Muravanku Chraptovičaŭ pad Navahrudkam pradali za dźvie bazavyja adzinki
Słavutaja Muravanka Chraptovičaŭ u Ščorsach Navahrudskaha rajona narešcie znajšła novaha ŭładalnika. 4 vieraśnia nieahatyčny haspadarčy kompleks pradali na elektronnych tarhach za 94,50 rubla — usiaho dźvie bazavyja adzinki ź nievialikaj nadbaŭkaj, piša vydańnie Domovita.by.
Heta była ŭžo šostaja sproba pradać abjekt. Upieršyniu falvarak vystavili na prodaž u červieni 2025 hoda amal za 298 tysiač rubloŭ. Pakupnikoŭ nie znajšłosia, tamu košt pastupova źnižali: spačatku na 50%, a zatym na 80%, pakul łot nie vystavili za dźvie bazavyja adzinki.
Na sioletnija tarhi padali zajaŭki dva patencyjnyja pakupniki, ale da finalnaj rehistracyi dajšoŭ tolki adzin. U vyniku aŭkcyjon zaviaršyŭsia za niekalki siekund. Novym uładalnikam kompleksu stała staličnaja kampanija, jakaja zajmajecca darožnym budaŭnictvam.
Kompleks u Ščorsach pabudavali ŭ druhoj pałovie XIX stahodździa jak uzorny haspadarčy dvor majontka mahnataŭ Chraptovičaŭ. Jaho naŭmysna aformili ŭ nieahatyčnym zamkavym styli: z čyrvonaj cehły ŭźviali masiŭnyja budynki, viežy i hłuchuju aharodžu. Zdalok haspadarka bolš nahadvała cytadel, čym zvyčajny sielskahaspadarčy kompleks.
Dla svajho času Muravanka była pieradavoj haspadarkaj. Tut vyrablali masła i syr pavodle šviejcarskich technałohij, apracoŭvali draŭninu, razvodzili plemiannych hałandskich karoŭ i parodzistych koniej.
Jašče ŭ kancy XVIII stahodździa kancler Iachim Chraptovič admianiŭ u svaich uładańniach panščynu i vyzvaliŭ sialan amal za 70 hadoŭ da sialanskaj reformy ŭ Rasijskaj impieryi.
Paśla nacyjanalizacyi ŭ 1939 hodzie kompleks pierajšoŭ da miascovaha kałhasa. Budynki vykarystoŭvali dla ŭtrymańnia cialat i zachoŭvańnia zbožža. Z časam praz adsutnaść naležnaha dohladu i ramontu pabudovy pačali razburacca: dachi abvalilisia, a sam falvarak pieratvaryŭsia ŭ ruiny.
U skład pradadzienaha kompleksu ŭvachodziać dva kapitalnyja cahlanyja budynki ahulnaj płoščaj bolš za 1500 kvadratnych mietraŭ. Siarod ich — byłyja vieterynarnaja lačebnica, cialatniki, karoŭnik i śviran. Zachavalisia taksama viežy i asobnyja frahmienty aharodžy.
Razam z budynkami novy ŭładalnik atrymaŭ prava arendy ziamielnaha ŭčastka płoščaj kala 6,4 hiektara na 50 hadoŭ.
Muravanka maje status historyka-kulturnaj kaštoŭnaści. Tamu restaŭracyja i lubyja budaŭničyja raboty tut buduć patrabavać uzhadnieńnia ź Ministerstvam kultury. Heta tyčycca taksama supraćavaryjnych rabot i prajektaŭ adnaŭleńnia.
Pierad novym uładalnikam staić vialikaja praca, adnak histaryčnaja architektura i vialikaja terytoryja stvarajuć mahčymaści dla roznych prajektaŭ. U budučyni tut mahli b źjavicca turystyčny kompleks, art-prastora abo zaharadny hatel, jaki vykarystaŭ by histaryčnuju atmaśfieru miesca.
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku23
Kamientary