Maci paskardziłasia na traŭmy 5‑hadovaha syna ŭ psichijatryčnaj balnicy Homiela. Što adkazali daktary
Maci piacihadovaha chłopčyka ź invalidnaściu zajaviła ŭ Threads, što jaje syn atrymaŭ traŭmy padčas lačeńnia ŭ dziciačym psichijatryčnym adździaleńni №7 Homielskaj abłasnoj kliničnaj psichijatryčnaj balnicy. Žančyna śćviardžaje, što paśla vypiski zaŭvažyła ŭ dziciaci hiematomy na tvary i za vucham. U balnicy prakamientavali incydent, paćvierdziŭšy, što chłopčyk atrymaŭ lohkuju traŭmu ŭ vyniku sutyčki ź inšym pacyjentam, piša Onliner.
Dzicia znachodziłasia ŭ adździaleńni z 10 pa 25 žniŭnia — tam jamu paćviardžali dyjahnaz i padbirali lačeńnie. Pavodle słoŭ maci, baćki nie mohuć znachodzicca razam ź dziećmi ŭ hetym adździaleńni.
Ranicaj 25 žniŭnia, pierad tym jak zabrać syna, žančyna patelefanavała ŭ balnicu. Joj paviedamili, što napiaredadni ŭnačy inšaje dzicia ŭdaryła jaje syna pa ščace i paśla hetaha ŭ chłopčyka zastaŭsia siniak. Adnak paśla pryjezdu maci vyjaviła ŭ dziciaci hiematomy nie tolki na ščace, ale taksama ŭ rajonie močki vucha, za vucham i pad vokam.
Pavodle słoŭ žančyny, jaje syn nie razmaŭlaje i nie zmoh rastłumačyć, što adbyłosia. Jana paprasiła zaprasić kiraŭnictva adździaleńnia i dać knihu zaŭvah i prapanoŭ. Skarhu maci napisała, adnak, pavodle jaje słoŭ, z hałoŭnym doktaram abo jaho namieśnikam joj pahavaryć nie ŭdałosia.
U toj ža dzień žančyna źviarnułasia ŭ milicyju i prajšła ź dziciem sudova-miedycynskaje abśledavańnie. Taksama jana nakiravała zvarot u Ministerstva achovy zdaroŭja.
Maci śćviardžaje, što paśla vypiski zaŭvažyła źmieny ŭ pavodzinach syna. Pavodle jaje słoŭ, dzicia stała zakryvać hałavu pry rezkich ruchach, taksama ŭ jaho źjaviłasia nietrymańnie.
U balnicy paviedamili, što pa zvarocie maci pačałasia ŭnutranaja pravierka. Hałoŭny doktar ustanovy Alaksandr Citko zajaviŭ u kamientary «Homielskaj praŭdzie», što kančatkovyja vysnovy možna budzie zrabić tolki paśla jaje zaviaršeńnia. Pravavuju acenku tamu, što adbyłosia, pavodle jaho słoŭ, daduć pa vynikach pravierki milicyi.
— Pavodle najaŭnaj infarmacyi, incydent ź piacihadovym synam Anastasii adbyŭsia ŭ chole adździaleńnia na vačach miedycynskaha piersanału. U vyniku impulsiŭnych i spantannych pavodzin inšaha dziciaci chłopčyk atrymaŭ lohkuju traŭmu. Dziaciej imhnienna raźniali, kanflikt byŭ spynieny. Pacyjenta adrazu ž ahledzieli śpiecyjalisty, nijakich surjoznych paškodžańniaŭ nie było. Uvieś čas dalejšaha lačeńnia ŭ dziciaci zachoŭvaŭsia zdavalniajučy samatyčny stan, skarhaŭ jon nie vykazvaŭ, jaho žyćciu ničoha nie pahražała, — udakładniŭ hałoŭny doktar.
U balnicy taksama patłumačyli, što videanazirańnie ŭ adździaleńni nie viadziecca, pry hetym pacyjenty kruhłasutačna znachodziacca pad nahladam miedpiersanału.
Što da sumiesnaha znachodžańnia dziaciej z baćkami, hałoŭny doktar spasłaŭsia na zakanadaŭstva. Pavodle jaho słoŭ, špitalizacyja pacyjentaŭ rehulujecca artykułam 25 Zakona Respubliki Biełaruś «Ab achovie zdaroŭja». Va ŭstanovie adznačyli, što imknucca abmiažoŭvać prysutnaść starońnich u adździaleńniach z-za patrabavańniaŭ psichijatryčnaj biaśpieki, kanfidencyjnaści pacyjentaŭ i abarony piersanalnych danych.
Pravierka balnicy i raźbiralnictva milicyi praciahvajucca.
Kamientary
...
tolki nie pacyjentaŭ, a miedpiersanału