U Biełaruś z Polščy sprabavali ŭvieźci aŭtamabil sa źmienienym VIN
Na Bresckaj mytni spynili sprobu ŭvieźci z Polščy ŭ Biełaruś aŭtamabil SEAT Alhambra sa źmienienym VIN-numaram. Mašynu sprabavali aformić jak užo zarehistravanuju na terytoryi JEAES, kab nie płacić mytnyja zbory, paviedamlaje pres-słužba Dziaržaŭnaha mytnaha kamiteta.
47‑hadovy biełarus uvioz aŭtamabil praz punkt propusku «Brest». Padčas kantrolu jon padaŭ mytnikam techpašpart, ale źviestki ŭ im nie adpaviadali faktyčnaj markiroŭcy mašyny.
Mytniki źviarnuli ŭvahu na mietaličnuju płaścinu z VIN-numaram pad kapotam. Jana była zamacavanaja nie zavodskim sposabam. Ekśpiertyza paćvierdziła, što markiroŭku aŭtamabila źmianili: častku kuzaŭnoj paneli z aryhinalnymi identyfikacyjnymi znakami vydalili i zamianili samarobnym frahmientam.
Aŭtamabil acenačnym koštam bolš za 30 tysiač rubloŭ kanfiskavali da rašeńnia suda.
Bresckaja mytnia pačała administracyjny praces pavodle častki 2 artykuła 15.1 KaAP. Hety artykuł praduhledžvaje štraf da 30 bazavych vieličyń, a taksama mahčymuju kanfiskacyju transpartnaha srodku.
Akramia taho, pravodzicca pravierka pa prykmietach złačynstva, praduhledžanaha artykułam 381 Kryminalnaha kodeksa Biełarusi. Jon tyčycca padrobki, źniščeńnia identyfikacyjnaha numara transpartnaha srodku abo rehistracyjnych znakaŭ.
Ciapier čytajuć
KDB zapuściŭ novy bot u telehramie dla viarboŭki biełarusaŭ za miažoj. Prapanujuć rasklejvać ulotki, fatahrafavać abjekty i «niešta inšaje»7
Kamientary