U Italii jość horad u formie idealnaj zorki. Navošta jaho tak pabudavali

Kali ŭ kancy XVI stahodździa Vieniecyjanskaj Respublicy spatrebiłasia ŭmacavać svaje ŭschodnija rubiažy, jana pajšła na radykalny krok: zamiest taho kab prystasoŭvać da abarony ŭžo isnujučy horad, vyrašyła pabudavać novy z nula. Tak u 1593 hodzie źjaviłasia Palmanova.

Jaje prajektavali vajskovyja inžyniery, i łohicy abarony tut padparadkavali faktyčna ŭvieś haradski płan. Krepaść musiła baranić vieniecyjanskija ziemli ad mahčymych napadaŭ turkaŭ i adnačasova słužyć zasłonaj ad Habsburhaŭ.

U centry horada raźmiaścili vialikuju šaścikutnuju płošču Pjaca-Hrande, ad jakoj pramianiami razychodziacca vulicy. Trapić u histaryčnuju častku možna było praz try bramy.

Adnak hałoŭnaja asablivaść Palmanovy — heta jaje ŭmacavańni. Jany ŭtvarajuć dzieviacikancovuju zorku, formu jakoj siońnia asabliva dobra vidać z pavietra. Takaja hieamietryja mieła praktyčny sens: vystupy bastyjonaŭ dazvalali abaroncam vieści ahoń uzdoŭž susiednich učastkaŭ ścien i nie pakidać kala ich «ślapych zon», dzie moh by schavacca praciŭnik.

Pieršyja dva abarončyja pajasy pabudavali pry vieniecyjancach. U ich uvachodzili dzieviać bastyjonaŭ i dzieviać ravielinaŭ — asobnych trochvuholnych umacavańniaŭ pierad asnoŭnaj linijaj muroŭ.

Abarončuju sistemu praciahvali ŭdaskanalvać i praz dva stahodździ paśla zasnavańnia horada. U XIX stahodździ na zahad Napaleona źjaviŭsia treci, vonkavy pojas umacavańniaŭ ź dzieviaćciu lunietami.

Jość u krepaści i niabačnaja zvonku častka. Pad ziamloj prachodzić sietka chadoŭ, pa jakich sałdaty mahli pieramiaščacca pamiž pazicyjami tak, kab praciŭnik hetaha nie zaŭvažyŭ.

Pavialičyć

Ahulny pierymietr umacavańniaŭ Palmanovy pieravyšaje čatyry kiłamietry, a terytoryja ŭnutry ich zajmaje kala 1,46 kvadratnaha kiłamietra. Ciapier u horadzie žyvie krychu bolš za 5200 čałaviek.

Byłyja fartyfikacyi siońnia stali turystyčnymi maršrutami. Jak paviedamlajecca na aficyjnym turystyčnym sajcie Palmanovy, pa horadzie možna prajści paŭtarakiłamietrovym «Šlacham architektara». Maršrut u Parku bastyjonaŭ u zaležnaści ad vybranaha varyjanta składaje ad 1,8 da 3,5 kiłamietra. Jašče adzin šlach — kala 4,3 kiłamietra — idzie ŭzdoŭž koła ŭmacavańniaŭ.

U pieršy tydzień vieraśnia ŭ Palmanovie prachodzić histaryčnaja rekanstrukcyja «A.D. Palma alle Armi» («Palma da zbroi!»). U joj udzielničajuć bolš za tysiaču čałaviek u histaryčnych strojach.

U 2017 hodzie Palmanova razam ź inšymi abarončymi zbudavańniami Vieniecyjanskaj respubliki była ŭklučanaja ŭ Śpis suśvietnaj spadčyny JUNIESKA. Praz hod horad uvajšoŭ u asacyjacyju najpryhažejšych małych haradoŭ Italii.

• 7
• 0
• 0
• 0
• 0
• 0
• 0
• 0