Apple prezientavała pieršy składny ajfon

Usiaho na druhim tydni pracy na pasadzie hienieralnaha dyrektara Apple Džon Ternus abviaściŭ pra samaje radykalnaje źmianieńnie źniešniaha vyhladu ajfonaŭ za amal 20‑hadovuju historyju jaho isnavańnia, piša Bi-bi-si.

U sieradu Ternus, jaki źmianiŭ na čale Apple Cima Kuka, źjaviŭsia na tradycyjnaj prezientacyi novych praduktaŭ kampanii pierad hihanckaj vyjavaj pieršaha ŭ historyi składnoha iPhone.

Pryłada, jakaja nahadvaje knihu, pad nazvaj Duo — jašče i samy vialiki ajfon u historyi. A pakolki ŭ ZŠA hety telefon budzie kaštavać ad 1999 da 3199 dalaraŭ, jon jašče i samy darahi.

Pavialičyć

Ternus zajaviŭ, što dyzajn Duo «natchniony iPad», adnak nazvaŭ asablivaści hetaha telefona-raskładanki «płastyčnym i całkam intuityŭnymi».

Śpiecyjalisty Apple pracavali nad składnym ajfonam na praciahu niekalkich papiarednich hadoŭ.

U raskładzienym vyhladzie Duo padobny da nievialikaha ajpada. Kali jaho skłaści, jon vyhladaje jak šyroki iPhone.

Padčas prezientacyi Ternus skazaŭ, što Apple imknułasia paźbiehnuć paŭtareńnia dyzajnu inšych telefonaŭ-raskładanak, jakija ŭžo jość na rynku. Pavodle jaho słoŭ, pradukcyja kankurentaŭ «padobnaja da dvuch telefonaŭ, składzienych razam, u vyniku čaho bolš šyroki ekran adčuvajecca jak značna mienšy».

Novy hiendyrektar — taksama pradukt?

Duo, praciahnuŭ Ternus, — heta «vynik cełaj sieryi vydatnych inavacyj, jakija, jak my spadziajomsia, pierahledziać dośvied vykarystańnia składanaha telefona».

Prykmietna, što Ternus niepasredna ŭdzielničaŭ u raspracoŭcy novaj pryłady, pakolki šmat hadoŭ uznačalvaŭ padraździaleńnie Apple pa raspracoŭcy aparatnaha zabieśpiačeńnia.

Pavialičyć

Na dumku Bena Vuda z kampanii CCS Insight, Ternusa, vierahodna, śpiecyjalna pryznačyli na pasadu hienieralnaha dyrektara «ŭ momant, kali byŭ zapłanavany adzin z najbolš značnych zapuskaŭ novaha iPhone za mnohija hady».

«U Apple ničoha nie adbyvajecca vypadkova», — dadaje Vud.

Ekśpiertka kampanii Creative Strategies Karalina Miłaniezi, jakaja prysutničała na prezientacyi, ličyć, što Ternus byŭ u samym centry padziej, i «heta praktyčna stvarała adčuvańnie, što jon taksama byŭ adnym z praduktaŭ».

Źmiena dyzajnu ajfona moža być adkazam na krytyku tych, chto kazaŭ, što paśla źjaŭleńnia pieršaha telefona Apple u 2007 hodzie kampanija tak i nie stvaryła nivodnaj pa-sapraŭdnamu revalucyjnaj i papularnaj navinki.

Čamu heta ryzyka?

«Hetaja raskładanka ryzykuje stać jašče adnym darahim upryhožańniem ich partfiela, jakoje zabiaśpiečvaje prestyž, ale nie daje značnaha rostu», — ličyć Dypandžan Čaterdžy z analityčnaj kampanii Forrester.

U sieradu Apple taksama pradstaviła novyja iPhone 18 Pro i 18 Pro Max, ceny na jakija ŭ ZŠA buduć pačynacca ad 1199 i 1299 dalaraŭ adpaviedna.

Čaterdžy kaža, što składany iPhone moža napatkać los pryłady Apple's Vision Pro —akularaŭ dapoŭnienaj realnaści, jakija kampanija pradaje za 3699 dalaraŭ i jakija nie nabyli vialikaj papularnaści siarod karystalnikaŭ.

Ale hetaja «raskładanka» moža stać i novymi Apple Watch — praduktam, jaki štohod kuplajuć miljony ludziej pa ŭsim śviecie, choć jon i nie pradajecca tak paśpiachova, jak iPhone.

Jašče adzin faktar ryzyki — zvyčka karystalnikaŭ da asnoŭnych pryncypaŭ pracy iPhone, jakaja moža pieraškodzić vysokim prodažam «raskładak».

«Składanyja telefony — heta davoli admietnyja pryłady, — tłumačyć Miłaniezi. — Mnohich ludziej jany ŭ pryncypie cikaviać, ale kab pierajści ad zvyčajnaha telefona da składanaha, treba davoli surjozna pieranavučycca, u tym liku z punktu hledžańnia vykarystańnia prahramnaha zabieśpiačeńnia».

Vud adznačaje, što na dolu ŭžo isnych «raskładak» ad takich kampanij, jak Samsung i Huawei, prypadaje tolki 2% usich prodažaŭ smartfonaŭ. Čakajecca, što novaja pryłada Apple padšturchnie cikavaść i popyt na ich, ale ŭ kampanii CCS Insight miarkujuć, što na praciahu nastupnaha dziesiacihodździa takija telefony «zojmuć» tolki 4% rynku.

iPhone zastajecca samym papularnym praduktam Apple, zabiaśpiečvajučy bolš za pałovu jaje štohadovych prodažaŭ. U apošnija kvartały Apple z honaram adznačała, što popyt na jaje smartfony zastajecca na samym vysokim u historyi ŭzroŭni, a prezientacyja apošnich viersij iPhone stała samym paśpiachovym zapuskam jaje novaha praduktu.

Novaja Siri sa štučnym intelektam

U sieradu Apple taksama raspaviała pra budučy pierazapusk svajho hałasavoha i tekstavaha pamočnika Siri, jaki ciapier budzie nazyvacca Siri AI (heta značyć «Siri II»).

Jon budzie ŭstaloŭvacca na madelach ajfona, pačynajučy z iPhone 18, i atrymaje dostup da ŭsioj infarmacyi, jakaja źmiaščajecca ŭ telefonie, u tym liku da tekstavych paviedamleńniaŭ i elektronnych listoŭ. Heta dazvolić pamočniku znachodzić infarmacyju, adkazvać na pytańni i ździajśniać roznyja dziejańni ad imia karystalnika.

Pavialičyć

Niekatoryja funkcyi Siri AI taksama buduć dastupnyja na novych hadzińnikach Apple Watch. U tym liku pamočnik zmoža zapisvać razmovy i transkrybavać ich, kali takaja funkcyja budzie ŭklučanaja.

Ternus nazvaŭ novyja mahčymaści iPhone z vykarystańniem štučnaha intelektu «razumnym piersanalnym chabam» i pryznaŭ, što Apple zmoža ŭličvać «samyja asabistyja padrabiaznaści vašaha paŭsiadzionnaha žyćcia».

Hienieralny dyrektar nastojvaje, što ŭsia hetaja infarmacyja budzie zastavacca niedatykalnaj, pakolki funkcyi ŠI buduć časta pracavać «niepasredna na pryładzie», to-bok biez udziełu inšych kampanij. Kali ž dla karektnaj pracy spatrebicca ŭdzieł inšych kampanij, zapeŭnivaje Ternus, niedatykalnaść asabistaj infarmacyi budzie zachoŭvacca i pry jaje zachavańni ŭ «vobłaku».

«Niekatoryja miarkujuć, što takuju infarmacyju možna źbirać i zachoŭvać, — skazaŭ Ternus. — Ale tut navat Apple nie zmoža atrymać dostup da taho, što naležyć tolki vam».

• 1
• 0
• 2
• 0
• 0
• 0
• 0
• 0