Na jakich trasach u Biełarusi čaściej za ŭsio adbyvajucca DTZ ź dzikimi žyviołami
U minułym hodzie ŭ DTZ zahinuła bolš za 5 tysiač dzikich žyvioł.
Načalnik adździeła palaŭničaj haspadarki Ministerstva lasnoj haspadarki Alaksandr Kazarez raskazaŭ žurnalistam, na jakich trasach čaściej za ŭsio adbyvajucca DTZ ź dzikimi žyviołami, piša BiełTA.
Pavodle słoŭ Alaksandra Kazareza, daśledavańni viedamstva pakazvajuć, što častata zdareńniaŭ zaležyć nie stolki ad ščylnaści žyvioł na terytoryi, kolki ad intensiŭnaści transpartnaha patoku.
«Najbolšaja ryzyka ŭźnikaje na vysakachutkasnych mahistralach ź indeksam M, a taksama na darohach vakoł abłasnych centraŭ i Minska. Navat pry nievysokaj kolkaści žyvioł vierahodnaść sutyknieńnia tut vyšejšaja z-za značnaha abjomu trafiku», — padkreśliŭ jon.
Pablizu zapaviednikaŭ, nacyjanalnych parkaŭ i zakaźnikaŭ situacyja adnosna spakojnaja dziakujučy ŭmieranaj intensiŭnaści ruchu, dadaŭ načalnik adździeła. «Adnak vierahodnaść sustrečy z žyviołaj u hetych zonach zastajecca vysokaj, tamu vadzicielam nieabchodna vybirać chutkaść z ulikam darožnaj abstanoŭki, asabliva ŭ zmročny čas. My rekamiendujem nie pieravyšać 60—70 km/h», — skazaŭ jon.
Alaksandr Kazarez źviarnuŭ uvahu, što dzikija žyvioły, u pryvatnaści łasi, majuć śpiecyfičnuju psichafizijałohiju pavodzinaŭ i nie zaŭsiody chutka prymajuć adekvatnyja rašeńni.
U minułym hodzie ŭ DTZ zahinuła bolš za 5 tysiač dzikich žyvioł. U 2024 hodzie hetaja ličba składała kala 3 tys. žyvioł.
U minułym hodzie zahinuła kala 3 tys. kazulaŭ.
Pryčym da 40% łasioŭ i kazulaŭ hinie mienavita ŭ pieryjad z krasavika pa červień. «Heta vielmi vysokaja ličba. My, viadoma ž, zaklikajem usich kiroŭcaŭ być asabliva ŭvažlivymi, asabliva ŭ zmročny i načny čas sutak, bo mienavita ŭ hety čas pavialičvajecca aktyŭnaść žyvioł, i jany hinuć», — adznačyŭ Alaksandr Kazarez.
Ciapier čytajuć
Siarhiej Cichanoŭski zapuściŭ svoj jutub-kanał ź vieršami i kazkami29
Kamientary