Tramp zajaviŭ, što ŭ ZŠA stvorać «Siły ŠI» i pryznačać adkaznaha za raźvićcio štučnaha intelektu
Dopis kiraŭnika Biełaha doma źjaviŭsia na fonie ŭsio bolšaj kolkaści papiaredžańniaŭ ab patencyjnych niebiaśpiekach ŠI.
Prezident ZŠA Donald Tramp abviaściŭ, što jaho administracyja stvoryć «padraździaleńnie pa štučnym intelekcie» (AI Force) i pryznačyć dla jaho kuratara (AI tsar). Zajava kiraŭnika Biełaha doma prahučała na fonie apošnich papiaredžańniaŭ ab pahrozach, źviazanych z tempami raźvićcia ŠI, piša Bi-bi-si.
U subotu ŭ svaim dopisie ŭ sacyjalnych sietkach Donald Tramp zajaviŭ, što jaho administracyja «ni ŭ jakim razie nie budzie pieraškadžać abo strymlivać rost» štučnaha intelektu, i adkinuŭ zakliki zapavolić raźvićcio ŠI da taho času, pakul nie buduć stvoranyja bolš efiektyŭnyja miechanizmy abarony ad źviazanych ź im ryzyk.
Dopis kiraŭnika Biełaha doma źjaviŭsia na fonie ŭsio bolšaj kolkaści papiaredžańniaŭ ab patencyjnych niebiaśpiekach ŠI.
Tramp nie paviedamiŭ ni padrabiaznaściaŭ, ni terminaŭ realizacyi svajho płana.
«ŠI — heta nastupnaja pramysłovaja revalucyja abo internet, ale jaho ŭpłyŭ budzie jašče bolš maštabnym. Mahčyma, na jaho budzie prypadać da 25% VUP našaj krainy», — napisaŭ jon u sacyjalnaj sietcy, dadaŭšy, što choča, kab ZŠA praciahvali apiaredžvać Kitaj u śfiery ŠI.
ŠI siońnia znachodzicca ŭ centry amierykana-kitajskaha supiernictva: dźvie najbujniejšyja ekanomiki śvietu imknucca atrymać pieravahu ŭ halinie pieradavych technałohij.
Čakajecca, što hetaja tema budzie abmiarkoŭvacca na sustrečy Trampa sa staršynioj KNR Si Czińpinam na nastupnym tydni.
Tym časam kiraŭnik Biełaha doma zajaviŭ, što jaho administracyja budzie vykarystoŭvać isnujučuju sistemu kryminalnaha i hramadzianskaha pravasudździa dla pryciahnieńnia da adkaznaści tych, chto vykarystoŭvaje ŠI u supraćpraŭnych metach.
Jon taksama paŭtaryŭ svaje raniejšyja zajavy pra toje, što krytyka i aściarohi nakont patencyjnych pahroz, źviazanych z ŠI, źjaŭlajucca «mifam».
Zajavy ciapierašnich i byłych daśledčykaŭ pra toje, što hetaja technałohija moža pradstaŭlać pahrozu dla čałaviectva, u apošnija tydni vyklikali surjoznuju zaniepakojenaść. Adzin z daśledčykaŭ, u pryvatnaści, acaniŭ vierahodnaść taho, što ŠI «źniščyć usich ludziej», bolš čym u 10%.
Najbujniejšyja kampanii ŭ śfiery ŠI aktyŭna spaborničajuć u raspracoŭcy ŭsio bolš daskanałych sistem, u tym liku tak zvanaha zvyšintelektu — hipatetyčnaj technałohii, jakaja budzie pieraŭzychodzić čałavieka pavodle intelektualnych zdolnaściaŭ.
Najbujniejšyja hulcy haliny — Anthropic, OpenAI i Google, kampanii, jakija raspracavali adpaviedna Claude, ChatGPT i Gemini, — taksama paviedamlali pra vypadki parušeńnia biaśpieki abo incydenty, u jakich ich čat-boty vykarystoŭvalisia dla «złamysnaj dziejnaści».
Kiraŭnik Anthropic Daryjo Amadei niadaŭna zaklikaŭ zapavolić raźvićcio ŠI i prapanavaŭ uvieści ahulnahalinovyja miery dla zapavoleńnia raspracoŭki i rehulavańnia technałohii, a taksama niezaležny kantrol za stvareńniem madelaŭ ŠI.
Kiraŭnik OpenAI Sem Altman i Iłan Mask, jaki ŭznačalvaje xAI, zajavili, što zhodnyja ź jaho rekamiendacyjami.
Suzasnavalnik Anthropic Džek Kłark zajaviŭ Bi-bi-si, što, mahčyma, dla ŭsioj haliny varta ŭvieści abaviazkovuju najaŭnaść «avaryjnaha vyklučalnika», pracu jakoha moh by praviarać niezaležny treci bok.
Hetyja papiaredžańni padšturchnuli amierykanskich zakanadaŭcaŭ prapanavać zakanadaŭčyja miery ŭ dačynieńni da ŠI. Adnak Altman na hetym tydni zajaviŭ, što Vašynhton nie paśpiavaje za raźvićciom novaj technałohii i pakul nie spraŭlajecca z pytańniem jaje rehulavańnia. Pavodle jaho słoŭ, ludziam varta bolš daviarać kampanijam, jakija raspracoŭvajuć ŠI, u pytańniach jaho biaśpieki.
«Śviet pavinien daviarać tamu, što my pastupim pravilna, tamu što heta pravilna, i my razumiejem maštab i značnaść hetaha pytańnia», — zajaviŭ Altman na kanfierencyi ŭ San-Francyska.
U Vialikabrytanii deputaty ad roznych partyj i členy Pałaty łordaŭ vyjavili ryzyki, jakija štučny intelekt stvaraje dla pravoŭ čałavieka, i zajavili, što dziejnaje zakanadaŭstva drenna prystasavanaje da taho, kab spraŭlacca z chutkim raźvićciom hetaj technałohii.
Abjadnany kamitet pa pravach čałavieka (JCHR) apublikavaŭ dakład, u jakim zaklikaŭ pryniać novy zakon ab ŠI, kab «uličvać maštab i surjoznaść» padobnych pahroz.
Ciapier čytajuć
U SIZA KDB adšukaŭsia padpałkoŭnik Zara, jakoha siłaviki ličać analitykam Sachaščyka. Jak jon apynuŭsia ŭ Biełarusi — nieviadoma14
Kamientary