Zakonaprajekt pra maštabnyja sankcyi suprać Rasii narešcie vyniesuć na hałasavańnie ŭ Pałacie pradstaŭnikoŭ ZŠA. Ale jaho mohuć zabłakavać demakraty

Asnoŭnyja pieraściarohi kanhresmienaŭ-demakrataŭ źviazanyja z tym, što hety zakonaprajekt moža dać prezidentu ZŠA Donaldu Trampu zanadta šyrokija paŭnamoctvy ŭ śfiery mytnaj palityki. Lidar demakratyčnaj mienšaści ŭ Pałacie pradstaŭnikoŭ Chakim Džefrys vystupiŭ suprać dakumienta mienavita z-za hetych pieraściaroh.

Raniej respublikanskaje kiraŭnictva Pałaty pradstaŭnikoŭ nie ŭklučała zakonaprajekt u paradak dnia paśla viartańnia kanhresmienaŭ sa žnivieńskich kanikuł. Ciapier ža Kamitet Pałaty pradstaŭnikoŭ pa pracedurnych pytańniach pryznačyŭ na paniadziełak pasiadžeńnie, pryśviečanaje jaho razhladu.

Padtrymka zakonaprajekta siarod respublikancaŭ Pałaty pradstaŭnikoŭ taksama zastavałasia nie vielmi aktyŭnaj. Paśla raptoŭnaj śmierci adnaho z hałoŭnych prychilnikaŭ dakumienta, sienatara Lindsi Hrema, padtrymka na peŭny čas uzmacniłasia, ale paźniej hety impuls asłabieŭ.

Prychilniki zakonaprajekta ličać, što jon daść Trampu dadatkovyja instrumienty dla cisku na prezidenta Rasii Uładzimira Pucina, kab prymusić jaho spynić vajnu suprać Ukrainy.

Dakumient praduhledžvaje abaviazkovyja sankcyi suprać rasijskaha kiraŭnictva i enierhietyčnaha siektara, a taksama suprać asob i kampanij, jakija supracoŭničajuć z rasijskaj abaronnaj pramysłovaściu i tak zvanym cieniavym fłotam.

Adnačasova zakonaprajekt dazvolić Trampu ŭvodzić 100‑pracentnyja myty suprać najbujniejšych pakupnikoŭ rasijskaj nafty. Mienavita heta vyklikaje najbolšyja aściarohi demakrataŭ. Jany adznačajuć, što administracyja Trampa i tak hatovaja vykarystoŭvać myty jak suprać praciŭnikaŭ ZŠA, tak i suprać ich sajuźnikaŭ.

Demakraty zajavili, što prezident i biez novaha zakonoprajekta maje dastatkova paŭnamoctvaŭ dla sankcyj suprać kampanij, fizičnych asob i sudnaŭ, jakija padtrymlivajuć rasijskuju vajskovuju mašynu. Na ich dumku, Kanhresu nie treba davać prezidentu dadatkovyja paŭnamoctvy ŭ śfiery mytaŭ, kab sankcyi suprać Rasii mahli być uviedzienyja ŭžo ciapier.

Adzin z demakrataŭ, Hrehary Miks, zajaviŭ u piatnicu, što Bieły dom ciśnie na śpikiera Pałaty pradstaŭnikoŭ Majka Džonsana dla pryniaćcia dakumienta, pakolki Tramp nibyta zacikaŭleny pierš za ŭsio ŭ atrymańni novych mytnych paŭnamoctvaŭ, a nie ŭ dadatkovych instrumientach suprać Rasii.

Paśla paviedamleńnia pra budučaje hałasavańnie prychilniki zakonaprajekta zaklikali Pałatu pradstaŭnikoŭ jaho padtrymać. Sienatarka-demakratka Džyn Šachin zajaviła, što pryniaćcie dakumienta dazvolić nanieści ŭdar pa dachodach Kramla i ŭzmacnić cisk na Pucina, kab jon sieŭ za stoł pieramoŭ.

U žniŭni Sienat ZŠA padtrymaŭ zakonoprajekt 86‑ciu hałasami suprać 11-ci.

Adzin ź jeŭrapiejskich čynoŭnikaŭ, jaki havaryŭ z Politico na ŭmovach ananimnaści, zajaviŭ, što na Rasiju nieabchodna maksimalna cisnuć sankcyjami. Na jaho dumku, zakonaprajekt nie idealny, ale jon moža dać amierykanskaj administracyi dadatkovyja vahary cisku na Rasiju i stanie važnym palityčnym i simvaličnym sihnałam padtrymki Ukrainy.

• 1
• 0
• 0
• 1
• 0
• 0
• 1
• 0