład, sierbskija pašparty atrymlivajuć funkcyjaniery, źviazanyja ź Fiederacyjaj boksa Rasii (FBR) i Mižnarodnaj asacyjacyjaj boksa (IBA). Naprykład, siarod takich Umar Kramloŭ, były kiraŭnik FBR, a ciapier kiraŭnik IBA. Jahonaja karjera źviazanaja ź ciesnymi adnosinami z hienierałam Fiederalnaj słužby achovy Alaksiejem Rubiežnym, ź jakim jon paznajomiŭsia ŭ bajkierskim kłubie «Načnyja vaŭki». 

Taksama hramadzianstva Sierbii atrymali niekalki blizkich da Kramlova asob, siarod jakich trenier Alaksiej Halejeŭ, jaki pracavaŭ ź viadomymi rasijskimi baksiorami. Da rasijskaj baksiorskaj industryi naležać taksama namieśnik Umara Kramleva ŭ IBA, funkcyjanier z Paŭnočnaha Kaŭkaza Abdułmutalim Abakaraŭ, čačenski baksior Sumajd Chalidaŭ, blizki da Ramzana Kadyrava, a taksama były kiraŭnik słužby biaśpieki Rasijskich čyhunak i achovy biznesu aliharchaŭ Arkadzia i Barysa Rotenbierhaŭ Viktar Šendryk. 

Pašpart Sierbii i bieźvizavy ŭjezd u ES imknulisia atrymać taksama mieniedžary i supracoŭniki rasijskich abaronnych pradpryjemstvaŭ i ich svajaki. Najbolš masavaja mihracyja datyčyć ludziej, źviazanych z kancernam «Radyjoelektronnyja technałohii» (KRET), najbujniejšym vytvorcam sistem REB u Rasii i avijoniki dla vajskovych samalotaŭ i viertalotaŭ.

Tak, padčas vajny hramadzianstva Sierbii atrymała Anastasija Kolesava, dačka byłoha kiraŭnika KRETa i eks-hubiernatara Amurskaj vobłaści, jaki znachodzicca pad sankcyjami ES, Mikałaja Kolesava. Ciapier jon uznačalvaje chołdynh «Viertaloty Rasii». Taksama hramadziankaj Sierbii stała maci Anastasii Albina Kolesava, jakaja da 2019 hoda pracavała na Kazanskim optyka-miechaničnym zavodzie, vytvorcy zbrojnaj optyki. 

Maje taki pašpart i Śviatłana Kijko — žonka hienierał-pałkoŭnika Michaiła Kijko, byłoha namieśnika kiraŭnika Fiederalnaj słužby pa kantroli za abarotam narkotykaŭ. U 2016 hodzie jana zaniała čaćviortaje miesca ŭ rejtynhu samych bahatych žonak rasijskich čynoŭnikaŭ, zadekłaravšy dachod 548 miljonaŭ rubloŭ, što ŭ 156 razoŭ bolš, čym u jaje muža. 

Jašče adzin novy hramadzianin Sierbii źviazany ź Biełaruśsiu — Alaksiej Lamin, kiraŭnik handlovaha doma «BiełAZ», jaki źjaŭlajecca dyleram pradukcyi biełaruskaha pradpryjemstva. Kampanija taksama supracoŭničaje z babrujskim zavodam «Biełšyna», jaki pastaŭlaje šyny dla aŭtamabilaŭ rasijskaj armii.

Taksama siarod «novych sierbaŭ» niamała rasijan, jakija majuć suviaź z ekanamičnaj ekspłuatacyjaj akupavanych terytoryj Ukrainy. Adzin ź ich — Ivan Sibiraŭ, raniejšy kiraŭnik kampanii «Budtransnaftahaz», jakaja naležała blizkamu siabru Pucina Hienadziu Cimčanku. Z pačatkam poŭnamaštabnaj vajny va Ukrainie Sibiraŭ staŭ saŭładalnikam budaŭničaj kampanii «R-stroj», jakaja pracuje ŭ akupavanych i razburanych rasijskaj armijaj ukrainskich haradach Maryupal i Sievieradanieck.

Jašče adzin prykład — Śvietłana Pieravałava, jakaja razam z mužam, Viktaram Pieravałavym, źjaŭlajecca častkaj kampanii «Vysokakłasnyja aŭtamabilnyja darohi» (VAD). Kampanija zajmajecca budaŭnictvam daroh u anieksavanym Krymie, u tym liku pabudovaj Kierčanskaha mosta i tras «Taŭryda» i ad Simfieropala da zachodniaha ŭźbiarežža Kryma.

Sierbski pašpart atrymaŭ i Dźmitryj Siarhiejeŭ — siabar vice-premjera i byłoha ministra sielskaj haspadarki Rasii Dźmitryja Patrušava, syna hienierała Mikałaja Patrušava, byłoha dyrektara FSB, eks-kiraŭnika Rady biaśpieki Rasii i pamočnika Pucina.

Daśledčyk karupcyi Illa Šumanaŭ miarkuje, što takaja masavaja vydača pašpartoŭ rasijanam, źviazanym z Kramlom i abaronnaj pramysłovaściu, mahła być častkaj palityčnych damoŭlenaściaŭ dvuch uradaŭ. U takim scenaryi ŭrad Sierbii ryzykuje stracić pierśpiektyvy jeŭraintehracyi, zatoje moža atrymać ad Maskvy instrumienty kantrolu va ŭmovach masavych antyŭradavych pratestaŭ, jakija nie spyniajucca ŭ krainie z pačatku 2024 hoda, kaža Šumanaŭ.

Mienavita padčas pratestaŭ adbyŭsia ŭsplosk vydačy pašpartoŭ Sierbii rasijanam. Letaś 86 z 137 novych pašpartoŭ «za zasłuhi» byli vydadzienyja rasijanam, bolš za 30 z hetych rasijan niepasredna ci ŭskosna źviazanyja z rasiejskimi ŭładami i biznes-hihantami. Paralelna tamu, jak ułady Sierbii vypisvali hetyja pašparty, u Rasiju rehularna pryjazdžaŭ siabar Mikałaja Patrušava, vice-premjer Sierbii Alaksandr Vulin. Jon pravodziŭ aficyjnyja pieramovy z kiraŭnikami Słužby źniešniaj raźviedki i FSB, z samim Patrušavym, ź Siarhiejem Šajhu, Siarhiejem Łaŭrovym i čynoŭnikami MZS.

«Dumaju, havorka taksama idzie pra niefarmalnuju finansavuju padtrymku, vydaču pazyk i kredytaŭ, jakija pojduć na padtrymańnie režymu. Plus vielmi vyhadnyja kantrakty z rasijskimi kampanijami. Pryciahnieńnie rasijskich inviestycyj — heta adzin z samych hałoŭnych kručkoŭ, na jakija možna padviesić ułady Sierbii. Tam prysutničaje palityčnaja turbulentnaść. I Rasija, naprykład, moža dać instrumienty pa manitorynhu sacyjalnych sietak. Usie aŭtarytarnyja praktyki, jakimi Rasieja mahła b padzialicca, u Sierbii vielmi buduć zapatrabavanyja. Pačynajučy ad sistemy manitorynhu, kančajučy palittechnałohijami — naprykład, botafiermy i hetak dalej», — razvažaje Šumanaŭ.

Ciapier ni eks-śpiecnazaŭcu FSB Viktaru Šendryku, ni mieniedžaram klučavych rasijskich abaronnych pradpryjemstvaŭ ništo nie pieraškadžaje jeździć z pašpartam Sierbii bieź vizy ŭ krainy Jeŭrasajuza, i ŭ Jeŭrakamisii tut niama instrumientaŭ kantrolu, akramia cisku.

Žurnalisty sierbskaha vydańnia KRIK nakiravali aficyjny zapyt uradu Sierbii z prośbaj rastłumačyć, u čym mienavita zaklučajucca intaresy krainy ŭ nadańni hramadzianstva pieraličanym rasiejcam.

• 5
• 0
• 1
• 6
• 2
• 0
• 11
• 0