«Spačatku my piać dzion zapar pili piva, a potym pajšli ŭ studyju». Biełarusy stvaryli pank-hurt u Amierycy i zapisali albom pa-biełarusku
Pank-hurt 5051 pačynaŭ ŭ Ńju-Jorku z kavieraŭ na pieśni Maksa Karža, a ciapier vypuściŭ biełaruskamoŭny albom. U składzie hurtu — chłopcy z uschodniaj Biełarusi. Salist Ivan Šłyk raskazaŭ, jak źjaviŭsia hurt i čamu muzyki pierajšli z ruskaj na biełaruskuju.
Hurt 5051 naradziŭsia ŭ Ńju-Jorku ŭ 2019 hodzie. Da hetaha jaho ŭdzielniki viedali adzin adnaho jašče pa Biełarusi, ale muzykaj razam nikoli nie zajmalisia. Salist Ivan Šłyk i basist Aleks Chackievič rodam ź Viciebska, barabanščyk Dzianis Ihnaciuk — z Horak. Ź Dzianisam chłopcy vučylisia ŭ adnym univiersitecie, ale, pa słovach Ivana, faktyčna viedali tolki pra isnavańnie adzin adnaho.
«Letam 2019 hoda my prosta źbiralisia ŭ Ńju-Jorku i chadzili kožny dzień pić piva. Moža, tak było piać dzion zapar. I ŭ adzin z hetych dzion my padumali: a što budzie, kali zaŭtra nie budziem marnavać čas, nie budziem pić piva, jak zaŭsiody, a pojdziem u muzyčnuju studyju?» — zhadvaje Ivan.
Na nastupny dzień biełarusy pryjšli ŭ studyju. Praŭda, amal nichto ź ich nie viedaŭ, što mienavita hrać. Zatoje ŭsie viedali pieśni Maksa Karža.
Za adnu repietycyju muzyki razabrali kala siami jaho piesień, paśla čaho znajšli ruskamoŭny fiestyval u Ńju-Jorku. Tam i adbyŭsia pieršy kancert 5051 — z kavierami na pieśni Karža.
Paśla hetaha hurt pastupova pierajšoŭ da ŭłasnych piesień. Ivan piša muzyku, a basist Aleś — teksty.
Pieršyja dva albomy 5051 byli na ruskaj movie. Novy albom muzyki vyrašyli zrabić biełaruskamoŭnym.
Pavodle Ivana, heta rašeńnie nie było źviazanaje z vajnoj abo hieapalitykaj. Ideja rabić muzyku pa-biełarusku źjaviłasia jašče da pačatku poŭnamaštabnaha ŭvarvańnia Rasii va Ukrainu.
«Prosta chaciełasia niešta dadać u biełaruskuju kulturu. I stać jaje častkaj trochi bolš», — kaža muzyka.
Pry hetym jamu było cikava nie tolki vykarystoŭvać biełaruskuju movu, ale i pravieryć, jak jana budzie hučać mienavita ŭ pank-roku.
Asnoŭnaja aŭdytoryja 5051 u ZŠA taksama biełaruska– i ruskamoŭnaja.
Ciapier muzyki jaŭna adčuvajuć roźnicu pamiž pieršymi vystupami i kancertami apošnich hadoŭ. Kali ŭ 2019‑m jany vykonvali pieravažna kaviery, to ciapier u roznych haradach ZŠA ludzi viedajuć ich ułasnyja pieśni i padchoplivajuć asobnyja radki.
Na kamiernyja vystupy artystaŭ u pabach u Bostanie, Bruklinie, Fiładelfii i Ńju-Jorku źbirajucca dziasiatki čałaviek.
Hurt nie staŭ vykarystoŭvać štučny intelekt dla stvareńnia muzyki — niejrasietki spatrebilisia tolki dla eskizu vokładki novaha alboma.
«Ja prosta nie baču sensu tracić svoj čas na toje, kab tranślavać śvietu bačańnie inšych ludziej, a nie svajo».
Jość u hurtu i svaja historyja nazvy. 5051 — svojeasablivy sposab zašyfravać niecenzurnaje słova. Muzyki chacieli, kab na afišach i ŭ publičnych miescach była nazva, jakuju słuchaču daviadziecca samomu razhadać.
Nazva novaha alboma naradziłasia vypadkova. U intervju dla prajekta «ABA Together» muzykaŭ spytali, što dapamahaje im adpačyć paśla kancertaŭ i turaŭ. U žart jany adkazali: ježa, son i kurtyzanki.
Taki pankaŭski adkaz niečakana spadabaŭsia i im samim.
«My padumali: blin, a hučyć. Prykiń, nazvać tak albom», — uspaminaje Šłyk.
Tak hety vyraz i staŭ nazvaj alboma.
Ciapier 5051 praciahvaje vystupać u ZŠA i sprabuje zrazumieć, kudy moža dajści biełaruskaja muzyka, stvoranaja za akijanam. A ŭ Biełaruś muzyki abiacajuć pryjechać, kali budzie mahčymaść.
Ciapier čytajuć
Minčanka Anhielina, jakaja prasiła ŭ Łukašenki kvateru za trojniu, atrymała žyllo18
Minčanka Anhielina, jakaja prasiła ŭ Łukašenki kvateru za trojniu, atrymała žyllo
Basist «Piatli», jaho 18‑hadovy syn i zorka «Raźbitaha serca pacana» — raskazvajem pra biełaruskamoŭny hurt Prypiać, jaki prezientavaŭ aŭtarskuju «Kałychanku»1111
Kamientary