«Спачатку мы пяць дзён запар пілі піва, а потым пайшлі ў студыю». Беларусы стварылі панк-гурт у Амерыцы і запісалі альбом па-беларуску
Панк-гурт 5051 пачынаў ў Нью-Ёрку з кавераў на песні Макса Каржа, а цяпер выпусціў беларускамоўны альбом. У складзе гурту — хлопцы з усходняй Беларусі. Саліст Іван Шлык расказаў, як з'явіўся гурт і чаму музыкі перайшлі з рускай на беларускую.
Гурт 5051 нарадзіўся ў Нью-Ёрку ў 2019 годзе. Да гэтага яго ўдзельнікі ведалі адзін аднаго яшчэ па Беларусі, але музыкай разам ніколі не займаліся. Саліст Іван Шлык і басіст Алекс Хацкевіч родам з Віцебска, барабаншчык Дзяніс Ігнацюк — з Горак. З Дзянісам хлопцы вучыліся ў адным універсітэце, але, па словах Івана, фактычна ведалі толькі пра існаванне адзін аднаго.
«Летам 2019 года мы проста збіраліся ў Нью-Ёрку і хадзілі кожны дзень піць піва. Можа, так было пяць дзён запар. І ў адзін з гэтых дзён мы падумалі: а што будзе, калі заўтра не будзем марнаваць час, не будзем піць піва, як заўсёды, а пойдзем у музычную студыю?» — згадвае Іван.
На наступны дзень беларусы прыйшлі ў студыю. Праўда, амаль ніхто з іх не ведаў, што менавіта граць. Затое ўсе ведалі песні Макса Каржа.
За адну рэпетыцыю музыкі разабралі каля сямі яго песень, пасля чаго знайшлі рускамоўны фестываль у Нью-Ёрку. Там і адбыўся першы канцэрт 5051 — з каверамі на песні Каржа.
Пасля гэтага гурт паступова перайшоў да ўласных песень. Іван піша музыку, а басіст Алесь — тэксты.
Першыя два альбомы 5051 былі на рускай мове. Новы альбом музыкі вырашылі зрабіць беларускамоўным.
Паводле Івана, гэта рашэнне не было звязанае з вайной або геапалітыкай. Ідэя рабіць музыку па-беларуску з'явілася яшчэ да пачатку поўнамаштабнага ўварвання Расіі ва Украіну.
«Проста хацелася нешта дадаць у беларускую культуру. І стаць яе часткай трохі больш», — кажа музыка.
Пры гэтым яму было цікава не толькі выкарыстоўваць беларускую мову, але і праверыць, як яна будзе гучаць менавіта ў панк-року.
Асноўная аўдыторыя 5051 у ЗША таксама беларуска– і рускамоўная.
Цяпер музыкі яўна адчуваюць розніцу паміж першымі выступамі і канцэртамі апошніх гадоў. Калі ў 2019‑м яны выконвалі пераважна каверы, то цяпер у розных гарадах ЗША людзі ведаюць іх уласныя песні і падхопліваюць асобныя радкі.
На камерныя выступы артыстаў у пабах у Бостане, Брукліне, Філадэльфіі і Нью-Ёрку збіраюцца дзясяткі чалавек.
Гурт не стаў выкарыстоўваць штучны інтэлект для стварэння музыкі — нейрасеткі спатрэбіліся толькі для эскізу вокладкі новага альбома.
«Я проста не бачу сэнсу траціць свой час на тое, каб трансляваць свету бачанне іншых людзей, а не сваё».
Ёсць у гурту і свая гісторыя назвы. 5051 — своеасаблівы спосаб зашыфраваць нецэнзурнае слова. Музыкі хацелі, каб на афішах і ў публічных месцах была назва, якую слухачу давядзецца самому разгадаць.
Назва новага альбома нарадзілася выпадкова. У інтэрв'ю для праекта «ABA Together» музыкаў спыталі, што дапамагае ім адпачыць пасля канцэртаў і тураў. У жарт яны адказалі: ежа, сон і куртызанкі.
Такі панкаўскі адказ нечакана спадабаўся і ім самім.
«Мы падумалі: блін, а гучыць. Прыкінь, назваць так альбом», — успамінае Шлык.
Так гэты выраз і стаў назвай альбома.
Цяпер 5051 працягвае выступаць у ЗША і спрабуе зразумець, куды можа дайсці беларуская музыка, створаная за акіянам. А ў Беларусь музыкі абяцаюць прыехаць, калі будзе магчымасць.
Цяпер чытаюць
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю9
Каментары