Na Tydzień biełaruskaj kultury Muziej Łuckieviča pieratvorycca ŭ muziej Popki

U centry Tydnia — novaja vystava z kalekcyi Juryja Popki, častku jakoj udałosia ŭratavać i pieravieźci ź Niamieččyny ŭ Vilniu. Tekstyl, knihi, časopisy, paštoŭki, listy i inšyja rečy na adzin tydzień źmieniać muziejnuju prastoru i stanuć nahodaj pahutaryć nie tolki pra adnu kalekcyju, ale i pra los biełaruskaj kulturnaj spadčyny ŭvohule.

Ci moža čałaviek zahadzia pakłapacicca pra toje, što zastaniecca paśla jaho? Što adbyvajecca z pryvatnymi zborami, kali ich uładalnikaŭ bolš niama? Čamu adny rečy pieražyvajuć dziesiacihodździ i pierajezdy, a inšyja hublajucca nazaŭsiody? Chto i jak vyrašaje, što varta zachavać?

Hetyja pytańni buduć hučać ciaham usiaho Tydnia — u vystavie, razmovach, teatry, muzycy, majstar-kłasach i navat za stałom.

Prahrama

Paniadziełak: adkryćcio vystavy i lekcyja.

Kłopat: lekcyja pra toje, jak u muziejach dahladajuć za ekspanatami i jak paŭtaryć heta doma.

Aŭtorak: histaryčna-hastranamičny viečar.

Biełaruś, Litva i Niamieččyna sustrenucca za adnym stałom. Pahutarym pra kulinarnyja tradycyi troch krainaŭ, pahladzim paštoŭki z kalekcyi Popki i pašukajem tam ślady paŭsiadzionnaha žyćcia i ježy.

I, viadoma ž, usio pradehustujem.

Sierada: dyskusija pra spadčynu.

Što paśla nas (nie) zastaniecca.

Viečar dla tych, chto lubić składanyja pytańni biez prostych adkazaŭ;

— majstar-kłas pa vyšyŭcy pavodle ŭzoraŭ z kalekcyi Popki: vyšyvajem, a paśla pieratvarajem svaje pracy ŭ termanalepki.

Čaćvier: vychodny.

Piatnica: biełaruskaja dramaturhija ŭhołas.

Kamanda biełaruskich akcioraŭ i režysioraŭ TeArtas na čale ź Siarhiejem Zdarankovym pradstavić akciorskuju čytku pjesy Franciška Alachnoviča «Pan Ministr» (dziakujučy archivam našaha muzieju). Impreza adkryje novy prajekt «Retraśpiektyva biełaruskaj dramaturhii», pryśviečany viartańniu da biełaruskich dramaturhičnych tekstaŭ i ich novamu hučańniu siońnia.

Subota: vialiki dzień u Biełaruskim Domie.

U prahramie:

— kuratarskaja ekskursija pa vystavie;

— majstar-kłas pa marmuravańni papiery;

— dziciačaja majsternia, dzie ŭdzielniki buduć stvarać svoj maleńki dom i vyroščvać u im čaroŭnaje dreva;

— kirmaš biełaruskich majstroŭ i nievialički knižny kirmašyk;

— kancertnaja častka.

A jašče ciaham Tydnia vy možacie sami adčuć siabie na miescy ekspanata biełaruskaj spadčyny. Bo ŭ muziei budzie pracavać admysłovaja imiersiŭnaja prastora. Vas viazuć ź Niamieččyny ŭ Litvu. Vas treba davieźci, nie zhubić, nie sapsavać, nie dać vas źjeści žukam i, u rešcie rešt, vyznačycca: ci patrebnyja vy kamuści nastolki, kab vas zachavać?

IV Tydzień biełaruskaj kultury projdzie 7—13 vieraśnia ŭ Vilenskim biełaruskim muziei imia Ivana Łuckieviča (Vilniaus g. 20).

• 1
• 0
• 0
• 0
• 0
• 0
• 0
• 1