Jeŭrapiejskija čynoŭniki zładzili demarš suprać ministra finansaŭ Rasii na sustrečy MVF u Banhkoku

Na štohadovaj sustrečy MVF u Banhkoku pradstaŭniki amal dziesiaci krain pakinuli zału padčas vystupleńnia ministra finansaŭ Rasii Antona Siłuanava. Raniej jeŭrapiejskija čynoŭniki prymusili arhanizataraŭ źmianić rassadku na aficyjnym pryjomie, admoviŭšysia siadzieć za adnym stałom z rasijskim vice-premjeram Alaksiejem Avierčukom, piša «Ahienctva».

Demarš suprać Siłuanava adbyŭsia ŭ subotu na pasiadžeńni Mižnarodnaha valutna-finansavaha kamiteta (IMFC) — hałoŭnaha kansultatyŭnaha orhana MVF. Kali rasijski ministr pačaŭ vystupać, z zały vyjšli pradstaŭniki niekalkich jeŭrapiejskich krain, paviedamiła ahienctva Reuters sa spasyłkaj na troch surazmoŭcaŭ.

Pavodle słoŭ adnaho z surazmoŭcaŭ ahienctva, pasiadžeńnie pakinuli amal dziasiatak delehataŭ. Siarod ich byli pradstaŭniki Danii, Šviecyi, Finlandyi, Narviehii, Litvy, Łatvii i Estonii.

Pieršym z zały, pavodle jaho ŭłasnych słoŭ, vyjšaŭ kiraŭnik Nacyjanalnaha banka Ukrainy Andrej Pyšny. Jon raskazaŭ ahienctvu «Interfaks-Ukraina», što inšyja kiraŭniki centralnych bankaŭ i ministry ŭziali ź jaho prykład.

Adzin ź jeŭrapiejskich dypłamataŭ patłumačyŭ Reuters, što vajna va Ukrainie ŭjaŭlaje ekzistencyjalnuju pahrozu dla Jeŭropy, tamu jeŭrapiejskija dziaržavy nie mohuć dapuścić narmalizacyi adnosin z Rasijaj.

Jašče adzin dypłamatyčny skandał adbyŭsia ŭ čaćvier na aficyjnym pryjomie ŭ Domie ŭrada Tajłanda.

Arhanizatary płanavali raźmiaścić za adnym stałom niekalkich kiraŭnikoŭ jeŭrapiejskich centralnych bankaŭ i vice-premjera Rasii Alaksieja Avierčuka, jaki ŭznačalvaje rasijskuju delehacyju i znachodzicca pad zachodnimi sankcyjami.

Jeŭrapiejskija čynoŭniki zapatrabavali źmianić zaćvierdžanuju rassadku abo zajavili pra namier admovicca ad udziełu ŭ mierapryjemstvie, paviedamiŭ Pyšny.

Pavodle słoŭ kiraŭnika ŭkrainskaha Centrabanka, piarečańni vykazali pradstaŭniki centralnych bankaŭ Francyi, Hiermanii, Vialikabrytanii i Charvatyi. Za tym ža stałom pieršapačatkova płanavali raźmiaścić dyrektarku MVF Krystalinu Hieorhijevu, prezidentku Jeŭrapiejskaha centralnaha banka Kryścin Łahard i ministarku finansaŭ Šviecyi Elizabet Svantesan.

Usiaho pryjom byŭ raźličany bolš čym na 400 udzielnikaŭ. Paśla piarečańniaŭ jeŭrapiejcaŭ arhanizatary źmianili rassadku, a Avierčuk na mierapryjemstva nie pryjšoŭ, raskazaŭ Pyšny.

Akramia taho, arhanizatary admianili tradycyjnaje ahulnaje fota ŭdzielnikaŭ štohadovych sustreč MVF i Suśvietnaha banka.

Rasijskaja delehacyja vysokaha ŭzroŭniu pryjechała na štohadovyja sustrečy MVF i Suśvietnaha banka ŭpieršyniu z pačatku poŭnamaštabnaha ŭvarvańnia va Ukrainu.

Dla Siłuanava heta druhaja padobnaja zamiežnaja pajezdka paśla pačatku vajny.

Pieršaja adbyłasia 31 žniŭnia — 1 vieraśnia, kali ministr finansaŭ Rasii naviedaŭ sustreču G20 u Ešvile pa zaprašeńni amierykanskaha boku.

Tady viartańnie Siłuanava vyklikała abureńnie jeŭrapiejskich delehacyj. Pradstaŭniki jeŭrapiejskich krain admovilisia fatahrafavacca razam ź im, i ŭ vyniku ahulny zdymak zrabili biez rasijskaha ministra.

Ministr finansaŭ Hiermanii Łars Klinhbajl zajaviŭ, što bačyć sproby, najpierš z boku ZŠA, viarnuć Rasiju na mižnarodnuju arenu.

Pavodle jaho słoŭ, «nielha rabić vyhlad, što Rasija viartajecca ŭ G20 u jakaści paŭnavartasnaha člena i prosta znoŭ zajmaje svajo miesca za stałom».

Namieśnica ministra finansaŭ ZŠA pa mižnarodnych pytańniach Eryn Braŭn paćvierdziła, što Vašynhton padtrymlivaje ŭdzieł Rasii ŭ mižnarodnych sustrečach. Pavodle jaje słoŭ, biez adkrytaha dyjałohu niemahčyma ŭrehulavać kanflikt.

Padobnyja demaršy pačalisia nieŭzabavie paśla rasijskaha ŭvarvańnia va Ukrainu.

20 krasavika 2022 hoda ŭdzielniki sustrečy ministraŭ finansaŭ G20 u Vašynhtonie pakinuli pasiadžeńnie, kali Siłuanaŭ pačaŭ vystupać pa videasuviazi.

Siarod tych, chto vykazaŭ pratest, byli ministarka finansaŭ ZŠA Džaniet Jelen, staršynia Fiederalnaj reziervovaj sistemy Džerom Paŭeł, kiraŭnica JECB Kryścin Łahard i pradstaŭniki inšych zachodnich dziaržaŭ.

• 11
• 0
• 1
• 0
• 0
• 0
• 0
• 0