U Ščorsach znoŭ pradajuć «Muravanku Chraptovičaŭ». Hetym razam za 84 rubli
U ahraharadku Ščorsy Hrodzienskaj vobłaści pradajuć kompleks zakinutych haspadarčych pabudoŭ, jakija kaliści byli častkaj znakamitaj siadziby Chraptovičaŭ — adnaho z mahnackich rodaŭ u historyi Biełarusi. Abjava źjaviłasia na placoŭcy «BUTB-Majomaść».
Ekśpierty acanili kompleks u $100 tys., ale pakupnikoŭ za takuju canu nie znajšłosia. Ciapier abjekt znoŭ vystaŭleny na tarhi, i jaho košt źniziŭsia da dvuch bazavych vieličyń. Zaraz heta 84 rubli, piša Office Life.
Kupić možna vietlačebnicu, cialatnik, karoŭnik, ambar i inšyja zbudavańni ahulnaj płoščaj bolš za 1,5 tys. «kvadrataŭ». Pabudovy vykananyja ŭ charakternym dla svajho času zamkavym styli z cahlanymi fasadami, viežami i masiŭnymi ścienami, jakija nahadvajuć abarončyja zbudavańni. Pradaŭcom vystupaje Ščorsaŭski sielski vykanaŭčy kamitet.
Pieramožca aŭkcyjonu atrymaje ŭ arendu na 50 hadoŭ ziamielny ŭčastak płoščaj kala 6,4 ha z historyka-kulturnym pryznačeńniem. Jaho možna budzie vykarystoŭvać dla žyłoj, administracyjnaj abo handlovaj ci inšaj zabudovy na padstavie navukovaj dziejnaści, uzhodnienaj ź Ministerstvam kultury ŭ vypadku źmianieńnia pryznačeńnia nieruchomaj majomaści.
Zajaŭki na ŭdzieł u aŭkcyjonie prymajucca da 18 śniežnia. Sam aŭkcyjon projdzie ŭ elektronnym farmacie 22 śniežnia na płatformie «BUTB-Majomaść».
Kamientary
Dy pavodle zakonu my majem nastupnyja nasielennyja punkty: chutar, vioska, ahraharadok, horad.
Miastečka voś nažal niama.