Vyzvalena Ludmiła Čekina, dyrektarka Tut.by

Ludmiła Čekina ŭvajšła ŭ pieralik tych palitviaźniaŭ, jakija byli vyzvalenyja i vyviezienyja z krainy 16 vieraśnia.

Hienieralnuju dyrektarku TAA «TUT BAJ MIEDYA» zatrymali 18 maja 2021 hoda. U toj dzień siłaviki pryjšli dadomu nie tolki da jaje, ale i da niekatorych inšych supracoŭnikaŭ kampanii i partniorskich arhanizacyj u miežach kryminalnaj spravy pavodle č. 2 art. 243 KK (uchileńnie ad vypłaty sum padatku, zboraŭ u asabliva bujnym pamiery).

Sud pa spravie Tut.by pačaŭsia tolki ŭ pačatku 2023 hoda i prachodziŭ u zakrytym režymie. Razam z Čekinaj sudzili hałoŭnuju redaktarku najbujniejšaha partała Biełarusi Marynu Zołatavu, redaktarku adździeła ekanomiki i palityki Volhu Łojku, karespandentku Alenu Tałkačovu i juryskonsulta Kaciarynu Tkačenku. Pierad sudom Tałkačova, Łojka i Tkačenka vyjechali za miažu.

Pavialičyć

Ludmile Čekinaj było vystaŭlena abvinavačańnie pavodle troch kryminalnych artykułaŭ: uchileńnie ad vypłaty sum padatkaŭ, zboraŭ u asabliva bujnym pamiery (č. 2 art. 243 KK); arhanizacyja naŭmysnych dziejańniaŭ, skiravanych na raspalvańnie rasavaj, nacyjanalnaj, relihijnaj albo inšaj sacyjalnaj varožaści, učynienych hrupaj asob, što paciahnuła ciažkija nastupstvy (č. 3 art. 130 KK); kiravańnie zaklikami da dziejańniaŭ, skiravanych na naniasieńnie škody nacyjanalnaj biaśpiecy Respubliki Biełaruś, učynienaje z vykarystańniem srodkaŭ masavaj infarmacyi abo hłabalnaj kampjutarnaj sietki Internet (č. 3 art. 361 KK).

U kastryčniku 2022 hoda Kamitet dziaržaŭnaj biaśpieki Biełarusi ŭklučyŭ Ludmiłu Čekinu razam z Marynaj Zołatavaj u śpis asob, «datyčnych da terarystyčnaj dziejnaści».

17 sakavika 2023 hoda sud vynies prysud — 12 hadoŭ kałonii va ŭmovach ahulnaha režymu i štraf u pamiery 1000 bazavych vieličyń (37 000 rubloŭ). Termin jana adbyvała ŭ žanočaj kałonii № 4 u Homieli. Na voli jaje čakaŭ syn.

Ludmiła Čekina naradziłasia 13 lipienia 1973 hoda ŭ rasijskim Sierhijevym Pasadzie. Jaje baćka — kadravy vajskoviec, tamu siamja šmat pierajazdžała i jašče da razvału SSSR asieła ŭ Žodzinie na Minščynie.

Sama jana sa škoły zacikaviłasia jurysprudencyjaj: spačatku z čyrvonym dypłomam skončyła jurydyčny technikum, a paśla i jurfak BDU. Pačynała karjeru jurystkaj u Žodzinie, u 2008 hodzie pierajechała ŭ Minsk, dzie ŭ statusie juryskonsultki dałučyłasia da kampanii «Nadziejnyja sistemy». U 2012‑m Čekina stała hienieralnaj dyrektarka «Nadziejnych sistem». Paźniej skončyła kurs Executive MBA ŭ Biźnies-škole IPM. U 2017‑m uznačaliła «TUT BAJ MIEDYA».

• 5
• 0
• 0
• 0
• 0
• 1
• 1
• 1