Napiaredadni 25‑j hadaviny teraktaŭ 11 vieraśnia nad havańniu Ńju-Jorka prajšła śvietłavaja akcyja pamiaci. Amal try tysiačy bieśpiłotnikaŭ utvaryli ŭ načnym niebie siłuety razburanych chmaračosaŭ Suśvietnaha handlovaha centra ŭ ich aryhinalnym maštabie.
Akcyja pad nazvaj «2977 ahnioŭ nad havańniu Ńju-Jorka» adbyłasia 9 vieraśnia 2026 hoda. Kolkaść vykarystanych dronaŭ dakładna adpaviadaje aficyjnaj kolkaści achviar teraktu 2001 hoda.
Jak paviedamlaje telekanał CBS News, śvietłavoje šou składałasia z dvuch sieansaŭ pa 15 chvilin. Padčas palotu bieśpiłotniki spačatku ŭtvaryli ŭ niebie śpiral, jakaja pastupova transfarmavałasia ŭ abrysy dźviuch viežaŭ. Akcyja supravadžałasia tranślacyjaj tvoraŭ kampazitaraŭ Filipa Hłasa, Džona Adamsa i Maksa Rychtera.
Prajekt byŭ raspracavany ŭ dyjałohu sa štohadovaj inicyjatyvaj Tribute in Light, jakaja prajecyruje ŭ nieba dva mahutnyja śvietłavyja pramiani. Adnak, u adroźnieńnie ad sucelnych pramianioŭ, novaja instalacyja skancentravana na indyvidualnych punktach, kožny ź jakich simvalizuje adno stračanaje žyćcio.
Śpiralepadobnaja fihura, jakuju drony stvarali pierad pabudovaj viežaŭ, źjaŭlajecca pramoj adsyłkaj da nierealizavanaha prajekta Suśvietnaha kulturnaha centra. Hety kancept u vyhladzie adkrytych rašecistych struktur prapanoŭvaŭsia kamandaj architektaraŭ THINK (Šyhieru Ban, Rafael Vińjoli i Devid Rokvieł) padčas konkursu na adnaŭleńnie terytoryi Ground Zero adrazu paśla teraktaŭ.
Vytvorčaściu šou zajmałasia kampanija Sky Elements pad kiraŭnictvam kreatyŭnaha dyrektara Adysana Miera. Mastackimi kansultantami vystupili studyja Drift i architektary Šyhieru Ban i Dyn Malc.
Da raspracoŭki instalacyi taksama pryciahnuli svajakoŭ zahinułych, vyžyłych i byłych supracoŭnikaŭ vyratavalnych i pažarnych słužbaŭ Ńju-Jorka.
Finansavańnie prajekta zabiaśpiečyli pryvatnyja dabračynnyja fondy pry padtrymcy Ńju-Jorkskaha fondu mastactvaŭ. Arhanizatary padkreślivajuć, što
praz 25 hadoŭ paśla trahiedyi kala 100 miljonaŭ amierykancaŭ nie majuć ułasnych uspaminaŭ pra 11 vieraśnia, tamu vizualizacyja maštabaŭ strat z dapamohaj sučasnych technałohij nakiravana ŭ pieršuju čarhu na maładoje pakaleńnie.
«Naša Niva» — bastyjon biełaruščyny
PADTRYMAĆCiapier čytajuć
Pamiatajecie paru studentki i vykładčyka duchoŭnaha vučylišča, jaki starejšy za jaje na 31 hod? Jany raźbiehlisia28
Pamiatajecie paru studentki i vykładčyka duchoŭnaha vučylišča, jaki starejšy za jaje na 31 hod? Jany raźbiehlisia
Elektronnuju «Biełaruskuju encykłapiedyju», stvoranuju jak prastoru «vierahodnych viedaŭ pra Biełaruś», cicha likvidavali razam z redakcyjaj. Kupu artykułaŭ pieradali Hihinu77
Kamientary