«Heta vidovišča varta ŭbačyć». Oasis abviaściŭ pra novy suśvietny tur

Lijam i Noel Hałachiery daduć 38 kancertaŭ, u tym liku 11 — u rodnym Mančestery, pryčym usie jany projduć u červieni na «Etychad Stadyjonie» — chatniaj arenie futbolnaha kłuba «Mančester Sici», daŭnim fanatam jakoha źjaŭlajecca Noel. 

Vystupleńni taksama zapłanavanyja ŭ Hłazha, Miunchienie, Paryžy, Amsterdamie, Bostanie i inšych haradach.

Tur startuje ŭ Hłazha ŭ mai 2027 hoda i zavieršycca ŭ vieraśni čatyrma kancertami ŭ Niebuorcie — praz 30 hadoŭ paśla lehiendarnych vystupleńniaŭ Oasis na hetaj placoŭcy na poŭnač ad Łondana.

Dla prodažu biletaŭ budzie ŭviedzienaja novaja sistema papiaredniaj rehistracyi. Takoje rašeńnie pryniata paśla šmatlikich skarhaŭ prychilnikaŭ na košty i šmathadzinnyja čerhi padčas prodažu biletaŭ na tur 2025 hoda, jaki aznamienavaŭ viartańnie Oasis na scenu.

Prychilniki, jakija paśpiachova projduć rehistracyju, atrymajuć śpiecyjalny kod dostupu. Pavodle arhanizataraŭ, takaja sistema pavinna skaracić čerhi i ŭskładnić pracu biletnych śpiekulantaŭ.

Hurt, jaki staŭ adnym z hałoŭnych simvałaŭ epochi bryt-popu dziakujučy takim chitam, jak Wonderwall, Don't Look Back in Anger i Supersonic, užo niekalki tydniaŭ namiakaŭ na praciah svajho rejunijon-turu.

U paniadziełak muzyki apublikavali anons u sacyjalnych sietkach, supravadziŭšy jaho słovami: «Čas pačynać śviatkavać!»

«Paśla pieryjadu razvažańniaŭ «samaja razburalnaja pop-kulturnaja siła ŭ najnoŭšaj historyi Vialikabrytanii» pryznała siabie znoŭ hatovaj da pracy i znoŭ viartajecca, kab padymać ludziam nastroj, — havorycca ŭ zajavie hurta. — Heta budzie vidovišča, jakoje varta ŭbačyć».

Braty Hałachiery abviaścili pra zaviaršeńnie svajho 15‑hadovaha kanfliktu i ŭźjadnańnie Oasis u žniŭni 2024 hoda. Navina vyklikała sapraŭdny ažyjataž vakoł biletaŭ na ich suśvietny tur.

Ahułam 41 kancert u Jeŭropie, Azii, Aŭstralii i Paŭdniovaj Amierycy naviedali bolš za dva miljony čałaviek, a zbory skłali kala 400 miljonaŭ dołaraŭ.

Hurt byŭ zasnavany ŭ 1991 hodzie bratami Noelem i Lijamam Hałachierami ŭ Mančestery. Starejšy, Noel, — hitaryst, aŭtar bolšaści piesień i pradziusar hurta, małodšy, Lijam, — asnoŭny vakalist.

Za hady vystupleńniaŭ braty nabyli sabie reputacyju «drennych chłopcaŭ», pastajanna traplajučy na staronki haziet u suviazi sa skandalnymi situacyjami.

Praciahły pierapynak u ich muzyčnaj karjery źviazvajuć z kanfliktam u 2009 hodzie pamiž bratami, sapraŭdnaja pryčyna jakoha dakładna nie viadomaja.

Usio pačałosia z zajavy Noela Hałachiera, jaki skazaŭ, što «prosta nie moža pracavać ź Lijamam ni dnia bolš». Na praciahu nastupnych 10 hadoŭ braty viali słoŭnuju vajnu i vystupali paasobku.

Kancerty hurta ŭ 1990‑ia hady ličacca lehiendarnymi, a jaho chity Live Forever, Wonderwall, Don't Look Back In Anger, Stop Crying Your Heart Out, Stand Be Me ŭvajšli ŭ suśvietnuju kłasiku pop-muzyki XX stahodździa.

• 0
• 0
• 0
• 0
• 0
• 0
• 0
• 0