U Polščy biełaruska na kvadracykle sarvałasia z abryvu ŭ Visłu
Uviečary 13 vieraśnia ŭ Polščy 23‑hadovaja hramadzianka Biełarusi, jakaja žyvie ŭ Krakavie, jechała na kvadracykle razam z pasažyram uzdoŭž Visły i razam ź im sarvałasia z abryvu ŭ raku. Abodvuch paciarpiełych dastavili ŭ balnicu z surjoznymi traŭmami, piša Most.
Avaryja adbyłasia kala horada Kazimiež-Dolny ŭ Lublinskim vajavodstvie. Pra zdareńnie paviedamiła miascovaja palicyja. Pry hetym u aficyjnym paviedamleńni polskich pravaachoŭnikaŭ hramadzianstva kiroŭcy nie zhadvałasia. Pavodle ž infarmacyi miascovaha resursu Lublin112, kvadracykłam kiravała hramadzianka Biełarusi, jakaja žyvie ŭ Krakavie.
Pavodle paviedamleńnia palicyi, zdareńnie zaŭvažyŭ mužčyna, jaki rybačyŭ na Viśle. Jon ubačyŭ, jak z abryvu ŭ raku źjechaŭ kvadracykł, na jakim znachodzilisia dva čałavieki, i patelefanavaŭ u ekstrannyja słužby.
Na miescy zdareńnia palicyjanty znajšli 23‑hadovuju žycharku Krakava i 34‑hadovaha žychara horada Pułavy. Abodva byli ŭ śviadomaści i ćviarozyja.
Paciarpiełyja raskazali, što jechali na kvadracykle Linhai pa darozie ŭzdoŭž Visły ŭ bok Pułavaŭ. U niejki momant daroha stała vuziejšaj. Dziaŭčyna, jakaja była za rulom, zanadta mocna ŭziała naleva, paśla čaho kvadracykł źjechaŭ z abryvu i ŭpaŭ u raku.
Z-za mocnaha bolu abodvuch paciarpiełych dastavili ŭ balnicu ŭ Pułavy. Jany atrymali surjoznyja traŭmy.
Kamientary