Usie śpievaki źnialisia z kancerta Eda Šyrana paśla taho, jak repiera Makłmora vyhnali za prapaleścinskija vykazvańni

Usie hurty i vykanaŭcy, jakija vystupali na razahrevie ŭ tury Eda Šyrana pa ZŠA, admovilisia ad udziełu paśla taho, jak z tura vyklučyli Makłmora za prapaleścinskija vykazvańni sa sceny, piša Bi-bi-si.

Siarod ich byŭ Fineas, brat pop-zorki Bili Ajliš. U svajoj zajavie jon skazaŭ: «Nielha prymušać artystaŭ maŭčać, kali jany vystupajuć u abaronu pryhniečanych».

Pra svoj sychod taksama abviaścili irłandski śpiavak i aŭtar piesień Aaron Roŭ i dacki hurt Lukas Graham. Irłandski fołk-hurt Beoga, jaki kožny viečar vystupaje razam z Šyranam na scenie, taksama admoviŭsia ad udziełu.

Hetyja zajavy prahučali praź niekalki hadzin paśla taho, jak Šyran zajaviŭ, što nie budzie ŭciahvacca ŭ publičnuju dyskusiju vakoł Hazy, i padkreśliŭ, što mienavita jon nie prymaŭ rašeńnie ab vyklučeńni Makłmora z tura.

«Makłmor syšoŭ z tura pa rašeńni arhanizataraŭ, heta było nie majo rašeńnie», — napisaŭ Šyran u Instagram.

«Ja nikoli nie padvioŭ by fanataŭ, jakija ŭžo spłanavali svaje pajezdki, i nie pakinuŭ by biez padtrymki hastrolnuju kamandu, a taksama inšych vykanaŭcaŭ i muzykaŭ, jakija zaležać ad hetaj pracy i zarablajuć joju na žyćcio», — skazaŭ jon.

Raniej u hetym miesiacy Makłmor — sapraŭdnaje imia Biendžamin Chahierci — padčas dvuch kancertaŭ u Ńju-Džersi zaklikaŭ da «svabodnaj Paleściny» i pakazvaŭ vyjavy razbureńniaŭ u Hazie.

Jaho vykazvańni vyklikali krytyku z boku jaŭrejskich arhanizacyj. Paśla hetaha niekatoryja placoŭki pačali cisnuć na arhanizataraŭ tura, kab tyja vyklučyli jaho z prahramy.

U svajoj zajavie Šyran skazaŭ, što na praciahu ŭsiaho tydnia «doŭha razmaŭlaŭ» z pradstaŭnikami placovak, sprabujučy «znajści masty» pamiž bakami, ale ŭ vyniku arhanizatary tura, Messina Touring Group, vyrašyli spynić supracoŭnictva z Makłmoram.

Pry hetym Šyran zajaviŭ, što jaho «ŭražvaje kanflikt pamiž Izrailem i Paleścinaj», a «pakuty i bol, vyklikanyja z abodvuch bakoŭ, — heta čałaviečaja trahiedyja». Adnak jon taksama pasprabavaŭ rastłumačyć svajo rašeńnie trymacca dalej ad palityčnych pytańniaŭ u svajoj prafiesijnaj dziejnaści.

«Ja nie źjaŭlajusia saŭdzielnikam», — napisaŭ jon. — U mianie jość asabistaje mierkavańnie nakont hetaha razburalnaha kanfliktu. Toje, što ja vybiraju nie vykazvacca publična, nie aznačaje, što ŭ mianie niama svajho mierkavańnia i što mnie ŭsio roŭna».

Skandał pačaŭsia 4 vieraśnia, kali Makłmor vystupiŭ na kancercie Eda Šyrana na stadyjonie MetLife u Ńju-Džersi.

Jon skazaŭ hledačam: «Vialikaja častka pryčyny, čamu ja naohuł chacieŭ adpravicca ŭ hety tur, zaklučajecca ŭ tym, kab ja moh vyjści na stadyjony, padobnyja da hetaha, i skazać dva słovy, jakija vielmi, vielmi darahija majmu sercu: «Svabodnaja Paleścina».

Paśla hetaha jon vykanaŭ svaju pieśniu «Hind's Hall», pryśviečanuju prapaleścinskim pratestoŭcam u Kałumbijskim univiersitecie i z krytykaj vajennych dziejańniaŭ Izraila ŭ Hazie. Na vialikim ekranie ŭ hety čas pakazvali kadry razbureńniaŭ u Hazie.

Častka hledačoŭ vitała jaho słovy vokličami, ale amal adrazu ŭ internecie pačałasia krytyka.

Amierykanska-izrailskaja rada (Israeli American Council) zapuściŭła pietycyju z patrabavańniem vyklučyć jaho z tura. Hrupa StopAntisemitism zajaviła, što muzykant zaśpieŭ fanataŭ źnianacku prapahandaj — hetaje śćviardžeńnie raspaŭsiudziła taksama pop-zorka Pink, jakaja pierapościła jaho ŭ Instagram.

Na nastupny viečar Makłmor znoŭ vyjšaŭ na tuju ž scenu i niepasredna źviarnuŭsia da svaich «jaŭrejskich bratoŭ i siaścior» siarod hledačoŭ.

«Krytyka Izraila, krytyka aparteidu, vystupleńnie suprać hienacydu — usio heta ni ŭ jakim razie nie źjaŭlajecca krytykaj vas», — skazaŭ jon, dadaŭšy, što chacieŭ, kab ludzi ŭ Hazie i na Zachodnim bierazie viedali: pra ich nie zabylisia.

Izrail admaŭlaje abvinavačvańni ŭ hienacydzie, śćviardžajučy, što jaho vajskoŭcy pravodziać u Hazie i na akupavanym Zachodnim bierazie apieracyi pa samaabaronie ŭ adpaviednaści ź mižnarodnym pravam.

• 6
• 4
• 1
• 16
• 1
• 0
• 3
• 1