U Razanskaj vobłaści abłomki bieśpiłotnikaŭ trapili na terytoryju pramysłovaha pradpryjemstva i paškodzili žyłyja damy. Rasijskija ŭłady nie nazyvajuć atakavany abjekt, ale miascovyja pabliki śćviardžajuć, što hareŭ naftapierapracoŭčy zavod.
U noč na 6 vieraśnia bieśpiłotniki atakavali Razanskuju i Rastoŭskuju vobłaści Rasii.
Hubiernatar Razanskaj vobłaści Pavieł Małkoŭ paviedamiŭ, što abłomki dronaŭ paškodzili žyłyja damy, a na terytoryi adnaho z pradpryjemstvaŭ pačaŭsia pažar. Pavodle papiarednich źviestak, paciarpiełych niama.
Miascovyja žychary publikujuć videa z ahniom i słupam dymu. Manitorynhavyja kanały śćviardžajuć, što pad udaram moh apynucca Razanski naftapierapracoŭčy zavod.
Pra toje, što bieśpiłotniki atakavali Razanski naftapierapracoŭčy zavod, śviedčyć i OSINT-analiz vydańnia ASTRA.
Razanski NPZ naležyć «Rasnafcie» i ličycca adnym z najbujniejšych naftapierapracoŭčych pradpryjemstvaŭ Rasii. Jaho mahutnaść składaje kala 17 miljonaŭ ton nafty za hod.
Zavod vyrablaje bienzin, dyzielnaje paliva, avijacyjnuju hazu, mazut, zvadkavanyja hazy, bitum i syravinu dla naftachimičnaj pramysłovaści.
Heta nie pieršaja ataka na pradpryjemstva ŭ 2026 hodzie. Bieśpiłotniki ŭžo nanosili ŭdary pa Razanskim NPZ u mai i lipieni. Paśla lipieńskaj ataki zavod prypyniaŭ pierapracoŭku nafty.
Aficyjnaha paćviardžeńnia hetaha pakul niama.
Nie paćvierdžanaja i infarmacyja pra mahčymuju ataku na skład Ozon.
U Rastoŭskaj vobłaści, pavodle hubiernatara Juryja Ślusara, siły supraćpavietranaj abarony źbili kala 30 bieśpiłotnikaŭ. U Rastovie paškodžanyja dva šmatkvaternyja damy.
Ciapier čytajuć
Hetaja biełaruskaja instazorka dajšła da Playboy — ale, u adroźnieńnie ad mnohich, nie spyniłasia5
Kamientary