Niamieckaha futbalista atruciŭ jaho adnakłubnik. Mahčyma, praz reŭnaść

U siaredzinie červienia 2025 hoda hulcy amatarskaha futbolnaha kłuba TuS 1912 Rockenberg, jaki vystupaje ŭ Krajślizie — vośmym dyvizijonie niamieckaha futboła, adpravilisia ŭ tradycyjnuju paślasiezonnuju pajezdku ŭ Drezden. U prahramie byli ekskursii, volny čas i pachod pa Saksonskaj Šviejcaryi. Na piatnicu byli zapłanavanyja kulturnaja prahrama i volny čas, na subotu — pachod pa Saksonskaj Šviejcaryi ź viartańniem pa Elbie, a ŭ niadzielu ŭsie pavinny byli raźjechacca pa damach.

Siarod udzielnikaŭ byŭ 30‑hadovy Filip Ł., jaki hulaŭ za kamandu ź dziacinstva i za hety čas paśpieŭ pabyć i bramnikam, i abaroncam, i napadnikam. Jak zhadvajuć adnakłubniki, užo padčas vandroŭki Filip adčuvaŭ siabie nie vielmi dobra. Paśla viartańnia damoŭ u niadzielu jaho stan rezka pahoršyŭsia. Siamja vyklikała chutkuju. Filipa dastavili ŭ balnicu, ale vyratavać nie zmahli. 16 červienia, za niekalki dzion da svajho 31‑ha dnia naradžeńnia, mužčyna pamior.

Spačatku śmierć nie vyhladała kryminalnaj. U atačeńni Filipa mierkavali, što mužčyna moh atrucicca rybaj, jakuju jeŭ padčas pajezdki. Adnak jaje jeli i inšyja členy kamandy.

Prakuratura pačała vyśviatlać pryčynu śmierci. Paśla ŭskryćcia spatrebilisia składanyja taksikałahičnyja daśledavańni, i praź niekalki miesiacaŭ vyśvietliłasia: Filip pamior ad septyčnaj paliorhannaj niedastatkovaści, vyklikanaj atručvańniem.

Što heta byŭ za jad, nie paviedamlajuć dahetul. Prakuratura i palicyja śviadoma nie raskryvajuć ni nazvy rečyva, ni taho, jakim čynam jano mahło trapić u arhanizm Filipa, ni inšych padrabiaznaściaŭ mierkavanaha złačynstva. Ułady tłumačać heta intaresami śledstva: takaja infarmacyja moža mieć značeńnie dla dalejšaha rasśledavańnia. Samu spravu prakuror nazyvaje vyklučnaj, bo zabojstvy z vykarystańniem jadu ŭ Hiermanii zdarajucca vielmi redka.

Padazravany — partnior pa kamandzie

Pastupova ŭ centry rasśledavańnia apynuŭsia Maryus V. Palicyja apytała vialikuju kolkaść śviedkaŭ i asabliva staranna vyvučała adnosiny pamiž im i zahinułym. Urešcie śledčyja zapadozryli, što Filipa atrucili naŭmysna, a jad jamu moh tajemna dać Maryus padčas pajezdki ŭ Drezden.

1 vieraśnia 2026 hoda, bolš čym praz čatyrnaccać miesiacaŭ paśla śmierci Filipa, 35‑hadovaha Maryusa zatrymali. Da apieracyi pryciahnuli śpiecpadraździaleńnie palicyi. Adnačasova prajšli pieratrusy doma ŭ padazravanaha i na jaho pracy.

Futboł dla Maryusa, jak i dla astatnich hulcoŭ hetaha amatarskaha kłuba, nie byŭ prafiesijaj: jon pracavaŭ u haradskoj administracyi Nidatala i zajmaŭsia pytańniami hrantaŭ i subsidyj. Tamu palicyjanty pryjšli i ŭ ratušu. Byli kanfiskavanyja telefon, kampjutar i inšyja nośbity infarmacyi; śledčych taksama cikavili mahčymyja ślady atrutnaha rečyva.

Paśla zatrymańnia sud adpraviŭ Maryusa ŭ SIZA. Raniej jon nie byŭ sudzimy, a ciapier skarystaŭsia pravam zachoŭvać maŭčańnie i pakazańniaŭ nie daje.

Navošta atručvać?

Hałoŭnaje pytańnie ŭ hetaj historyi — navošta Maryusu mahło spatrebicca zabivać svajho adnakłubnika. Prakuratura havoryć pra asabistuju pomstu, ale za što mienavita Maryus moh pomścić Filipu, nie raskryvaje.

Niamieckija ŚMI sprabujuć daviedacca mahčymuju pryčynu. Hessenschau sa spasyłkaj na ŭłasnuju infarmacyju nazyvaje mahčymym matyvam reŭnaść. U Rokienburhu, jak paviedamlaje miascovaja presa, chodziać čutki, što pamiž mužčynami moh być kanflikt z-za žančyny. Aficyjna heta nie paćvierdžana.

Dadatkovuju intryhu stvaraje toje, što na momant aryštu Maryus rychtavaŭsia da viasielnaj uračystaści, jakaja, pavodle RTL, była zapłanavanaja na siaredzinu vieraśnia. Pry hetym niama źviestak, što žančyna, ź jakoj moh być źviazany mierkavany kanflikt, była jaho niaviestaj.

Ciapier śledčyja vyvučajuć kanfiskavanyja elektronnyja nośbity i płanujuć novyja dopyty śviedkaŭ, kab vyśvietlić usie abstaviny i matyŭ mierkavanaha złačynstva. Prakuror padkreślivaje, što rasśledavańnie pakul «u samym pačatku».

Maryus V. zastajecca padazravanym. Kali sprava dojdzie da abvinavačańnia ŭ zabojstvie i sud pryznaje jaho vinavatym, mužčynu moža pahražać pažyćciovaje źniavoleńnie.

• 1
• 1
• 0
• 1
• 3
• 1
• 0
• 0