Reziervistaŭ u Maskvie pačnuć adpraŭlać u atrady pa źniščeńni bieśpiłotnikaŭ
Bajcam abiacajuć zarobak ad 2300 dalaraŭ i premii za kožny źbity dron.
Ministerstva abarony Rasii vyrašyła stvaryć u Maskoŭskaj vajskovaj akruzie (MVA) śpiecyjalnyja atrady dla pierachopu bieśpiłotnikaŭ, jakija buduć papaŭniać za košt rasijan, što znachodziacca ŭ reziervie, piša Moscow Times.
«U metach uzmacnieńnia supraćpavietranaj abarony krytyčna važnych abjektaŭ na terytoryi MVA pryniata rašeńnie ab farmiravańni śpiecyjalizavanych adździaleńniaŭ FPV-pierachopnikaŭ sa składu reziervistaŭ», — paviedamili TASS u pres-słužbie akruhi.
Miarkujecca, što reziervisty buduć zajmacca «apieratyŭnym procidziejańniem» dronam i «zabieśpiačeńniem nadziejnaj abarony abjektaŭ vajennaj i hramadzianskaj infrastruktury». Dla hetaha jany buduć vykarystoŭvać «vysakachutkasnyja FPV-drony-pierachopniki».
Na hety momant vajskoŭcy rychtujuć instruktaraŭ, jakija buduć navučać reziervistaŭ kiravańniu pierachopnikami. Pry hetym u instruktary nabirajuć udzielnikaŭ vajny va Ukrainie.
U MVA, akramia Maskvy i Maskoŭskaj vobłaści, uvachodziać Biełharodskaja, Branskaja, Uładzimirskaja, Varoniežskaja, Ivanaŭskaja, Kałužskaja, Kastramskaja, Kurskaja, Lipieckaja, Nižaharodskaja, Arłoŭskaja, Razanskaja, Smalenskaja, Tamboŭskaja, Ćviarskaja, Tulskaja i Jarasłaŭskaja vobłaści.
U červieni ministr abarony RF Andrej Biełavusaŭ paviedamiŭ ab pracy pa stvareńni mabilnych ahniavych hrup (MAH) dla procidziejańnia dronam. U pryvatnaści, takija hrupy źjavilisia ŭ Leninhradskaj vobłaści, dzie jany abaraniajuć krytyčna važnuju infrastrukturu i pradpryjemstvy.
Pry hetym MAH farmirujuć za košt reziervistaŭ, jakija padpisvajuć trochhadovy kantrakt, kazaŭ hubiernatar rehijona Alaksandr Draździenka. Bajcam abiacajuć zarobak ad 200 tysiač rasijskich rubloŭ (2300 dalaraŭ) i premii 100 tysiač rasijskich rubloŭ (1150 dalaraŭ) za kožny źbity dron. Taksama kantrakt praduhledžvaje abaviazkovaje strachavańnie žyćcia i zdaroŭja na sumu 2 młn rubloŭ (23 tysiač dalaraŭ). Zapisacca ŭ MAH mohuć mužčyny va ŭzroście da 62 hadoŭ.
Kamientary