Na biełaruskich trasach štučny intelekt pačaŭ šukać łasioŭ. Jak heta pracuje?
Zvyčajny darožny znak «Dzikija žyvioły» tolki papiaredžvaje kiroŭcaŭ, što na darohu moža vybiehčy źvier. Na dvuch učastkach biełaruskich tras — M6 u Vałožynskim rajonie i M10 u Rečyckim rajonie — ciapier pracuje bolš sučasnaja sistema. Kali znak pačynaje mirhać žoŭtym, a na elektronnym tabło źjaŭlajecca papiaredžańnie, heta aznačaje, što žyviolina ŭžo znachodzicca niedaloka ad darohi, piša vydańnie «Smartpres».
Kamiera zaŭvažyła źviera — znak zahareŭsia
Pryncyp pracy sistemy davoli prosty. Śpiecyjalny pierachod kantralujuć kamiery ź videaanalitykaj. Kali jany zaŭvažajuć žyviolinu, jakaja nabližajecca da darohi, kiroŭcaŭ papiaredžvajuć śvietłavym sihnałam na darožnym znaku i paviedamleńniem na elektronnym tabło. Sihnalizacyja pracuje da taho času, pakul źvier nie pakinie niebiaśpiečnuju zonu.
Mintrans padkreślivaje, što mihcieńnie znaka na takim učastku aznačaje realnuju niebiaśpieku źjaŭleńnia žyvioliny na prajeznaj častcy.
Amal 5 tysiač vypadkaŭ za hod
Ukaranieńnie takich sistem źviazana z rostam kolkaści avaryj ź dzikimi žyviołami. U 2025 hodzie ŭ Biełarusi zarehistravali 4998 vypadkaŭ vyjaŭleńnia zahinułych abo traŭmavanych u vyniku DTZ dzikich žyvioł — na 32,3% bolš, čym hodam raniej. Usiaho paciarpieli abo zahinuli 5100 žyvioł.
Bolš za ŭsio siarod ich było kazul — 3526. Na druhim miescy apynulisia łasi — 1111.
Rost kolkaści takich zdareńniaŭ praciahnuŭsia i ŭ 2026 hodzie. Za pieršy kvartał Biełaruskaje tavarystva palaŭničych i rybałovaŭ paviedamiła ŭžo pra 932 DTZ z palaŭničymi žyviołami, u jakich zahinuli abo atrymali traŭmy 957 źviaroŭ. Heta na 210 vypadkaŭ bolš, čym za anałahičny pieryjad 2025 hoda.
Siarod mahčymych pryčyn nazyvajuć pavieličeńnie transpartnaha patoku, rost kolkaści dzikich žyvioł i siezonnaje raśsialeńnie maładniaku.
Da najbolš niebiaśpiečnych u hetym płanie daroh tavarystva adnosić M2 Minsk — Nacyjanalny aeraport Minsk, M6 Minsk — Hrodna — miaža Polščy, M1 Brest — Minsk — miaža Rasii, M4 Minsk — Mahiloŭ i M5 Minsk — Homiel.
Takim čynam, novaja sistema źjaviłasia na adnoj z tras, dzie prablema sutyknieńniaŭ z žyviołami asabliva prykmietnaja.
Čamu łoś asabliva niebiaśpiečny?
Łoś, jak i lubaja inšaja dzikaja žyvioła, nie aceńvaje chutkaść aŭtamabila i moža niečakana źmianić kirunak ruchu. Asabliva niebiaśpiečna heta nočču: aśvietleny farami źvier moža razhubicca, aślepnuć i pačać chaatyčna ruchacca pa darozie.
Tamu kali łoś znachodzicca na ŭzbočynie, nielha raźličvać, što jon abaviazkova zastaniecca tam.
Łoś vyjšaŭ na darohu. Što rabić?
Dziaržaŭtainśpiekcyja raić maksimalna źnižać chutkaść užo tady, kali žyviolina źjaŭlajecca kala darohi, a nie čakać, pakul jana apyniecca niepasredna pierad aŭtamabilem.
Kali źvier vyjšaŭ na prajeznuju častku, treba dać jamu mahčymaść syści ź jaje. Rezka abjazdžać žyviolinu nie varta: spałochany łoś moža kinucca mienavita ŭ bok aŭtamabila. Nie rekamiendujecca i sihnalić, bo hučny huk moža prymusić źviera pavodzić siabie niepradkazalna.
Varta pamiatać i pra toje, što kali darohu pierabiehła adna žyviolina, pobač mohuć znachodzicca inšyja. Tamu adrazu nabirać chutkaść paśla taho, jak źvier źnik, taksama niebiaśpiečna.
Nočču rekamiendacyi jašče bolš kankretnyja: kali žyviolina spyniłasia ŭ śviatle far, treba spynicca, vyklučyć dalokaje i blizkaje śviatło, pakinuŭšy habaryty i avaryjnuju sihnalizacyju, i dać źvieru čas syści z darohi.
Što rabić, kali sutyknieńnia paźbiehnuć nie ŭdałosia?
Źjazdžać ź miesca zdareńnia nielha. Treba paznačyć miesca avaryi i vyklikać ekstrannyja słužby: 102, a pry najaŭnaści paciarpiełych — 103.
Nabližacca da paranienaha łasia taksama niebiaśpiečna. Dzikaja žyviolina ŭ stanie šoku moža napaści.
Zabirać z saboj zahinułaha źviera taksama nielha — DAI papiaredžvaje, što takija dziejańni mohuć rasceńvacca jak brakańjerstva.
Kamientary